جاقىندا قىتايدا ارنايى ءبىلىمى جوق بلوگەرلەرگە قارجى, مەديتسينا, زاڭ جانە ءبىلىم سالالارىنا قاتىستى كونتەنت جاساۋعا تىيىم سالىندى.
تالاپتى ورىنداماعاندار قوماقتى ايىپپۇل تولەپ, اككاۋنتتارى ءبىرجولا بۇعاتتالۋى مۇمكىن. مۇنداعى ماقسات – الەۋمەتتىك جەلىلەردە جالعان اقپاراتتىڭ تاراۋىن توقتاتىپ, ازاماتتاردى زياندى كەڭەستەردەن قورعاۋ. ەندى وسى باعىتتاردا جازبا جاريالاۋ ءۇشىن بلوگەرلەر ءتيىستى ديپلوم نەمەسە كاسىبي ليتسەنزيا ۇسىنۋى ءتيىس. Douyin, Bilibili جانە Weibo سياقتى پلاتفورمالار اۆتورلاردىڭ بىلىكتىلىگىن تەكسەرىپ, جاريالانعان ماتەريالدارداعى دەرەككوزدەردىڭ دۇرىستىعىن باقىلاماق.