قوستاناي قالاسىنىڭ №2 سوتىندا ءىرى كولەمدە پارا الۋعا وقتالدى دەپ ايىپتالعان ۋ. ەسىمدى ازاماتقا قاتىستى قىلمىستىق ءىس قارالدى. ءىس جەدەلدەتىلگەن سوتقا دەيىنگى تەرگەۋ تارتىبىمەن قىسقارتىلعان ءىس جۇرگىزۋ شەڭبەرىندە قارالدى, دەپ حابارلايدى Egemen.kz.
سوت دەرەگىنشە, 2025 جىلدىڭ قاڭتارىنان قىركۇيەگىنە دەيىن رۋدنىي قالاسىنىڭ پروكۋرورىنىڭ باستاماسىمەن قالا قۇرىلىس بولىمىندە قىزمەتكەرلەرگە نەگىزسىز تولەمدەر جاسالعانى بويىنشا تەكسەرىس جۇرگىزىلگەن. سول ۋاقىتتا ۋ. پارا الۋ ماقساتىندا قىلمىس جاساۋدى كوزدەپ, مەملەكەتتىك مەكەمە باسشىسىنىڭ مىندەتىن اتقارۋشىدان تەكسەرۋدى توقتاتۋ جانە قىلمىستىق قۋدالاۋدان بوساتۋ ءۇشىن 20 ملن تەڭگە تالاپ ەتكەن. ول اقشا الۋ كەزىندە قۇقىق قورعاۋ ورگاندارىنىڭ قىزمەتكەرلەرى تاراپىنان قولما-قول ۇستالعان.
سوتتاعى ءجارىسسوز بارىسىندا تاراپتاردىڭ ۇستانىمدارى قاراما-قايشى بولدى: مەملەكەتتىك ايىپتاۋشى ايىپتالۋشىعا 4 جىل 6 اي باس بوستاندىعىنان ايىرۋ جازاسىن سۇرادى, ال ايىپتالۋشى مەن ونىڭ قورعاۋشىلارى ايىپپۇلمەن شەكتەلۋدى ءوتىندى. زاڭ بويىنشا بۇل قىلمىس ءۇشىن ءىرى ايىپپۇل نە 12 جىلعا دەيىن باس بوستاندىعىنان ايىرۋ جازاسى قاراستىرىلعان. الايدا ءىس جەدەلدەتىلگەن تەرگەۋ تارتىبىمەن قارالعاندىقتان, ەڭ جوعارعى جازا 4 جىل 6 اي بولىپ شەكتەلدى.
سوت ايىپتالۋشىنىڭ جەكە باسىن, قىلمىستىڭ سيپاتىن جانە قوعامدىق قاۋىپتىلىك دارەجەسىن ەسكەرە وتىرىپ, 4 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى. سونداي-اق ول مەملەكەتتىك قىزمەتتە جۇمىس ىستەۋ قۇقىعىنان ءومىر بويىنا ايىرىلدى جانە «ادىلەتتىڭ اعا كەڭەسشىسى» سىنىپتىق شەنىنەن ايىرىلدى.
ۇكىم ءالى زاڭدى كۇشىنە ەنگەن جوق.