استانادا اقپاراتتىق-تەلەكوممۋنيكاتسيالىق ينفراقۇرىلىمدى دامىتۋ ماسەلەلەرى جونىندەگى ۇكىمەت وتىرىسىنىڭ قورىتىندىسى بويىنشا «كسەلل» اق باسقارما توراعاسى اسقار جامباكين كومپانيانىڭ نەگىزگى ناتيجەلەرىن جانە بەسىنشى بۋىن جەلىلەرىن دامىتۋ جوسپارلارىن ۇسىنعان ءباسپاسوز بريفينگىن وتكىزدى, دەپ حابارلايدى Egemen.kz.
اسقار جامباكيننىڭ ايتۋىنشا, 5G Kazakhstan ۇلتتىق جوباسى اياسىندا Kcell كومپانياسى 2023-2025 جىلدار ارالىعىندا 5G جەلىسىن جىلدام سالىپ, اتالمىش تەحنولوگيانىڭ كۇندەلىكتى ومىرگە ەنۋىن قامتاماسىز ەتتى. ناتيجەسىندە 2 242 دانا بازالىق ستانتسياسىن ورناتىلدى. جوباعا 300 ميلليارد تەڭگەدەن استام ينۆەستيتسيا سالىنعان. بۇل قازاقستانعا ءموبيلدى ينتەرنەت جىلدامدىعىنىڭ الەمدىك رەيتينگتەگى ورنىن سەگىز ساتىعا كوتەرگەن فاكتورلاردىڭ ءبىرى بولىپ, 49-ورىنعا شىعۋعا مۇمكىندىك بەردى.
بۇگىندە Kcell جەلىسىندە تىركەلگەن قۇرىلعىلاردىڭ جارتىسىنان استامى 5G-ءدى قولدايدى. ابونەنتتەردىڭ 40% دەرلىك 5G جىلدامدىعىن پايدالانادى. بۇل زاماناۋي تسيفرلىق قىزمەتتەرگە سۇرانىستىڭ تۇراقتى ءوسۋىن كورسەتەدى.
Kcell 2026 جىلى 567 بازالىق ستانتسيانى پايدالانۋعا بەرۋدى جوسپارلاپ وتىر, بۇل – كومپانيانىڭ تسيفرلاندىرۋداعى كوشباسشى ورنىن نىعايتادى جانە ايماقتىق قامتۋدى كەڭەيتەدى.
Kcell ءۇشىن تاعى ءبىر دامۋ باعىتى - Private 5G كورپوراتيۆتىك شەشىمدەرى – ورتا جانە ءىرى كاسىپورىندار ءۇشىن قاۋىپسىز جەلىلەر بولدى. ولار گەولوكاتسيانى, بەينەباقىلاۋ مەن ساراپتامانى, قاشىقتان باقىلاۋ جۇرگىزۋدى, push-to-talk بايلانىسىن جانە ۇشقىشسىز تەحنيكانى باسقارۋدى قامتاماسىز ەتىپ, ەكونوميكانىڭ ماڭىزدى سەكتورلارىنىڭ تسيفرلىق ترانسفورماتسياسىنىڭ تەحنولوگيالىق نەگىزىن قۇرادى.
«5G جانە Private 5G تەحنولوگيالارى تسيفرلىق ەكونوميكانىڭ ىرگەتاسىنا اينالىپ كەلەدى. ءبىز جاڭا شەشىمدەر ارقىلى كاسىپورىنداردىڭ جۇمىس ىستەۋ ءتاسىلىن قالاي وزگەرتىپ, قاۋىپسىزدىك پەن تيىمدىلىكتى ارتتىرىپ جاتقانىن كورىپ وتىرمىز. دەگەنمەن, 5G الەۋەتىن تولىق اشۋ ءۇشىن ۇيالى بايلانىس وپەراتورلارى مەن ۇكىمەتتىڭ جۇيەلى جۇمىسى قاجەت», دەپ اتاپ ءوتتى «كسەلل» اق باسقارما توراعاسى اسقار جامباكين.
بۇگىندە Kcell ەلىمىزدە ءبىرىنشى بولىپ ونەركاسىپتىك نىسانداردا بەسىنشى بۋىن تەحنولوگيالارىن ءىس جۇزىندە قولدانىلۋىن كورسەتەتىن Private 5G جوباسىن ىسكە قوسىپ, ونەركاسىپ جانە تاۋ-كەن سەكتورىندا 10 جوبانى جۇزەگە اسىردى.