قازاقتىڭ التىن تامىرى, ءداستۇر مەن قۇندىلىقتىڭ قاينار كوزى اۋىل ءومىرىنىڭ شىنايى بولمىسىن كورسەتىپ, ۇلتتىق ويىنداردى كەڭىنەن ناسيحاتتاۋدى ماقسات ەتكەن قازىعۇرت اۋدانى اكىمدىگى رەاليتي-شوۋ سايىسىن وتكىزدى.
«جاستار رەسۋرستىق ورتالىعى» ۇيىمداستىرعان «اۋىلداعى ءبىر كۇنىم» تاقىرىبىمەن وتكەن سايىستا اۋدانعا قاراستى 13 اۋىلدىق وكرۋگتەن كەلگەن قاتىسۋشىلار بىرنەشە كومانداعا ءبولىنىپ, ءوزارا باق سىناستى. ەرەجە بويىنشا ەر جىگىتتەر ساداق اتۋ, اسىق اتۋ, قازاق كۇرەسى, ماس-رەستلينگ (تاياق تارتىس), الىپتار سايىسى جانە ارقان تارتۋ سىندى ۇلتتىق ويىن تۇرلەرىنەن كۇش سىناستى. ال قىز-كەلىنشەكتەر قاۋىمى اراسىندا تاباعا نان جابۋ, قامىر جايۋ, كەسپە كەسۋ, تالقاننان جەنت جاساۋ, ۇلتتىق تاعام تۇرلەرىن ازىرلەۋ بويىنشا سايىستار ءوتتى.
قاتىسۋشىلار اۋىل ءومىرىنىڭ ءسانى مەن سالتىن كورسەتىپ, ءوز ونەرى مەن شەبەرلىكتەرىن كورسەتتى. كورەرمەندەر قازاقتىڭ ۇلتتىق ويىندارى مەن تاعام داستۇرلەرىنە قانىعىپ, اۋىل تىرشىلىگىنىڭ اسەم كورىنىسىن تاماشالادى. قازىلار القاسىنىڭ شەشىمىمەن تۇربات اۋىلى وكرۋگى كومانداسى جەڭىمپاز تانىلسا, ەكىنشى ورىندى قاراباۋ اۋىلى وكرۋگى, ءۇشىنشى ورىندى قازىعۇرت اۋىلى وكرۋگى يەلەندى. اۋدان اكىمى ازيزحان يسمايلوۆ ۇزدىك دەپ تانىلعان كوماندالارعا ارنايى ديپلوم, العىسحات جانە باعالى سىيلىقتار تابىس ەتتى.
تۇركىستان وبلىسى