«باتىس ەۋروپا–باتىس قىتاي» حالىقارالىق كولىك ءدالىزىنىڭ رەسەي فەدەراتسياسى شەكاراسىنا تىرەلەتىن «اقتوبە – مارتوك» تاسجولىنىڭ 51–84 جانە 95–99 شاقىرىمىن جوندەۋ اياقتالدى. بيىلعى مامىردا «اسسانا دور ستروي» جشس ماماندارى ىسكە كىرىسىپ, قارا سۋىققا قالدىرماي تاپسىرمانى ۋاقتىلى ورىندادى.
وسى بولىكتەگى ورتاشا جوندەۋ جۇمىستارىنا 2,3 ملرد تەڭگە مەملەكەت قارجىسى جۇمسالدى. «قازاۆتوجول» ۇلتتىق كومپانياسى اقتوبە وبلىستىق فيليالى ديرەكتورىنىڭ ورىنباسارى رينات ورازعاليەۆتىڭ ايتۋىنشا, ەكىنشى ساناتتاعى «اقتوبە–مارتوك» تاسجولىنا 2013 جىلى قايتا جاراقتاندىرۋ جۇرگىزىلگەننەن بەرى ونىڭ ساپاسىنا شاعىم بولعان جوق. جولدىڭ ساپالى بولعانىنا قاراماستان, بيىلعى جىلى بۇزىلا باستاعان 34 شاقىرىمىن ەكى تۇسىنان قايتا جوندەۋگە شەشىم قابىلداندى. ونىڭ ءبىرىنشى بولىگى قازاقستان–رەسەي شەكاراسىنداعى «جايساڭ» وتكىزۋ بەكەتىنە دەيىنگى 4 شاقىرىم جول. وسى تۇسقا ەكى قاباتتى اسفالت-بەتون جامىلعى توسەلدى. ال تاسجولدىڭ 54–84 شاقىرىمى ارالىعىندا, ياعني كەڭساحارا مەن ۆوزنەسەنوۆكا اۋىلدارى تۇسىنداعى تاسجولدىڭ بەتكى قاباتى قىرىلىپ الىنىپ, قيىرشىق تاس توسەلىپ, ءاسفالتتى-بەتوندى قوسپامەن قايتا بەكىتىلدى. تاسجولدىڭ ەنى كەڭەيتىلگەن جوق.
«رەسەيدىڭ ورىنبور وبلىسى باعىتىنا قاراي «اقتوبە–مارتوك» تاسجولىنىڭ بويىمەن تاۋلىگىنە جۇرەتىن 7 مىڭ كولىكتىڭ 1 800-ءى اۋىر جۇك كولىكتەرى. ەلىمىزدەگى كولىك قوزعالىسىن رەتتەيتىن سوڭعى زاڭناماداعى وزگەرىستەر بويىنشا رەسپۋبليكالىق ماڭىزى بار تاسجولداردىڭ كەيبىر بولىكتەرىندە اۋىر جۇك كولىكتەرىنەن تولەماقى تالاپ ەتىلەدى. ماسەلەن, اقتوبە وبلىسى اۋماعىندا «اقتوبە–مارتوك» تاسجولى مەن «اقتوبە–اتىراۋ» اۆتوكولىك جولىنىڭ «قاندىاعاش–ماقات» ارالىعىنان سالماعى اۋىر كولىكتەر تەگىن جۇرە المايدى. وسى جولدارداعى تولەماقى اۋىر جۇك كولىكتەرىنىڭ سالماعى مەن اۆتوبۋستاردىڭ سىيىمدىلىعىنا بايلانىستى. ماسەلەن, سالماعى 2,5 توننالىق اۋىر جۇك كولىگى مەن 16 ورىندىق اۆتوبۋس ءۇشىن 17–60 شاقىرىم ارالىعىنا 310 تەڭگە بەكىتىلگەن. جۇرگىزۋشى جولعا شىقپاستان بۇرىن الدىن الا تولەم جۇرگىزگەن جاعدايدا ونىڭ باعاسى 270 تەڭگەگە تومەن. كولىكاقى قىستا جولداردى كۇتىپ ۇستاۋعا, جاڭا تەحنيكالار ساتىپ الۋعا جۇمسالادى», دەيدى رينات ورازعاليەۆ.
جول اكتيۆتەرى ساپاسى ۇلتتىق ورتالىعى اقتوبە فيليالىنىڭ ينجەنەرى نۇرداۋلەت تۇمەنوۆتىڭ ايتۋىنشا, جوندەۋ جۇمىستارى كەزىندە جولدىڭ 53 جەرىنەن سىنامالار الىپ, ماتەريالدار ساپاسى تەكسەرىلگەن. ء«بىزدىڭ فيليال ماماندارى جولعا توسەيتىن اسفالت قۇرامىن, قيىرشىق تاس, بيتۋم ساپاسىن تەكسەرىپ قانا قويماي, بەتكى قاباتتارىنىڭ تەگىستىگىن, كولبەۋلىگىن دە باقىلاپ تۇردى. ساپاسىز تۇستارى انىقتالعاندا ەسكەرتۋ جاسادىق. بىردەن قايتا تۇزەتىلدى. 100 شاقىرىمنان اساتىن «اقتوبە–مارتوك» تاسجولى 2013 جىلى سالىنعالى بەرى جوندەۋ كورمەسە دە, وسى كەزگە دەيىن شىداس بەرىپ كەلدى. اسا قاتتى ب ۇلىنۋلەر دە بايقالمايدى.
اقتوبە وبلىسىندا جاڭادان سالىنعان جول ساپاسىز بولىپ جاتسا, وعان مەردىگەر تىكەلەي جاۋاپتى. ساپاسىز, ارزان ماتەريالداردى توسەگەندىكتەن جوندەلگەن جول بولىكتەرى تەز بۇزىلادى. كولىك قاتىناسى وتە تىعىز رەسپۋبليكالىق ماڭىزى بار تاسجولداردى جوندەۋ كەزىندە ساپالى بيتۋمداردى پايدالانۋ كەرەك. وسى جىلى اپاتتى جاعدايلار كوپ بولاتىن, كولىك جۇرگىزۋشىلەرىنىڭ نارازىلىعىن تۋعىزىپ جۇرگەن «اقتوبە – حرومتاۋ» تاسجولىنىڭ 28 شاقىرىمى كەڭەيتىلىپ, قايتا سالىنىپ جاتىر. جول اكتيۆتەرى ساپاسى ۇلتتىق ورتالىعى فيليالىنىڭ ماماندارى وسى بولىكتەگى جوندەۋ جۇمىستارىن باقىلاۋدا ۇستاپ وتىر», دەيدى نۇرداۋلەت تۇمەنوۆ.
اقتوبە وبلىسى