قازاقستان جازۋشىلار وداعى مەن زەينوللا سانىك اتىنداعى مادەنيەت قورىنىڭ ۇيىمداستىرۋىمەن جازۋشى, ەتنوگراف-عالىم زەينوللا سانىكتىڭ 90 جىلدىق مەرەيتويىنا ارنالعان «اتا ءداستۇر, اسىل ءسوز» اتتى ادەبي-سازدى كەش ءوتتى, دەپ جازادى Egemen.kz.
ادەبي-سازدى كەشكە قالا تۇرعىندارى, زيالى قاۋىم وكىلدەرى, قالامگەرلەر, عالىمدار مەن جاستار قاتىستى.
كەش شىمىلدىعىن قازاقستان جازۋشىلار وداعىنىڭ باسقارما توراعاسى, ۇلتتىق قۇرىلتاي مۇشەسى, جازۋشى مەرەكە ابدەش ۇلى قۇلكەنوۆ اشىپ بەرىپ, شارانىڭ ءمان-ماڭىزىنا توقتالدى.
«بۇگىن ءبىز قازاق ەتنوگرافياسىنىڭ ەڭسەلى تۇلعاسى, قالامى مەن عۇمىرىن حالقىمىزدىڭ بولمىسىن تانىپ-بىلۋگە ارناعان جازۋشى-ەتنوگراف زەينوللا سانىكتىڭ 90 جىلدىق مەرەيتويىنا ارنالعان سالتاناتتى جيىندا باس قوسىپ وتىرمىز. بۇل – ءبىر ادامنىڭ عانا مەرەيتويى ەمەس, بۇل – تۇتاس ۇلت رۋحانياتىنا جانە ونى قىزعىشتاي قورعاپ, كوزىنىڭ قاراشىعىنداي ساقتاعان جاندارعا تاعزىم ەتۋ. زەينوللا سانىك – حالقىمىزدىڭ كونەدەن جەتكەن مادەني, رۋحاني قازىنالارىن جيناقتاپ, جۇيەلەپ, عىلىمي تۇرعىدا سارالاعان, سونىمەن بىرگە كوركەم ءسوزدىڭ قۇدىرەتىن ەتنوگرافيالىق تانىممەن ۇشتاستىرعان تۇلعا. ول – ءداستۇر مەن ادەبيەتتىڭ, تاريح پەن تاعىلىمنىڭ توعىسقان تۇسىنداعى كوپىر. ونىڭ شىعارمالارى – حالقىمىزدىڭ تۇرمىس-تىرشىلىگى مەن دۇنيەتانىمىنىڭ شەجىرەسى, ۇلت مىنەزىن, سالت-ساناسىن تانىتاتىن اينا. ول جازعان «قازاقتىڭ تۇرمىس-سالت بىلىمدەرى», «تابيعات ءتالىمى», «دالا مادەنيەتى تۋرالى تولعانىستار», «قازاق ەتنوگرافياسى» سىندى ەڭبەكتەر – تەك ەتنوگرافيالىق تۋىندى عانا ەمەس, ۇلت بولمىسىن ۇرپاق ساناسىنا سىڭىرەر تاعىلىمدى مەكتەپ»,- دەپ اتاپ ءوتتى مەرەكە قۇلكەنوۆ.