قوعامدىق كەلىسىم, ازاماتتىق بىرلىك جانە ەتنوسارالىق قارىم-قاتىناستاردى دامىتۋ – مادەنيەت جانە اقپارات مينيسترلىگى قىزمەتىنىڭ باسىم باعىتى. بۇگىندە ەلىمىزدە جۇزدەن استام ەتنوس وكىلدەرى تاتۋلىق پەن كەلىسىم اياسىندا ءومىر ءسۇرىپ جاتىر. ولاردى تەڭ مۇمكىندىكتەرگە نەگىزدەلگەن ءارى تۇراقتى دامۋعا باعىتتالعان ادىلەتتى قازاقستاندى قۇرۋ جونىندەگى ورتاق ماقسات بىرىكتىرەدى.
ەتنوسارالىق ىنتىماقتى نىعايتۋ باعىتىندا ۇزاق جىلدار بويى قالىپتاسقان تاجىريبەنىڭ ارقاسىندا ەلىمىزدە ەتنوسارالىق كەلىسىم جونىندەگى مەملەكەتتىك ساياساتتى ىسكە اسىرۋدىڭ ءتيىمدى ينستيتۋتتىق جۇيەسى قالىپتاستى. بۇل جۇيە ورتالىق مەملەكەتتىك ورگانداردان باستاپ وڭىرلىك قازاقستان حالقى اسسامبلەيالارىنا دەيىن بارلىق دەڭگەيدە جۇمىس ىستەيدى.
مادەنيەت جانە اقپارات مينيسترلىگىنىڭ مالىمەتىنشە, ەتنوسارالىق قاتىناستاردىڭ دامۋ دەڭگەيىن زەردەلەۋ مەن تاجىريبەلىك ۇسىنىمدار ازىرلەۋ ماقساتىندا وڭىرلەردە تۇراقتى تۇردە الەۋمەتتىك زەرتتەۋلەر مەن مونيتورينگتىك ساپارلار ۇيىمداستىرىلىپ كەلەدى. سونىڭ ارقاسىندا بيىلعى دەرەك بويىنشا تۇرعىنداردىڭ 95 پايىزدان استامى ەلدەگى ەتنوسارالىق احۋالدى تۇراقتى ءارى قولايلى دەپ باعالايتىنى انىقتالىپ وتىر.
«2022 جىلعى ساۋىردەن باستاپ كاسىبي ەتنومەدياتورلاردى دايارلاۋ جانە مەدياتسيا ينستيتۋتىن دامىتۋ ماقساتىندا ەتنومەدياتسيا ورتالىعى جۇمىس ىستەيدى. ەتنوسارالىق سالادا ءتۇسىندىرۋ جۇمىستارىن كۇشەيتۋ ءۇشىن رەسپۋبليكالىق اقپاراتتىق-ءتۇسىندىرۋ توبى قۇرىلدى. قازىرگى ۋاقىتتا ەلىمىزدە 80 اقپاراتتىق-ءتۇسىندىرۋ توبى بەلسەندى قىزمەت اتقارىپ جاتىر. قازاقستان حالقى اسسامبلەياسىنىڭ باستاماسىمەن 1000-نان استام ەتنومادەني بىرلەستىك پەن 4000-عا جۋىق قوعامدىق قۇرىلىم بىرىكتىرىلگەن. ولاردىڭ قىزمەتىنە 50 مىڭنان استام ازامات تارتىلعان. قوعامدىق ومىرگە حالىقتى كەڭىنەن جۇمىلدىرۋدا «اقساقالدار كەڭەسى» مەن «انالار كەڭەسى» ماڭىزدى ءرول اتقارادى. وتباسىلىق قۇندىلىقتاردى نىعايتۋ جانە جاستاردى رۋحاني-ادامگەرشىلىك تۇرعىدان تاربيەلەۋگە باعىتتالعان «مادەنيەتتى انا – مادەنيەتتى ۇلت», «ادال ازامات» جانە «سالاۋاتتى سانا» جوبالارى تابىستى جۇزەگە اسىرىلىپ كەلەدى» دەلىنگەن مينيسترلىك مالىمەتىندە.
