4 قاراشا كۇنى الماتىدا العاشقى قار جاۋدى. كەنەتتەن تۇسكەن اق ۇلپا قالا تۇرعىندارىن ابىگەرگە سالدى, ال كوممۋنالدىق قىزمەتتەر تاۋلىك بويى جۇمىس ىستەدى, دەپ حابارلايدى Egemen.kz.
اۋا تەمپەراتۋراسى +2 °C شاماسىندا بولسا, جەلدىڭ جىلدامدىعى 2-7 م/س ارالىعىندا بولدى. قاردىڭ قالىڭدىعى قالا اۋماعىندا شامامەن 1 سانتيمەترگە جەتسە, تاۋلى ايماقتاردا 10 سانتيمەترگە دەيىن تۇسكەن.
قالا كوشەلەرىن قاردان تازارتۋ جانە كوكتايعاقتىڭ الدىن الۋ ماقساتىندا كوممۋنالدىق قىزمەتتەر كۇشەيتىلگەن رەجيمدە جۇمىسقا كىرىستى. تۇنگى ۋاقىتتا قالا جولدارىنا 918 ارنايى تەحنيكا مەن 2 550-دەن استام جول جۇمىسشىسى شىقتى. نەگىزگى ماگيسترالدار, كوپىرلەر, جول ايرىقتارى, ەڭىستەر مەن تروتۋارلار كوكتايعاققا قارسى ماتەريالدارمەن وڭدەلىپ جاتىر.
قار تۇسپەي تۇرىپ, 204 قۇم-تۇز شاشقىش تەحنيكا ماگيسترالداردى الدىن الا سۇيىق رەاگەنتتەرمەن وڭدەگەن. قازىر جولدارعا ارنايى قوسپالار سەبىلىپ, ايالدامالار مەن جاياۋ جۇرگىنشىلەر وتكەلدەرى تازارتىلىپ جاتىر.
قالالىق اكىمدىكتىڭ مالىمەتىنشە, كوشەلەردەگى جاعدايدى باقىلاۋ جانە مۇز قاتقان ايماقتاردا جەدەل ارەكەت ەتۋ ءۇشىن 75 پاترۋلدىك بريگادا كەزەكشىلىكتە تۇر. قاجەت بولعان جاعدايدا قوسىمشا 1000-عا دەيىن تەحنيكا مەن 6110 جول جۇمىسشىسى جۇمىلدىرىلماق.بۇل رەتتە تاكسي قىزمەتىنىڭ باعاسى دا كۇرت وسكەن.
الماتى تۇرعىندارى الەۋمەتتىك جەلىلەردە قار باسقان كوشەلەر مەن كولىك كەپتەلىستەرى تۋرالى بەينەجازبالارمەن ءبولىسىپ, قالاداعى قىستىڭ العاشقى اسەرلەرىن تالقىلاپ جاتىر.