مەملەكەت باسشىسىنىڭ الەۋمەتتىك ينفراقۇرىلىمدى دامىتۋ جونىندەگى تاپسىرمالارىن جۇزەگە اسىرۋ شەڭبەرىندە كوكشەتاۋدا كوپفۋنكتسيونالدى سپورتتىق-مادەني كەشەننىڭ قۇرىلىسى اياقتالىپ قالدى. ۇكىمەت وسى ماقساتتارعا ارناۋلى مەملەكەتتىك قوردان 12,6 ملرد تەڭگە ءبولدى, دەپ حابارلايدى Egemen.kz.
وليمپيادالىق ستاندارتتىڭ سەرتيفيكاتتالعان قۇرالدارىمەن جابدىقتالعان بوكس, كۇرەس, اۋىر اتلەتيكا جانە كروسسفيتكە ارنالعان زالدار اتالعان سپورت كەشەنىندە قاراستىرىلعاندىقتان رەسپۋبليكالىق جانە الەمدىك دەڭگەيدەگى IBA جارىستارىن وتكىزۋگە مۇمكىندىك بەرەدى.
كەشەن اۋماعىندا ەكى فۋتبول الاڭى, يادرو مەن نايزا لاقتىرۋعا ارنالعان الاڭ, ويىن جانە جاتتىعۋ ايماقتارى, امبەباپ سپورت الاڭدارى جانە جەڭىل اتلەتيكا ايماعى ورنالاساتىن بولادى. حالىقتىڭ موبيلدىلىگى تومەن توپتارى ءۇشىن ارنايى قۇرال-جابدىقتار قاراستىرىلعان.
ۇكىمەتتىڭ ءباسپاسوز قىزمەتىنىڭ مالىمدەۋىنشە, بۇدان بولەك, ءورت-قولدانبالى سپورت تۇرلەرىنە ارنالعان سكالودروم جانە مۇناراسى بار امبەباپ سپورت زالىن اشۋ جوسپارلانىپ وتىر. مۇندا كاسىبي قۇتقارۋشىلاردى دايارلايتىن توتەنشە جاعدايلار مينيسترلىگىنىڭ ازاماتتىق قورعاۋ اكادەمياسىنىڭ كۋرسانتتارى وزدەرىنىڭ كاسىبي داعدىلارىن ارتتىرا الادى.
مادەني-بۇقارالىق ءىس-شارالارعا ارنالعان زاماناۋي مۋلتيمەديالىق جۇيەلەرى بار 650 ورىندىق زال دا قولجەتىمدى بولماق.
نىساندا نەگىزگى قۇرىلىس جۇمىستارى اياقتالدى, ىشكى ارلەۋ, اباتتاندىرۋ جانە ينجەنەرلىك جەلىلەر جۇرگىزىلىپ جاتىر. نىساننىڭ جالپى دايىندىعى – 85%. وسى جىلدىڭ سوڭىنا دەيىن پايدالانۋعا بەرۋ جوسپارلانعان.