قر اۋىل شارۋاشىلىعى مينيسترلىگىنىڭ مالىمەتىنشە, اگروونەركاسىپتىك كەشەندە بارلىق تۇردەگى سۋبسيديالار بويىنشا بەرەشەك 341,3 ملرد تەڭگەنى قۇرايدى, ونىڭ 152,2 ملرد تەڭگەسى نەسيەلەر بويىنشا پايىزدىق مولشەرلەمەلەردى سۋبسيديالاۋعا تيەسىلى, دەپ حابارلايدى Egemen.kz.
بەرەشەك بارلىق وڭىرلەردە بار. ەڭ كوبى اقمولا, قوستاناي جانە سولتۇستىك قازاقستان وبلىستارىندا تىركەلگەن, جيىنى 173,7 ملرد تەڭگە, بۇل جالپى سومانىڭ 51%-ىن قۇرايدى.
دەگەنمەن, سۋبسيديالار بويىنشا بەرەشەك بىرتىندەپ ازايىپ كەلەدى, تەك بيىلدىڭ وزىندە 148,5 ملرد تەڭگە قارىز وتەلدى.
«اگروونەركاسىپتىك كەشەندى جانە اۋىلدىق اۋماقتاردى مەملەكەتتىك رەتتەۋ تۋرالى» قر زاڭىنا سايكەس, سۋبسيديالاردى تولەۋ جەرگىلىكتى اتقارۋشى ورگاندار ارقىلى جۇزەگە اسىرىلادى.
2023 جىلدان باستاپ اگرارلىق سەكتوردى سۋبسيديالاۋعا ارنالعان بارلىق شىعىستار جالپى سيپاتتاعى ترانسفەرتتەر تۋرالى زاڭ اياسىندا جەرگىلىكتى بيۋدجەتتەرگە جۇكتەلگەن.
بيىل جەرگىلىكتى بيۋدجەتتەردە اگروونەركاسىپتىك كەشەندى سۋبسيديالاۋعا 433,6 ملرد تەڭگە قاراستىرىلعان, ونىڭ ءبىر بولىگى وتكەن جىلدارداعى «كۇتۋ تىزىمدەرى» بويىنشا بەرەشەكتى وتەۋگە باعىتتالادى.
اۋىل شارۋاشىلىعى مينيسترلىگى وڭىرلەردىڭ اكىمدىكتەرىنە تولەمدەردى جەدەلدەتۋ ءۇشىن قوسىمشا قاراجات كوزدەرىن تابۋدى, سونىڭ ىشىندە قولدانىستاعى باعدارلامالار شەڭبەرىندە قاراجاتتى قايتا ءبولۋ جانە باسقا دا ىشكى رەزەرۆتەر ەسەبىنەن ۇسىنىپ وتىر.
ۇكىمەت جەرگىلىكتى بيۋدجەتتەردىڭ شەكتەۋلى مۇمكىندىكتەرىن ەسكەرە وتىرىپ, رەسپۋبليكالىق رەزەرۆ قاراجاتى ەسەبىنەن قوسىمشا قولداۋ كورسەتۋدە.
مىسالى, بىلتىر وڭدەۋگە تاپسىرىلعان قانت قىزىلشاسىن سۋبسيديالاۋعا 10 ملرد تەڭگە ءبولىندى.
اعىمداعى جىلى قوسىمشا 57,8 ملرد ءبولىندى, ونىڭ 48,4 ملرد سوماسى تىڭايتقىشتاردىڭ قۇنىن سۋبسيديالاۋعا, ال 9,4 ملرد قانت قىزىلشاسى وندىرۋشىلەرىن قولداۋعا ارنالادى.
اۋىل شارۋاشىلىعى تاۋار وندىرۋشىلەرىنە سۋبسيديا تولەمدەرى جوسپارلى تۇردە جۇرگىزىلۋدە.
مينيسترلىك اكىمدىكتەرىمەن بىرلەسىپ, بەرەشەكتى ازايتۋ جانە سۋبسيديالاۋ تەتىگىنىڭ اشىقتىعىن ارتتىرۋ باعىتىندا جۇيەلى جۇمىس جۇرگىزۋدە.
باستى ماقسات - فەرمەرلەرگە ۋاقىتىلى قولداۋ كورسەتۋ جانە اگروونەركاسىپتىك كەشەننىڭ تۇراقتى دامۋىنا قاجەتتى قارجىلىق جاعداي جاساۋ.
ايتا كەتەيىك, سوڭعى ەكى جىلدا اگرارلىق سالادا اۋىل شارۋاشىلىعى تەحنيكاسىن جەڭىلدەتىلگەن نەسيە جانە ليزينگ ارقىلى الۋ تاجىريبەسى ەنگىزىلدى. بۇل شارۋالارعا تەحنيكا پاركىن جاڭارتۋعا, ونىمدىلىكتى ارتتىرۋعا جانە ءوندىرىس شىعىندارىن تومەندەتۋگە مۇمكىندىك بەرىپ وتىر.
وسىنىڭ بارلىعى سۋبسيديالارمەن قاتار, اگرارلىق سەكتوردىڭ تۇراقتىلىعىن قامتاماسىز ەتىپ, ءارى باسەكەگە قابىلەتىن ارتتىرۋعا ىقپال ەتۋدە.