الماتىدا پرەزيدەنت قاسىم-جومارت توقاەۆتىڭ توراعالىعىمەن جاساندى ينتەللەكتىنى دامىتۋ جونىندەگى كەڭەستىڭ ەكىنشى وتىرىسى ءوتتى. جيىندا مەملەكەت باسشىسى الەمدىك دەڭگەيدەگى جەتەكشى زەرتحانالاردىڭ سوڭعى دەرەكتەرىنە سۇيەنە وتىرىپ, دامىعان جانە دامۋشى ەكونوميكالار اراسىنداعى الشاقتىق تەز ۇلعايىپ كەلە جاتقانىن اتاپ ءوتتى, دەپ جازادى Egemen.kz.
«جاساندى ينتەللەكتىنىڭ ءبىر ەرەكشەلىگى – كاپيتال دا, تەحنولوگيا دا كوشباسشىلاردىڭ قولىنا شوعىرلانادى. ۋاقتىلى ءارى باتىل شەشىم قابىلداماسا, ەرتەڭ «تەحنولوگيالىق الشاقتىقتى» قىسقارتۋ قيىنعا سوعادى. بۇل – قازاقستان ءۇشىن الاڭداتارلىق احۋال. قازىرگى جاعدايدى ەگجەي-تەگجەيلى سارالاپ, ناقتى ينتەللەكتۋالدىق ونىمدەر جاساۋعا قابىلەتىمىز قانشالىقتى جەتەتىنىن انىق ءتۇسىنۋ كەرەك. ەلىمىز كلاسسيكالىق «ورتا تابىس داعدارىسىنا» تاپ بولدى دەگەن ساراپشىلاردىڭ پىكىرىمەن كەلىسپەسكە امال جوق. مۇنداي كەزدە تابيعي رەسۋرستار مەن ارزان جۇمىس كۇشى سەكىلدى ءداستۇرلى رەسۋرستار سارقىلا باستايدى, ال ەكونوميكالىق وسىمگە سەرپىن بەرەتىن جاڭا سالالار ءتيىستى دەڭگەيدە دامىمايدى نەمەسە ىسكە قوسىلمايدى. ەكونوميكانىڭ تۇرالاۋىنا جول بەرمەۋ ءۇشىن ۇلكەن تسيفرلىق پلاتفورمالار قۇرۋ قاجەت. سول ارقىلى تسيفرلىق ەكونوميكاعا جەدەل اۋىسۋ امالىن ىزدەگەن دۇرىس. مەملەكەتتىك دەرەكتەردىڭ بىرىڭعاي جۇيەسى بولماسا, جاساندى ينتەللەكتىدەن پايدا جوق. وسى ورايدا مەملەكەتتىك سەرۆيستەردى كوزگە كورىنبەيتىن, بىراق وتە ءتيىمدى وپەراتسيالىق جۇيەگە ترانسفورماتسيالاۋ كەرەك. سوندا شامادان تىس بيۋروكراتيالىق تالاپتاردان قۇتىلامىز. قازىرگى جۇيە بويىنشا سۇرانىس جىبەرۋدەن باستاپ شەشىم قابىلداۋعا دەيىنگى ارالىققا بىرنەشە كۇن نەمەسە بىرنەشە اپتا كەتەدى. نەگىزى, اتالعان تسيكل بىرنەشە سەكۋندقا دەيىن قىسقارۋعا ءتيىس. سول كەزدە ەلدەگى كاپيتال اينالىمى جەدەلدەي تۇسەدى», دەدى قاسىم-جومارت توقاەۆ.
سونداي-اق پرەزيدەنت جاساندى ينتەللەكت سالاسىنداعى نەگىزگى مەملەكەتتىك جوبالارعا توقتالدى. دۇنيەجۇزىلىك بانكتىڭ مالىمەتىنشە, تسيفرلىق ەكونوميكانىڭ الەمدىك ءىجو-دەگى ۇلەسى 15 پايىزدان اسقان. بۇل جاھاندىق باسەكەنىڭ تاۋار نارىعىنان دەرەكقور مەن ستاندارتتار نارىعىنا قاراي ويىسقانىن انىق كورسەتەدى.
تسيفرلىق ەكونوميكا ءىجو-گە قالاي اسەر ەتەدى؟ پرەزيدەنت ۇسىنىستار ەنگىزۋدى تاپسىردى
«بۇگىنگى وزگەرىستەردىڭ اسەرىن ەلىمىز ءالى تولىق سەزىنە قويعان جوق. وتكەن ايدا قازاقستان بىرىڭعاي كەدەندىك راسىمدەۋ پلاتفورماسىنا ءوتتى. ەندى دەكلاراتسيا تولتىرۋ ۋاقىتى ءبىر مينۋتتان اسپايدى, قۇجاتتاردىڭ باسىم بولىگى اۆتوماتتى تۇردە قارالادى. سونىمەن قاتار Smart Cargo ۇلتتىق لوگيستيكا پلاتفورماسى جاسالىپ جاتىر. ول 127 دەرەك كوزىنە تىكەلەي قوسىلادى. تۇعىرناما ادال جۇمىس ىستەيتىن كومپانيالارعا شەكارادان تەز ارادا وتۋگە مۇمكىندىك بەرەدى. سالىق سالاسىندا دا تۇبەگەيلى وزگەرىستەر ورىن الدى. سالىقتىق اكىمشىلەندىرۋدىڭ ءبىرتۇتاس جۇيەسى قۇجاتتاردى وڭدەۋ ۋاقىتىن ءبىر ساعاتتان ءبىر مينۋتقا دەيىن قىسقارتىپ, ەكى ميلليون سالىق تولەۋشىنىڭ سەرۆيستى پايدالانۋىن جەڭىلدەتتى. Smart Data Finance پلاتفورماسىنىڭ ىسكە قوسىلۋى – ەلەۋلى جەتىستىكتەردىڭ ءبىرى. جۇيە ءموبيلدى اۋدارىمداردان باستاپ ۇشاقپەن ساپارلاۋعا دەيىنگى ارەكەتتەردىڭ ءبارىن قامتيتىن 78 دەرەككوزدەن اناليتيكالىق مالىمەت جينايدى. بيۋدجەتكە ونلاين-مونيتورينگ جاساۋ جۇزدەگەن ميلليارد تەڭگە تاۋەكەلى بار تولەمدەردىڭ الدىن الادى. ۇلتتىق تاۋارلار كاتالوگىنا 23 ميلليوننان استام ءونىم ءتۇرى ەنگىزىلدى. وسى ارقىلى مەملەكەتتىك ساتىپ الۋلاردىڭ بولجامدىق-تالدامالىق مودەلى جاسالىپ, جىل سايىن 200 ميلليارد تەڭگەدەن استام قارجىنى ۇنەمدەۋگە بولادى», دەدى مەملەكەت باسشىسى.