AI-Sana Leaders باعدارلاماسىنىڭ جەڭىمپازدارى انىقتالدى

AI-Sana Ceremony ءبىلىم بەرۋ جۇيەسىنە جاساندى ينتەللەكت تەحنولوگيالارىن ەنگىزۋ جانە تسيفرلىق قۇزىرەتتەردى دامىتۋدى كوزدەيدى. قاتىسۋشىلاردى پرەزيدەنتىنىڭ كومەكشىسى قۋانىشبەك ەسەكەەۆ قۇتتىقتاپ, AI-Sana باستاماسىنىڭ جاڭا بۋىننىڭ زياتكەرلىك ەكوجۇيەسىن قالىپتاستىرۋداعى ماڭىزدىلىعىن اتاپ ءوتتى.

«وتكەن جىلى جەلتوقسان ايىندا پرەزيدەنت قاسىم-جومارت كەمەل ۇلى AI-Sana باعدارلاماسىن ازىرلەۋدى تاپسىرعان بولاتىن. ارادا از عانا ۋاقىت ءوتىپ, بۇگىن بازالىق كۋرس ناتيجەلەرى بويىنشا باعدارلامانىڭ العاشقى ناتيجەسىن كورىپ وتىرمىز. ۇكىمەتتىڭ, مينيسترلىكتىڭ, ۋنيۆەرسيتەتتەردىڭ, ستۋدەنتتەردىڭ جانە باعدارلاما سەرىكتەستەرىنىڭ بىرلەسكەن كۇش-جىگەرىنىڭ ارقاسىندا ءبىز جوعارى وقۋ ورىندارىندا جاساندى ينتەللەكتىنى دامىتۋ ەكوجۇيەسىنىڭ نەگىزىن قالاپ, جاستاردىڭ الەۋەتىن اشۋعا جاعداي جاسادىق. وسى جىلدىڭ ىشىندە ستۋدەنتتەرىمىز ۇلكەن جولدان ءوتتى. ولاردىڭ جوبالارى تسيفرلىق فورۋمدار مەن كورمەلەردەن باستاپ پارلامەنت وتىرىستارىنا, سونداي-اق پرەزيدەنتپەن كەزدەسۋلەرگە دەيىن ءتۇرلى الاڭداردا تانىستىرىلدى. بۇگىن ءبىز العاش رەت ۇزدىكتەردى – AI-Sana Leaders باعدارلاماسىنىڭ جەڭىمپازدارىن رەسمي تۇردە ماراپاتتاۋ ءۇشىن جينالدىق. ولاردىڭ جوبالارى مەديتسينا مەن ءبىلىم بەرۋدەن باستاپ ونەركاسىپ پەن قاۋىپسىزدىككە دەيىنگى ءتۇرلى سالالاردى قامتيدى. ستۋدەنتتىك شەشىمدەر بۇگىندە ەكونوميكانىڭ جانە الەۋمەتتىك سالانىڭ ءارتۇرلى باعىتتارىندا قولدانىلىپ جاتىر. بۇل – العاشقى قادامدار, الدا – جاڭا بەلەستەر, جاڭا يدەيالار جانە جاڭا جەڭىستەر», دەدى قۋانىشبەك باقىتبەك ۇلى.

AI-Sana Ceremony شاراسى اياسىندا ەلىمىزدىڭ جوعارى وقۋ ورىندارى اراسىندا ۇزدىك جاساندى ينتەللەكت جوبالارىنىڭ اۆتورلارى ماراپاتتالدى.

