پورتۋگاليالىق شابۋىلشى كريشتيانۋ رونالدۋ 2025 جىلعى Forbes نۇسقاسى بويىنشا الەمدەگى ەڭ جوعارى جالاقى الاتىن فۋتبولشىلار تىزىمىندە ءبىرىنشى ورىنعا شىقتى. ول بيىلعى ماۋسىمدا جالپى 280 ميلليون دوللار تابىس تاپقان, دەپ جازادى Egemen.kz.
ونىڭ ىشىندە 230 ميلليون دوللاردى ساۋد ارابياسىنىڭ Al Nassr كلۋبىنان السا, تاعى 50 ميلليون دوللاردى Nike, Binance جانە Herbalife كومپانيالارىمەن جاسالعان جارنامالىق كەلىسىمشارتتاردان تابادى.
جاسى 40-قا تولعانىنا قاراماستان, رونالدۋ مانسابىن اياقتاۋعا نيەتتى ەمەس. پورتۋگاليا قۇراماسىمەن بىرگە ۋەفا ۇلتتار ليگاسىن جەڭىپ, Al Nassr كلۋبىمەن كەلىسىمشارتى اياقتالعان سوڭ, ول مانسابىن اياقتايدى دەگەن قاۋەسەتتەردى تەز جوققا شىعارىپ, كلۋبپەن جاڭا ەكى جىلدىق كەلىسىمگە قول قويدى.
«مەن ءالى دە كوماندام مەن ۇلتتىق قۇراماما پايدا اكەلىپ ءجۇرمىن. نەگە جالعاستىرماسقا؟» دەدى رونالدۋ پورتۋگاليالىق Canal 11 تەلەارناسىنا بەرگەن سۇحباتىندا.
رونالدۋدىڭ تابىسى وعان سوڭعى ون جىلدا التىنشى رەت Forbes رەيتينگىنىڭ كوشباسشىسى بولۋعا مۇمكىندىك بەردى. 2025–2026 ماۋسىمىندا الەمنىڭ ەڭ كوپ تابىس تاباتىن ون فۋتبولشىسى جالپى 945 ميلليون دوللار تاپقان.
ەكىنشى ورىندا — Inter Miami كلۋبىنىڭ ويىنشىسى ليونەل مەسسي (130 ميلليون دوللار), ءۇشىنشى ورىندا — Al Ittihad كلۋبىنىڭ شابۋىلشىسى كاريم بەنزەما (104 ميلليون دوللار).
بەستىكتى Real Madrid ويىنشىسى كيليان مباپپە (95 ميلليون دوللار) مەن Manchester City شابۋىلشىسى ەرلينگ حولاند (80 ميلليون دوللار) تۇيىندەيدى.
جاڭا ەسىمدەردىڭ قاتارىندا — Barcelona كلۋبىنىڭ 18 جاستاعى ويىنشىسى لامينە يامال, ول العاش رەت ۇزدىك وندىققا ەنسە, سونىمەن قاتار ونىڭ وتانداسى, Real Madrid ويىنشىسى 22 جاستاعى دجۋد بەللينگەم دە تىزىمدە بار.