2024 جىلعى 1 قاڭتاردان باستاپ جۇمىس بەرۋشىلەر مىندەتتى 10%-دىق زەينەتاقى تولەمىنەن بولەك, ءوز قاراجاتى ەسەبىنەن جۇمىسشىنىڭ بىرىڭعاي جيناقتاۋشى زەينەتاقى قورىنداعى شوتىنا قوسىمشا جارنا اۋدارۋعا مىندەتتەلگەن. العاشقى جىلى زەينەتاقى جارناسىنىڭ مولشەرى جالاقىنىڭ 1,5%-ىن قۇراسا, 2028 جىلعا دەيىن كەزەڭ-كەزەڭىمەن 5%-عا دەيىن كوتەرىلەدى. بۇگىن ءماجىلىس كۋلۋارىندا دەپۋتات اسحات ايماعامبەتوۆ سول 5%-دىڭ 4%-ىن ازاماتتاردىڭ جەكە شوتىنا اۋدارۋ ۇسىنىسىن تارقاتا ايتتى, دەپ جازادى Egemen.kz.
باستاپقى جوسپار بويىنشا جۇمىس بەرۋشىنىڭ ءوز قاراجاتى ەسەبىنەن جۇمىسشىنىڭ بىرىڭعاي جيناقتاۋشى زەينەتاقى قورىنداعى شوتىنا 2024 جىلى – 1,5%, 2025 جىلى – 2,5%, 2026 جىلى – 3,5%, 2027 جىلى – 4,5%, 2028 جىلى – 5,0% اۋدارۋ مىندەتى قويىلعان.
ماجىلىسمەن ا.ايماعامبەتوۆ قارجى ساراپشىلارىنىڭ پىكىرلەرىن العا تارتا وتىرىپ, اتالعان 5%-دىڭ 4%-ىن ازاماتتاردىڭ جەكە شوتىنا اۋدارۋ ۇسىنىسىن كوتەرگەنىن جەتكىزدى.
«قازىر بىرىڭعاي زەينەتاقى قورىنا ارقايسىسىمىزدىڭ جالاقىمىزدان 10% اۋدارىم مىندەتتى تۇردە جاسالادى. بىلتىر جۇمىس بەرۋشىلەر دە ءوز قاراجاتىنان اۋدارىم جاساۋعا مىندەتتەلدى. ەندى ءبىز جانە قارجىگەرلەر وسى قوسىمشا جۇمىس بەرۋشىلەردىڭ تولەيتىن 5%-ىنىڭ 4%-ىن ءار ادامنىڭ جەكە شوتىنا بەرسە دەيمىز. 1%-ىن جالپى قورعا اۋدارۋدى ۇسىنامىز. ويتكەنى ەلىمىزدە جالاقى المايتىن ازاماتتار دا بار. ولارعا دا زەينەتاقى تولەنۋى كەرەك. ماسەلەن, قازىر ءسىز باق-تا قىزمەت ەتىپ جۇرسەڭىز ءار جالاقىڭىزدىڭ 10%-ى بجزق-عا اۋدارىلىپ جاتىر. وعان جۇمىس بەرۋشىنىڭ 5%-ى دا قوسىلادى. جوعارىدا ايتقان پىكىرىمىزدى بۇرىنعى ۇلتتىق بانك قىزمەتكەرلەرى, توراعالارى دا قولداپ وتىر. مەنىڭ دە جەكە پىكىرىم وسى ۇستانىمعا سايادى», دەدى دەپۋتات.