ايتا كەتەيىك, بيىل العاش رەت الماتى, جامبىل, تۇركىستان جانە جەتىسۋ وبلىستارىندا اۋداندىق دەڭگەيدەگى اسسامبلەيالار قۇرىلعان ەدى. ال «اسسامبلەيا جاستارى» جاستار قاناتى 10 مىڭنان استام جاس وكىلىن بىرىكتىرىپ, مادەنيەتتەر اراسىنداعى ديالوگتى دامىتۋعا باعىتتالعان باستامالاردى ىسكە اسىرادى. جاستار ۇيىمىنىڭ «جاڭا تولقىن», «شكولا ليدەروۆ انك» جانە «50 جاس كوشباسشى» سياقتى جوبالارى تابىستى جۇزەگە اسىپ جاتىر. سونىمەن قاتار ەلىمىزدىڭ جوعارى وقۋ ورىندارىندا ءتۇرلى ەتنوس وكىلدەرىمەن جۇمىس جۇرگىزەتىن ستۋدەنتتىك اسسامبلەيا قۇرىلعان. ول ەتنوسارالىق كەلىسىم مەن ازاماتتىق بىرەگەيلىكتى نىعايتۋعا, سونداي-اق ۆولونتەرلىك قوزعالىس پەن ەتنومەدياتسيا باعىتىن دامىتۋعا ءوز ۇلەسىن قوسىپ ءجۇر.
بۇگىندە ەلىمىزدە 32 دوستىق ءۇيى بار. بيىل قىزىلوردا, اتىراۋ, اباي وبلىستارىندا جاڭا دوستىق ۇيلەرىنىڭ قۇرىلىسى باستالدى. بۇعان قوسا «جومارت جان» قايىرىمدىلىق ورتالىعى, «جەڭىس بىرلىكتە» سپورتتىق الاڭى, «ەلتانۋ» جوباسى بەلسەندى تۇردە دامىپ كەلەدى. جىل باسىنان بەرى «جومارت جان» ورتالىعىنىڭ مەتسەناتتارى 35 مىڭ ازاماتقا 305 ميلليون تەڭگە كولەمىندە كومەك كورسەتتى.
عىلىم مەن ءبىلىمدى دامىتۋ ماقساتىندا جوعارى وقۋ ورىندارىندا اسسامبلەيانىڭ 42 كافەدراسى جۇمىس ىستەيدى. 360 ساراپشىنى بىرىكتىرەتىن عىلىمي-ساراپتامالىق كەڭەس پەن جاس عالىمدار كلۋبى زەرتتەۋ قىزمەتىن جانداندىرىپ جاتىر.
مەديا سالاسىندا 11 تىلدە 50-دەن استام گازەت پەن جۋرنال جارىق كورەدى. العاش رەت ەلىمىزدىڭ 14 جوعارى وقۋ ورنىندا وقۋ باعدارلاماسىنا «ەتنوساياسي ساۋاتتىلىق» كۋرسى ەنگىزىلدى. قحا جۋرناليستەر كلۋبى 500-گە جۋىق باق وكىلدەرى مەن مەديا سالاسىنىڭ ماماندارىن بىرىكتىرەدى.
اسسامبلەيانىڭ 170-تەن استام ءانسامبلدى قامتيتىن شىعارماشىلىق ۇجىمدارى قاۋىمداستىعى قۇرىلدى. سونىمەن قاتار 4 ەتنوكونفەسسيالىق تەاتر جۇمىس ىستەيدى, مادەني ءىس-شارالاردىڭ بىرىڭعاي كۇنتىزبەسى جۇزەگە اسىرىلىپ جاتىر.
2023 جىلى ادەبيەت, جۋرناليستيكا, مادەنيەت جانە ونەر سالاسىنداعى جەتىستىكتەر ءۇشىن ارنايى سىيلىقتار تاعايىندالدى. سونداي-اق جالپىۇلتتىق بىرلىكتى نىعايتۋعا قوسقان ايرىقشا ۇلەسى ءۇشىن «ەل بىرلىگى» وردەنىمەن ماراپاتتاۋ ءتارتىبى بەكىتىلدى.
ەلىمىزدىڭ ەتنوسارالىق كەلىسىم تاجىريبەسى حالىقارالىق ارەنادا جوعارى باعالاناتىنىن ايتا كەتەيىك. قحا جانىندا ەلىمىزدىڭ بەيبىتشىلىك مودەلىن شەتەلدە ىلگەرىلەتۋگە باعىتتالعان حالىق ديپلوماتياسى ورتالىعى جانە دوستىق ەلشىلەر كورپۋسى جۇمىس ىستەيدى. ال «اسسامبلەيا جاستارى» ۇيىمى يۋنەسكو مەن ەۋروپا كەڭەسىنىڭ حالىقارالىق جاستار قۇرىلىمدارىنا مۇشە بولىپ, ءوز باستامالارىن پاريجدەگى يۋنەسكو شتاب-پاتەرىندە تانىستىردى.
بيىل اتاپ وتىلگەن قازاقستان حالقى اسسامبلەياسىنىڭ 30 جىلدىعى ەڭ ماڭىزدى وقيعالاردىڭ ءبىرى بولعانى بەلگىلى. مەرەيتوي اياسىندا 10 مىڭنان استام الەۋمەتتىك ماڭىزى بار ءىس-شارا ۇيىمداستىرىلىپ, وعان ميلليوننان استام ادام قاتىستى.