كوكشەتاۋ قالاسىندا ۇلتتىق ۇلاننىڭ «ورتالىق» وڭىرلىك قولباسشىلىعىنا قاراستى 5510 اسكەري بولىمىندە جاڭا زاماناۋي كازارما پايدالانۋعا بەرىلدى, دەپ جازادى Egemen.kz.
سالتاناتتى ءىس-شاراعا ىشكى ىستەر ءمينيسترىنىڭ ورىنباسارى, ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ پەن اقمولا وبلىسىنىڭ اكىمى مارات احمەتجانوۆ قاتىستى.
ۇلتتىق ۇلاننىڭ رەسمي وكىلى الىبەك ابدىلوۆتىڭ ايتۋىنشا, جاڭا نىساننىڭ اشىلۋى — مەملەكەتتىڭ قۇقىقتىق ءتارتىپتى نىعايتۋعا, ازاماتتاردىڭ قاۋىپسىزدىگىن قامتاماسىز ەتۋگە ءارى اسكەري قىزمەتشىلەرگە جايلى جاعداي جاساۋعا باعىتتالعان «زاڭ جانە ءتارتىپ» تۇجىرىمداماسىنىڭ ناقتى ناتيجەسى.
جاڭا كازارما ءبىر باتالونعا ارنالعان جانە قازىرگى زامان تالاپتارىنا تولىق ساي جابدىقتالعان. مۇندا دەمالۋ, وقۋ, سپورتپەن اينالىسۋ جانە پسيحولوگيالىق قولداۋ الۋ ءۇشىن بارلىق جاعداي جاسالعان.
عيمارات اقمولا وبلىسى اكىمدىگىنىڭ قولداۋىمەن سالىندى. بۇل ءوڭىر اكىمدىگى مەن ۇلتتىق ۇلان اراسىنداعى الەۋمەتتىك جانە ينفراقۇرىلىمدىق ماسەلەلەردى شەشۋدەگى ءوزارا تىعىز ىنتىماقتاستىقتىڭ جەمىسى.
كازارمادا اسكەري قىزمەتشىلەردىڭ دەنە دايىندىعىن ارتتىرۋعا ارنالعان زاماناۋي سپورت زالى بار. سونداي-اق وقۋ بولمەلەرىندە ينتەراكتيۆتى تاقتالار, LED ەكراندار جانە پسيحولوگيالىق قولداۋ ايماقتارى ورناتىلعان. مۇنىڭ ءبارى وقۋ ۇدەرىسىنىڭ ساپاسىن ارتتىرىپ, ءتارتىپتى كۇشەيتەدى.
5510 اسكەري ءبولىمى ايماقتىڭ قوعامدىق ءتارتىبى مەن تىنىشتىعىن قامتاماسىز ەتۋدە ماڭىزدى ءرول اتقارادى. بۇل باعىتتاعى جۇمىستاردى جەرگىلىكتى بيلىك پەن ۇلتتىق ۇلاننىڭ ءوزارا قولداۋى ودان ءارى نىعايتىپ وتىر.
جاڭا كازارما ۇلاندىقتاردىڭ قىزمەت جاعدايىن جاقسارتىپ قانا قويماي, ەل تىنىشتىعىن كۇزەتكەن جاۋىنگەرلەرگە رۋح پەن سەنىم بەرەدى.