24 قازان كۇنى شامامەن ساعات 12:35-تە الماتىنىڭ جەتىسۋ اۋدانىنداعى باراحولكا ماڭىندا جولاۋشىلار اۆتوبۋسى جول اپاتىنا ۇشىرادى. الەۋمەتتىك جەلىلەردە تاراعان بەينەجازبالاردا اۆتوبۋستىڭ ايالداماعا سوعىلعان ءساتى كورىنىس تاپقان, دەپ حابارلايدى Egemen.kz.
قالالىق پوليتسيا دەپارتامەنتىنىڭ مالىمەتىنشە, Yutong ماركالى اۆتوبۋستىڭ جۇرگىزۋشىسى سولتۇستىك اينالىم كوشەسىمەن كەلە جاتىپ, كولىكتى باسقارۋعا يە بولا الماعان, ناتيجەسىندە اۆتوبۋس بورديۋرگە سوعىلىپ, كەيىن ايالداماعا كىرىپ كەتكەن. سول مەزەتتە ايالدامادا تۇرعان جاياۋ جۇرگىنشىنى قاعىپ وتكەن.
جول اپاتى كەزىندە ايالداماداعى ادام مەن اۆتوبۋستىڭ ءبىر جولاۋشىسى ءتۇرلى جاراقات الىپ, دارىگەرلەردىڭ كومەگىنە جۇگىنگەن. قازىر وقيعانىڭ سەبەپتەرى مەن ءمان-جايى انىقتالىپ جاتىر.