رەسپۋبليكا كۇنى قارساڭىندا ۇلىتاۋ وبلىستىق تاريحي-ارحەولوگيالىق مۋزەيىندە ۇستا, زەرگەر, سۋرەتشى-رەستاۆراتور, قر «مادەنيەت قايراتكەرى» توسبەلگىسىنىڭ يەگەرى, قازاقستان سۋرەتشىلەر وداعىنىڭ جانە ديزاينەرلەر وداعىنىڭ مۇشەسى ەرعازى يساتاەۆتىڭ 60 جاس مەرەيتويىنا ارنالعان شىعارماشىلىق كەش ءوتتى, دەپ حابارلايدى Egemen.kz.
كەش قولونەر شەبەرىنىڭ ۇزاق جىل بويى ۇلتتىق قولونەردى دامىتۋعا قوسقان ەڭبەگىنە ارنالدى. الدىمەن التىن قولدى زەرگەردىڭ ءومىرى مەن شىعارماشىلىعىن ارقاۋ ەتكەن بەينەبايان كورسەتىلدى.
«ۇستا مۇراسى: شەبەرلىك پەن ءداستۇر» اتتى كورمەگە تۋىندىلارى قويىلىپ, كوپشىلىك نازارىنا ۇسىنىلدى.
ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ماعجان تابىلدين كەش يەسىن مەرەيتويمەن قۇتتىقتادى. سونىمەن قاتار مەرەيتوي يەسىنە «Amanat» پارتياسى ۇلىتاۋ وبلىستىق فيليالىنىڭ اتقارۋشى حاتشىسى ەرلان مىرزابەكوۆ, جەزقازعان قالالىق ءماسليحاتىنىڭ توراعاسى راۋشان قاپاروۆا جىلى لەبىزىن ءبىلدىردى.
ەرعازى كەڭەس ۇلىنىڭ شىعارماشىلىعىنا ارنالعان «ۇستا ونەرىنىڭ سان قىرى» اتتى جاڭا كىتاپتىڭ تۇساۋىن قر قولونەرشىلەر وداعىنىڭ مۇشەسى, حالىقارالىق يۋنەسكو ساپا بەلگىسىنىڭ يەگەرى, ۇلتتىق كيىم ديزاينەرى تىلەك سۇلتان جانە قولونەر شەبەرى, قر «مادەنيەت سالاسىنىڭ ۇزدىگى» توسبەلگىسىنىڭ يەگەرى سارباس ءجۇنىسوۆ كەستى.
مەرەيلى جاسقا كەلگەن كەش يەسىنە قر ەڭبەك سىڭىرگەن ءارتىسى سەرىك وسپانوۆ پەن ۇلىتاۋ وبلىستىق فيلارمونياسىنىڭ ءانشىسى ارداق مۇقىشەۆ اننەن شاشۋ شاشتى.
ۇلىتاۋ وبلىستىق تاريحي-ارحەولوگيالىق مۋزەيىنىڭ ديرەكتورى زاعيرا قالمەنوۆا جانە مۋزەي ارداگەرلەرى ءداستۇر جالعاستىعىن دارىپتەپ كەلە جاتقان ەرعازى كەڭەس ۇلىنىڭ ۇلتتىق ونەرگە قوسقان زور ۇلەسىن قۇرمەتپەن اتاپ ءوتىپ, مۋزەي ۇجىمى اتىنان ەستەلىك سىي-سياپات جاسادى.
ۇلىتاۋ وبلىسى