بيىلعى جىلدىڭ العاشقى توعىز ايىنىڭ قورىتىندىسى بويىنشا تەمەكى ونىمدەرىنەن تۇسەتىن اكتسيزدىك تۇسىمدەردىڭ ءوسىم قارقىنى وتكەن جىلدىڭ سايكەس كەزەڭىمەن سالىستىرعاندا 121%-دى قۇرادى. بۇل بيۋدجەتكە قوسىمشا 35,6 ملرد تەڭگە كولەمىندە كىرىس اكەلدى, دەپ حابارلايدى Egemen.kz.
بيىلدىڭ العاشقى بەس ايىنىڭ قورىتىندىسى بويىنشا اكتسيزدىك تۇسىمدەردىڭ ءوسىمى وتكەن جىلدىڭ سايكەس كەزەڭىمەن سالىستىرعاندا 121,7%-دى قۇرادى. بۇل بيۋدجەتكە قوسىمشا 21,4 ملرد تەڭگە ءتۇسىم اكەلدى. تاڭبالاۋ جۇيەسى كولەڭكەلى نارىقپەن كۇرەستە دە جوعارى تيىمدىلىگىن كورسەتتى. بىلتىر 12,8 ملرد تەڭگەدەن استام سوماعا زاڭسىز ساۋدا اينالىمداعى شامامەن 5 ملن قوراپ تەمەكى ءونىمى انىقتالدى. بۇل كورسەتكىش بۇرناعى جىلمەن سالىستىرعاندا 28%-عا جوعارى.
«سونىمەن قاتار, تسيفرلىق تاڭبالاۋ جۇيەسى تاۋار اينالىمىنىڭ تىزبەگىندەگى سايكەسسىزدىكتەردى انىقتاۋعا مۇمكىندىك بەرەدى ءارى سالىق پەن كەدەن ورگاندارىنا قوسىمشا تالدامالىق قۇرالدار ۇسىنادى. جۇيەنى كەزەڭ-كەزەڭىمەن كەڭەيتۋ جۇمىستارى جالعاسۋدا. جاقىن ارادا سىرا جانە سىرا ونىمدەرىن تاڭبالاۋ ەنگىزىلەدى. بۇل نارىقتىڭ تاعى ءبىر ءىرى سەگمەنتىن قامتىپ, ونىڭ تولىق قاداعالانۋىن قامتاماسىز ەتەدى», دەدى قارجى مينيسترلىگى مەملەكەتتىك كىرىستەر كوميتەتىنىڭ سالىقتىق باسقارۋ دەپارتامەنتى ديرەكتورىنىڭ مىندەتىن اتقارۋشى بەكتاس اديلگاليەۆ Digital Tañba فورۋمىندا سويلەگەن سوزىندە.
ەلىمىزدە تەمەكى ونىمدەرىن مىندەتتى تاڭبالاۋ 2020 جىلدىڭ 1 قازانىنان باستاپ ەنگىزىلدى. بۇگىنگى تاڭدا تاڭبالاۋ اقپاراتتىق جۇيەسىندە تەمەكى ونىمدەرىنىڭ اينالىمىنا قاتىسۋشى 55 مىڭنان استام سۋبەكت تىركەلگەن, ال تەمەكى قوراپتارىنا 6,1 ميللياردتان استام تاڭبالاۋ كودى قولدانىلعان.
ايتا كەتەيىك, ءاربىر قازاقستاندىق ءونىمنىڭ تۇپنۇسقالىعىن جانە زاڭدىلىعىن تەكسەرۋ ءۇشىن ورامداعى كودتى Naqty Onim تەگىن ءموبيلدى قوسىمشاسى ارقىلى سكانەرلەي الادى. ەگەر كود جالعان بولىپ شىقسا نەمەسە مۇلدە بولماسا – بۇل جونىندە زاڭبۇزۋشىلىق رەتىندە حابارلاۋعا بولادى.