الماتى – قىزىلوردا اراسىنداعى 1200 شاقىرىمدىق كۇرە جول بويىن تۇرمىستىق قالدىقتاردان تازارتۋ ماقساتىندا جولعا شىققان «تازا قازاقستان» road-ەستافەتاسى جولاي وڭتۇستىك وڭىردەگى بىرنەشە قالا مەن اۋداندا تازالىق شارالارىن جۇرگىزىپ, حالىقپەن كەزدەسۋ ۇيىمداستىرا وتىرىپ قىزىلورداعا جەتتى.
ەستافەتا قۇرامىندا ماجىلىستەگى «Amanat» پارتياسى فراكتسياسىنىڭ مۇشەلەرى, پارتيا جانىنداعى «جاستار رۋحى» جاستار قاناتىنىڭ وكىلدەرى, وبلىستىق, اۋداندىق ءماسليحات دەپۋتاتتارى, ەكوبلوگەرلەر, ەرىكتىلەر بار.
جاڭاقورعانعا ايالداعان توپ مۇشەلەرى رەسپۋبليكالىق ماڭىزى بار اۆتوجول بويىمەن قاتار, «ۆانداليزمگە جول جوق!» اكتسياسى اياسىندا سان عاسىردىڭ كۋاگەرى سىعاناق قالاشىعىنىڭ اينالاسىن تازارتتى. كورشىلەس شيەلى اۋدانىندا ءماجىلىس دەپۋتاتتارى ارنايى قابىلداۋ وتكىزىپ, «جاستار رۋحى» جاستار قاناتىنىڭ توراعاسى اقەركە ەسكەندىروۆا جاستارمەن پىكىر الماستى. قابىلداۋلار مەن كەزدەسۋلەر بارىسىندا اۋدان تۇرعىندارىنىڭ سۇراقتارىنا ناقتى جاۋاپ بەرىلدى. ءماجىلىس دەپۋتاتى مۇرات ابەنوۆ شيەلىدەگى قابىلداۋدا جاستار تاراپىنان ۇتىمدى ۇسىنىستار ايتىلعانىن اتاپ ءوتتى. الماتى وبلىسىنان باستاۋ العان اكتسياعا قاتىسۋشىلار 4 وبلىس, 1 قالا, 15 اۋدان اۋماعىنا تازالىق جۇرگىزىپ, 10 مىڭ توننادان استام قوقىستى قايتا وڭدەۋگە جونەلتتى.
«تازا قازاقستان» ارقايسىمىزدان باستالادى. سوندىقتان تۇرعىندارعا, جاستارعا قوقىس جيناۋ عانا ەمەس, سونىمەن قاتار ەكولوگيالىق مادەنيەتتى قالىپتاستىرۋ, سۋدى ۇنەمدەۋ, قوقىستى سۇرىپتاۋ ماسەلەلەرىن تۇسىندىردىك», دەيدى ەستافەتا مۇشەلەرى.
قىزىلورداداعى اكتسيانى قورىتىندىلاۋ شاراسىنا قالا اكىمى نۇرجان احاتوۆ, «Amanat» پارتياسى قىزىلوردا وبلىستىق فيليالىنىڭ اتقارۋشى حاتشىسى ءلايلا تورەشوۆا, پارتيانىڭ وبلىستىق فيليالى جانىنداعى ەكولوگيالىق كەڭەس توراعاسى جورابەك نۇرىمبەتوۆ, ەڭبەك ارداگەرلەرى قاتىسىپ, ورتاق ىسكە ۇلەس قوسقاندارعا ريزاشىلىعىن ءبىلدىردى.
قىزىلوردا