جاڭا وقۋ جىلىن ورداباسى اۋدانى, اقب ۇلىنىڭ اۋىلىنىڭ وقۋشىلارى “كەلەشەك مەكتەپتەرى” باعدارلاماسى اياسىندا سالىنعان جاڭا ءبىلىم ورداسىمەن باستادى. ۇلتتىق جوبا ارقىلى بوي كوتەرگەن مەكتەپ اۋدانداعى ىڭعايلاستىرىلعان قوس مەكتەپتىڭ ماسەلەسىن شەشتى, دەپ جازادى Egemen.kz.
“بولاشاق” مەكتەبى - 2007 جىلى اسار تاسىلىمەن سالىندى. ول كەزدە 6 بولمەدەن تۇراتىن ءبىلىم ۇياسىندا 1-9 سىنىپ ارالىعىندا 200-گە جۋىق بالا ءبىلىم الاتىن. جوعارى سىنىپ وقۋشىلارى 3,5 كم قاشىقتىقتاعى كورشى اۋىلعا تاسىمالدانىپ وقيتىن. سونىمەن قاتار 2,5 كم جەردەگى ساماننان 1969 جىلى سالىنعان “قاراباستاۋ” باستاۋىش مەكتەبىندە جۇزدەن استام بالا ءبىلىم الاتىن. 2023 جىلى مەملەكەت باسشىسى قاسىم-جومارت توقاەۆتىڭ باستاماسىمەن قولعا الىندا “كەلەشەك مەكتەپتەرى” باعدارلاماسى ارقىلى جاڭا ەڭسەلى مەكتەپ سالىنىپ, 2025 جىلدىڭ قىركۇيەگىنەن باستاپ ىڭعايلاستىرىلعان “بولاشاق” جانە “قاراباستاۋ” باستاۋىش مەكتەپ وقۋشىلارى مەن ۇستازدارى تولىعىمەن جاڭا عيماراتقا كوشىرىلدى.
بۇگىندە كەلەشەك مەكتەبىندە 319 وقۋشىعا 36 مۇعالىم ءبىلىم بەرەدى. ەكى قاباتتى عيماراتتا 28 وقۋ كابينەتى, ستەم كابينەت, روبوتوتەحنيكا, سپورت زال مەن 80 ورىندى اسحاناسى, اكت زالى بار. سونداي-اق, كىتاپحانا مەن مەديتسينالىق كابينەتپەن جابدىقتالعان. ءتىپتى ينكليۋزيالى ءبىلىم الاتىن بالالارعا جەدەل ساتىمەن قامتاماسىز ەتىلگەن.
زاماناۋي جابدىقتالعان سىنىپتار, كەڭ سپورت زالى, پاندىك كابينەتتەر – وقۋشىلاردىڭ ساپالى ءبىلىم الۋىنا بارلىق جاعداي جاسالعانىنىڭ ايعاعى.
ايتا كەتەيىك, مەملەكەت باسشىسىنىڭ تاپسىرماسىمەن تۇركىستان وبلىسىندا بارلىعى 29 «كەلەشەك مەكتەبى» سالىنىپ جاتىر. وتكەن جىلى 13 مەكتەپ پايدالانۋعا بەرىلسە, بيىلعى جاڭا وقۋ جىلىندا تاعى 10 مەكتەپ اشىلدى. جىل سوڭىنا دەيىن 6 كەلەشەك مەكتەپ بالالار يگىلىگىنە بەرىلەدى.