دالادا وسكەن ءتۇز بۇركىتىن قولعا ءتۇسىرۋدىڭ نەگىزگى ءتاسىلى – تور قۇرۋ. تور جىڭىشكە كەندىر جىپپەن توقىلادى. كوزدەرى بۇركىت ءوتىپ كەتپەيتىندەي سۇيەم شارشى مولشەردە بولادى. كەرەگە بيىكتىگى 1,5-2 مەترگە جۋىق, ەتەگىنىڭ اينالا شەڭبەرى وتاۋ ءۇيدىڭ كولەمى شاماسىندا. ودان كەيىن سىپتىعىرلاپ جونىلعان ۇشى ۇشكىل التى-جەتى شىبىق قادا دايىندايدى.
وسىلاي دايىن بولعان توردى بۇركىت مەكەن ەتكەن سوقپا جەرگە جايادى. تاۋدىڭ باسى ەمەس, وي-جازىق تا ەمەس, ورتا بالاق تۇسى بولعانى دۇرىس. تور قۇراتىن ورىن ءسال شۇڭقىرلاۋ بولسا قولايلى. شىبىق اعاشتارىن جەرگە اينالدىرا قادايدى. سىرتىنان تورمەن دوڭگەلەتە قورشاپ, جاعاسىنداعى كەنەرە باۋمەن شىبىقتاردىڭ باسىن ءبىر-ءبىر شالىپ, كەرىپ بايلايدى. باۋدىڭ ارتىق شىققان ۇشىن اۋىرلاۋ تاسقا نەمەسە قازىققا بايلاپ, شىجىمداپ تاستايدى. توردىڭ شالعايلانعان ەتەگىن سىرتىنا قاراي كەڭەيتىپ, ىرگەسىن كولبەي الىسقا سوزىپ, ۇساق تاستارمەن بايلاپ, باستىرىپ, اسپانعا قاراعان شەڭبەرىن تارىلتىپ تىگەدى. توردىڭ جوعارعى اۋزى ءبۇرىلىپ, ەتەك جاعى كەڭ كەلىپ تۇرادى.
مۇنداعى سەبەپ, ءتۇز بۇركىتى اڭداۋسىز كەلىپ تورعا ورالعاندا ءۇش شىبىق جىعىلادى دا, قۇس ەكى بەرىك شىبىقتىڭ ورتاسىنا اسپاقتالىپ, كۇش الا الماي, تابانى جەرگە تيمەي سالاقتاپ قالادى. ەگەر تابانى جەرگە تيسە, تابانىمەن باسىپ تۇرىپ, توردى تۇمسىعىمەن قىرقىپ, شىعىپ كەتەدى. بۇركىتتى قىزىقتىرىپ تورعا ءتۇسىرۋ ءۇشىن قوياننىڭ بىتەۋ تەرىسىنە ءشوپ نىعاپ, قويان سياقتى كەپ جاساپ, ۇزىندىعى قوياننىڭ بويىمەن بىردەي, جالپاقتىعى ەكى ەلى كەلەتىن جۇقا تاقتايدىڭ ورتاسىن باسبارماق اينالاتىنداي تەسىپ, كەپتىڭ ىشىنە كىرگىزىپ ورنالاستىرادى.
ودان كەيىن توردىڭ ىشىنە اسپاندا ۇشىپ جۇرگەن بۇركىتتىڭ كوزى شالاتىنداي جەمتىك تاستاپ, ونىڭ قاسىنا قۇزعىن, قارعا, ساۋىسقان سياقتى ءتىرى قۇستاردى بايلاپ قويادى. تاجىريبەلى قۇسبەگىلەر كوبىندە قۇزعىندى توردىڭ ىشىنە بايلايدى. سەبەبى قۇزعىن بۇركىتتىڭ ۇياسىنا ءتۇسىپ, جۇمىرتقاسىن تەسىپ, سارى ۋىزىن ءىشىپ كەتەتىندىكتەن ەكەۋى ءبىر-بىرىنە وتە ءوش كەلەدى.
ماڭىنان ادام ۇزاپ كەتكەن توردىڭ ىشىندەگى بايلاۋلى قۇستار جەمتىكتى جۇلقىلاپ جەي باستاعاندا, ولاردىڭ قوزعاۋىمەن قويان كەبى ءتىرى سياقتانىپ, شوقىرىقتاپ ارەكەت ەتەدى. بۇلاردى الىستان اڭعارعان البىرت قىران قارعا قويانمەن جاعالاسىپ ءجۇر ەكەن دەپ ويلاپ, قوماعايلانىپ تورعا قاراي شۇيىلەدى. توبەسىنەن تونگەن جاۋىن كورگەندە زارەسى ۇشقان تورداعى قۇزعىن بارقىلداپ مازاسى كەتىپ, جانتالاسادى. وسى كەزدە كوزى تۇنىپ, ءشۇيىلىپ كەلگەن بۇركىت ەشنارسەدەن تارتىنىپ سەسكەنبەي توردى كيىپ اكەتەدى. كەيدە توردىڭ سىرتىنان قاپتالىپ تۇسسە, كەيدە توبەسىنەن تىك ءتۇسىپ, قۇزعىندى ۇستاپ جەپ, ەندى ۇشقاندا تىك شىعا الماي تورعا شىرمالىپ قالادى.