پرەمەر-مينيستر ولجاس بەكتەنوۆ «سامۇرىق-قازىنا» اكتسيونەرلىك قوعامىنىڭ ديرەكتورلار كەڭەسىن وتكىزدى. جيىنعا العاش رەت جاساندى ينتەللەكت نەگىزىندە قۇرىلعان تاۋەلسىز تسيفرلىق مۇشە SKAI (Samruk-Kazyna Artificial Intelligence) قاتىستى, دەپ حابارلايدى Egemen.kz.
ايتا كەتەيىك, قازاقستاندىق Alem LLM تىلدىك مودەلى نەگىزىندە قۇرىلعان بۇل نەيروندىق جەلى بۇعان دەيىن Digital Bridge 2025 حالىقارالىق فورۋمى اياسىندا مەملەكەت باسشىسىنا تانىستىرىلعان بولاتىن.
وتىرىستا قوردىڭ 2025 جىلدىڭ العاشقى توعىز ايىنداعى قىزمەتىنىڭ قورىتىندىلارى قارالدى. پرەزيدەنت تاپسىرمالارىنىڭ ورىندالۋ بارىسىنا, اسىرەسە ءىرى ينفراقۇرىلىمدىق جوبالاردىڭ جۇزەگە اسىرىلۋىنا ەرەكشە نازار اۋدارىلدى.
قوردىڭ ەسەبى بويىنشا, بيىل جامبىل وبلىسىندا جەل ەنەرگياسىنا ارنالعان كومپونەنتتەر شىعاراتىن زاۋىت ىسكە قوسىلىپ, جاڭاوزەندە قۋاتى 50 مەگاۆاتت كۇن ەلەكتر ستانساسى پايدالانۋعا بەرىلدى. سونداي-اق قوسشى قالاسىنا گاز جەتكىزۋگە ارنالعان العاشقى كەشەن اشىلىپ, «دوستىق – مويىنتى» تەمىرجول ۋچاسكەسىندەگى ەكىنشى جول پايدالانۋعا بەرىلدى. بۇعان قوسا, ۇزىندىعى 302 شاقىرىم بولاتىن «تالدىقورعان – ءۇشارال» ماگيسترالدى گاز قۇبىرى ىسكە قوسىلدى. بۇل جوبالار ەلدىڭ كولىك, ەنەرگەتيكا جانە تسيفرلاندىرۋ سالالارىنداعى الەۋەتىن ارتتىرۋعا باعىتتالعان.
قور باسقارما توراعاسى نۇرلان جاقىپوۆ قارجىلىق جانە وندىرىستىك كورسەتكىشتەردىڭ تۇراقتى وڭ ديناميكادا ەكەنىن اتاپ ءوتتى. ءىرى ينۆەستيتسيالىق جوبالار بويىنشا قاراجاتتى يگەرۋ دەڭگەيى 99 پايىزعا جەتكەن.
پرەمەر-مينيستر كەڭەس مۇشەلەرىنىڭ نازارىن وتاندىق تاۋار وندىرۋشىلەردى قولداۋ ماسەلەسىنە اۋداردى. تسيفرلىق كەڭەسشى SKAI ۇسىنعان دەرەكتەرگە سايكەس, بيىل قازاقستاندىق وندىرۋشىلەردەن ساتىپ الىنعان تاۋار كولەمى وتكەن جىلمەن سالىستىرعاندا 75 پايىزعا ءوسىپ, 721 ميلليارد تەڭگەگە جەتكەن. بارلىعى 497 وتاندىق كاسىپورىنمەن 7 227 كەلىسىمشارت جاسالعان. SKAI-دىڭ باعالاۋى بويىنشا, بيىلعى ساتىپ الۋ جوسپارى Wabtec كومپانياسىنا تيەسىلى جەرگىلىكتى وندىرۋشىدەن لوكوموتيۆتەر الۋ ارقىلى ايتارلىقتاي اسىرا ورىندالادى.
كەڭەس بارىسىندا «تازا قازاقستان» ەكولوگيالىق باستاماسىنىڭ جۇزەگە اسىرىلۋى دا تالقىلاندى. بۇل جوبا اياسىندا قور كومپانيالارىنىڭ قىزمەتكەرلەرى شامامەن 1 ميلليون اعاش وتىرعىزۋدى جوسپارلاپ وتىر. سونىمەن قاتار, ينكليۋزيا, سپورت جانە مەديتسينا باعىتتارىنداعى الەۋمەتتىك جوبالار دا قاراستىرىلدى. قازىرگى تاڭدا 87 نىساندا 700 مىڭنان استام ازاماتقا الەۋمەتتىك قىزمەت كورسەتىلۋدە, ال جىل سوڭىنا دەيىن ماڭعىستاۋ مەن باتىس قازاقستان وبلىستارىندا جاڭا سپورت كەشەندەرى اشىلادى.
جيىن قورىتىندىسى بويىنشا قور باسشىلىعىنا ينفراقۇرىلىمدىق جوبالاردى ۋاقىتىلى اياقتاۋ جانە وتاندىق وندىرۋشىلەردى قولداۋدى كۇشەيتۋ تاپسىرىلدى. سونداي-اق تاۋارلار مەن قىزمەتتەردى ساتىپ الۋدا قازاقستاندىق قامتۋ ۇلەسىن ۇلعايتۋ مىندەتى قويىلدى.