«تازا قازاقستان» جالپىۇلتتىق ەكولوگيالىق اكتسياسى جانە قازاقستان حالقى اسسامبلەياسىنىڭ 30 جىلدىعى اياسىندا ورىس, سلاۆيان جانە كازاك ۇيىمدارى قاۋىمداستىعىنىڭ باستاماسىمەن ەلوردانىڭ «دوستىق» اللەياسىندا سەنبىلىك ۇيىمداستىرىلىپ, شىرشا وتىرعىزىلدى, دەپ حابارلايدى استانا اكىمدىگىنىڭ رەسمي سايتى.
ەكواكتسياعا ءماجىلىس دەپۋتاتى, قاۋىمداستىق توراعاسى سەرگەي پونومارەۆ باستاعان وزگە دە ۇيىم وكىلدەرى, ەلوردالىق ەتنومادەني بىرلەستىكتەر مەن اسسامبلەيانىڭ قوعامدىق قۇرىلىمدارى قاتىستى.
قاتىسۋشىلار «دوستىق» اللەياسىندا بىرنەشە جاس شىرشا وتىرعىزدى.
«بۇگىنگى كەزدەسۋدىڭ «دوستىق» اللەياسىندا, دوستىق ءۇيىنىڭ ماڭىندا ءوتۋى وتە سيمۆولدىق مانگە يە. ورىس, سلاۆيان جانە كازاك ۇيىمدارى قاۋىمداستىعى مەملەكەت باسشىسى باستاعان «تازا قازاقستان» اكتسياسىن تولىق قولدايدى. بۇگىن ءبىز – ءتۇرلى ەتنوستار مەن ۇرپاقتاردىڭ وكىلدەرى وسىندا بىرگە ەڭبەك ەتىپ جاتىرمىز. بالالارىمىز الداعى ۋاقىتتا قوقىس تاستامايدى جانە وزگەلەرگە دە وندايعا جول بەرمەيدى دەپ سەنەمىن.
كەيبىرەۋلەر: «بۇل بوس اۋرەشىلىك, ءبارىبىر لاستاي بەرەدى» دەيدى. ال مەن كەرىسىنشە, كوپشىلىكتىڭ تازالىققا دەگەن كوزقاراسى وزگەرەدى دەپ سەنەمىن. سوندىقتان بۇگىنگى ەڭبەگىمىز زايا كەتپەيدى», – دەدى سەرگەي پونومارەۆ.