«AI – Sana Leader», ء«بىلىم بەرۋدەگى ۇزدىك جي جوباسى – اكادەميالىق ادالدىق», «سالاداعى ۇزدىك شەشىم», «ەنەرگەتيكا سالاسىنداعى ۇزدىك جي جوباسى», «دەنساۋلىق ساقتاۋ سالاسىنداعى ۇزدىك جي جوباسى», «مانساپتىق تراەكتوريالاردى قۇرۋعا ارنالعان جي», «مادەنيەت سالاسىنداعى ۇزدىك جي جوباسى», «ونەركاسىپتەگى ۇزدىك جي جوباسى», «قوعام يگىلىگى ءۇشىن: جىلدىڭ الەۋمەتتىك باستاماسى», «بيومەديتسينا سالاسىنداعى ۇزدىك جي جوباسى», «ينكليۋزيۆتى جي تەحنولوگيالارى» جانە باسقا دا اتالىمدار بويىنشا جەڭىمپازدار انىقتالدى. شارا اياسىندا قاتىسۋشىلار جاساندى ينتەللەكت سالاسىنداعى جوبالار تانىستىرىلعان جي شەشىمدەر كورمەسىن تاماشالادى.

فورۋم قاتىسۋشىلارىنا ستەنفورد ۋنيۆەرسيتەتىنىڭ پروفەسسورى, دۇنيەجۇزىلىك بانك جانىنداعى حالىقارالىق ساراپتامالىق كەڭەستىڭ توراعاسى پول كيم بەينەقۇتتىقتاۋ جولدادى. ول قازاقستاننىڭ تسيفرلاندىرۋ سالاسىنداعى ايتارلىقتاي جەتىستىكتەرىن اتاپ ءوتىپ, عىلىم جانە جوعارى ءبىلىم مينيسترلىگىمەن ىنتىماقتاستىقتى نىعايتۋعا دايىن ەكەنىن جەتكىزدى. ونىڭ ايتۋىنشا, الداعى التى جىلدا AI-Sana جوباسى جاساندى ينتەللەكت پەن كاسىپكەرلىك داعدىلارى بويىنشا جۇزدەگەن مىڭ ستۋدەنتتى وقىتۋعا مۇمكىندىك بەرەدى.

عىلىم جانە جوعارى ءبىلىم ءمينيسترى ساياسات نۇربەك اتاپ وتكەندەي, AI-Sana باستاماسى تەك زاماناۋي تەحنولوگيالاردى يگەرۋگە عانا ەمەس, ۋنيۆەرسيتەتتەردە جاڭا ويلاۋ مادەنيەتىن قالىپتاستىرۋعا باعىتتالعان.

 «بۇگىندە 549 مىڭ ستۋدەنت جاساندى ينتەللەكت پەن جي باسقارۋ كۋرستارىنان ءوتتى, ال باعدارلاما سوڭىنا دەيىن 650 مىڭ ءبىلىم الۋشىنى قامتۋ جوسپارلانىپ وتىر. جىل باسىندا ىسكە قوسىلعان دايىندىق كەزەڭىندە 390 مىڭ سەرتيفيكات بەرىلگەن. AI-Sana – بۇل جاي عانا ءبىلىم بەرۋ باعدارلاماسى ەمەس, ستارتاپتار قۇرۋعا, جاساندى ينتەللەكتىنى كاسىبي قىزمەتكە ەنگىزۋگە جانە سالالاردىڭ تەحنولوگيالىق دامۋىن جەدەلدەتۋگە قابىلەتتى جاڭا بۋىندى قالىپتاستىراتىن قوزعالىس», دەدى مينيستر.

Huawei كومپانياسى جاساندى ينتەللەكتكە ارنالعان كۋرستاردى جەرگىلىكتەندىرىپ, ولاردى 175 مىڭ ستۋدەنت اياقتاپ, 250 مىڭنان استام سەرتيفيكات يەلەندى. Coursera ءبىلىم بەرۋ پلاتفورماسى 95 قازاقستاندىق جوعارى وقۋ ورنىنا ارنالعان 37 مىڭ ليتسەنزيا ۇسىندى. ناتيجەسىندە ستۋدەنتتەر 59 مىڭ سەرتيفيكات الىپ, قازاقستان Coursera Awards حالىقارالىق سىيلىعىنىڭ فيناليستەرى قاتارىنا ەندى.

سونىمەن قاتار شارا بارىسىندا «عىلىم قورى» اق مەن «Platonus» جشس اراسىندا AI-Sana Academy پلاتفورماسىن ىسكە اسىرۋ جونىندەگى ىنتىماقتاستىق تۋرالى مەموراندۋمعا قول قويىلدى.