ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن ەكونوميكالىق ءوسىمدى قامتاماسىز ەتۋ جونىندەگى شتاب وتىرىسىندا وڭدەۋ ونەركاسىبى مەن قۇرىلىس سالاسىنىڭ ديناميكاسى جان-جاقتى قارالدى. توعىز ايدىڭ قورىتىندىسى بويىنشا بۇل باعىتتا ءوسىم قارقىنى جوسپاردان تومەن بولعانى ايتىلدى.
وڭدەۋ ونەركاسىبىندە ماشينا جاساۋ (+14%), حيميا ونەركاسىبى (+9,6%), قۇرىلىس ماتەريالدارىن ءوندىرۋ (+4,7%), جەڭىل ونەركاسىپ (+9,4%), رەزەڭكە مەن پلاستماسسا بۇيىمدارىن شىعارۋ (+6,1%), دايىن مەتالل ونىمدەرىن ءوندىرۋ (+15,2%) سالالارى باسىم ءوسىم كورسەتىپ وتىر.
قاڭتار-قىركۇيەك ايلارىندا وڭدەۋ ونەركاسىبىنىڭ ءوسىمى +6,2% قۇرادى, ال ون ايدىڭ قورىتىندىسى بويىنشا ءوسىم شامامەن +6,3% دەڭگەيىندە بولجاندى. نەگىزگى باياۋلاۋ مەتاللۋرگيا سالاسىندا بايقالادى. ونىڭ ۇلەسى وڭدەۋ ونەركاسىبىنىڭ شامامەن 40%-ىن قۇرايدى. ايتا كەتەيىك, وتكەن جىلى مەتاللۋرگيا كەيىنگى ون جىلداعى ەڭ جوعارى كورسەتكىشكە – 6,9% وسىمگە قول جەتكىزگەن بولاتىن, بۇل بيىلعى جىلعا جوعارى بازا قالىپتاستىردى. شتاب وتىرىسىندا باياۋلاۋدىڭ سەبەپتەرى جان-جاقتى تالدانىپ, سالانىڭ ءوسۋىن جەدەلدەتۋ شارالارى تالقىلاندى.
قارا مەتاللۋرگياداعى باسەڭدەۋ نەگىزىنەن فەرروقورىتپا مەن بولات ءوندىرۋدىڭ ازايۋىنا بايلانىستى. بەس فەرروقورىتپا زاۋىتىنىڭ تورتەۋى بيىل ەلەكتر ەنەرگياسى تاريفتەرىنىڭ كوتەرىلۋىنە بايلانىستى ءوندىرىس كولەمىن قىسقارتقان. اسىرەسە قاراعاندى وبلىسىنداعى كاسىپورىنداردا ءونىم كولەمى ازايعان, بۇل ءوڭىردىڭ جالپى وڭىرلىك ونىمىندە 0,9% ۇلەسكە يە. سونداي-اق سالاداعى بىرقاتار كاسىپورىندا جۇرگىزىلگەن جوسپارلى كۇردەلى جوندەۋ جۇمىستارى دا ءوز اسەرىن تيگىزدى.
ءتۇستى مەتاللۋرگيادا ءوسىم قارقىنىنىڭ تومەندەۋى ۆاسيلكوۆ كەن ورنىندا شاحتالىق ادىسكە كوشۋ مەن قورلاردىڭ سارقىلۋىمەن بايلانىستى. سەرىك جۇمانعارين ەنەرگەتيكا مينيسترلىگىنە قىسقا مەرزىم ىشىندە قولدانىستاعى قۇجاتتارعا وزگەرىستەر ەنگىزۋ مۇمكىندىگىن پىسىقتاپ, فەرروقورىتپا زاۋىتتارىنا تومەندەتىلگەن تاريف بويىنشا ەلەكتر ەنەرگياسىن بەرۋدى قاراستىرۋدى تاپسىردى.
توعىز ايدىڭ قورىتىندىسى بويىنشا ماشينا جاساۋ سالاسى 14% ءوسىم كورسەتتى. سالاعا جاڭا سەرپىن «Astana Motors Manufacturing Kazakhstan» زاۋىتىندا جەڭىل اۆتوكولىك ءوندىرىسىنىڭ ىسكە قوسىلۋى ارقىلى بەرىلمەك. حيميا ونەركاسىبى دە تۇراقتى ءوسىمىن ساقتاپ وتىر – 9,6%. بۇل ءوسىم امموفوس (+55,4%), اممياك سەليتراسى (+14,5%), ناتري ءتسيانيدى (+5,4%), پوليپروپيلەن (+50,5%), سارى فوسفور (+12,6%) مەن كۇكىرت قىشقىلى (+7,3%) ءوندىرىسىنىڭ ارتۋى ەسەبىنەن قامتاماسىز ەتىلدى.
بيىل قۇرىلىس جۇمىستارىنىڭ ەڭ ۇلكەن ۇلەسى كولىك ينفراقۇرىلىمىنا تيەسىلى – 21,3% (جولدار مەن اۆتوماگيسترالدار, تەمىرجول جانە مەترو, كوپىرلەر مەن توننەلدەر قۇرىلىسى). ونەركاسىپتىك نىساندار ۇلەسى – 20,5% (سۋمەن قامتۋ, كارىز جۇيەلەرى مەن تۇرعىن ءۇي قۇرىلىسى). گاز قۇبىرلارى, ەلەكتر بەرۋ جەلىلەرى مەن جىلۋ جەلىلەرىن سالۋ جوبالارى شامامەن 5,6%-دى قۇرايدى. سالا ءوسىمىنىڭ قارقىنى جوعارى دەڭگەيدە ساقتالىپ وتىر. ال توعىز ايدا +14,9%, ون ايدىڭ قورىتىندىسى بويىنشا +15,2% كۇتىلۋدە.
سەرىك جۇمانعارين توعىز اي قورىتىندىسى بويىنشا قۇرىلىس قارقىنى تومەندەگەن وڭىرلەردىڭ وبلىس اكىمى ورىنباسارلارىنىڭ بايانداماسىن تىڭداپ, ءاربىر ونەركاسىپ نىسانى مەن قۇرىلىستى تۇراقتى باقىلاۋدا ۇستاۋدى تاپسىردى. قيىندىقتار تۋىنداعان جاعدايدا, ماسەلە جەدەل تۇردە شتابتىڭ قاراۋىنا شىعارىلۋعا ءتيىس دەدى.