پرەمەر-مينيستر ولجاس بەكتەنوۆتىڭ توراعالىعىمەن ناشاقورلىقتىڭ الدىن الۋ جانە ەسىرتكى قىلمىسىنا قارسى ءىس-قيمىل جونىندەگى رەسپۋبليكالىق شتابتىڭ وتىرىسى ءوتتى. وندا مەملەكەتتىك ورگانداردىڭ ۇيلەسىمدى ءىس-ارەكەتتەرى مەن جاڭا ستراتەگيالاردى قامتيتىن 2026–2028 جىلدارعا ارنالعان كەشەندى جوسپار تالقىلاندى, دەپ حابارلايدى Egemen.kz.
جيىندا ىشكى ىستەر, دەنساۋلىق ساقتاۋ, وقۋ-اعارتۋ, مادەنيەت جانە اقپارات مينيسترلەرى مەملەكەت باسشىسىنىڭ قاۋىپسىزدىك كەڭەسى وتىرىسىندا بەرگەن تاپسىرمالارىنىڭ ورىندالۋ بارىسى تۋرالى باياندادى.
پرەمەر-مينيستر ناشاقورلىق پەن ەسىرتكى قىلمىسىنىڭ ۇلتتىق قاۋىپسىزدىككە توندىرەتىن قاتەرى زور ەكەنىن اتاپ ءوتىپ, بۇل باعىتتاعى جۇمىستاردى جۇيەلى جانە ۆەدومستۆوارالىق ءتاسىلدى تالاپ ەتەتىن وزەكتى ماسەلە رەتىندە قالا بەرەتىنىن ايتتى.
«مەملەكەت باسشىسى جاريالاعان «زاڭ مەن ءتارتىپ» قاعيداتىن قامتاماسىز ەتۋ – قوعامنىڭ ورنىقتى دامۋىنىڭ, قۇقىقتىق ءتارتىپتى نىعايتۋدىڭ, ازاماتتار قۇقىقتارىن قورعاۋدىڭ ماڭىزدى شارتى. مەملەكەتتىك ورگاندار ناشاقورلىقتىڭ الدىن الۋ جانە ەسىرتكى قىلمىسىنا قارسى ءىس-قيمىل بويىنشا اۋقىمدى جۇمىستار جۇرگىزۋدە. بىرقاتار زاڭ قابىلدانىپ, سالالىق ينستيتۋتتار مەن ينفراقۇرىلىمدار قۇرىلۋدا, بۇل سالاداعى حالىقارالىق ىنتىماقتاستىق كەڭەيىپ كەلەدى. اتالعان جۇمىس قارقىنىن تومەندۋگە بولمايدى, ول جالپىۇلتتىق سيپاتقا يە بولۋى كەرەك», دەدى ولجاس بەكتەنوۆ.
قازىرگى ۋاقىتتا 2026–2028 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەستىڭ كەشەندى جوسپارى ازىرلەنىپ جاتىر. بۇل قۇجاتتا جاستار, اسىرەسە وقىمايتىن جانە جۇمىس ىستەمەيتىن NEET ساناتىنداعى توپتارمەن جۇمىسقا ەرەكشە نازار اۋدارىلادى. سونداي-اق بۇقارالىق سپورت پەن شىعارماشىلىق باستامالاردى پايدالانۋ ارقىلى الدىن الۋ تەتىكتەرى كۇشەيتىلمەك.
ىشكى ىستەر ءمينيسترى ەرجان سادەنوۆ ەسىرتكىنىڭ ينتەرنەت-ساۋداسىنا قارسى ءىس-قيمىل جونىندەگى جۇمىستىڭ جاندانعانى تۋرالى باياندادى. «كيبەرنادزور» جۇيەسىنىڭ ارقاسىندا انىقتالعان جانە بۇعاتتالعان سايتتار سانى 11 ەسەگە ءوسىپ, 26,5 مىڭنان استام ينتەرنەت-رەسۋرس جابىلعان. سونىمەن قاتار, 35 مىڭنان استام بانكتىك شوت بۇعاتتالىپ, 4 مىڭنان استام ادام قىلمىستىق جاۋاپكەرشىلىككە تارتىلعان.
پرەمەر-مينيستر ءىىم-گە جىل سوڭىنا دەيىن وڭىرلەردەگى اكىمدىكتەردىڭ ەسىرتكىگە قاتىستى قۇقىق بۇزۋشىلىقتاردىڭ الدىن الۋ قىزمەتىن باعالايتىن رەيتينگ ازىرلەۋدى تاپسىردى. دەنساۋلىق ساقتاۋ مينيسترلىگى ەسىرتكىگە تاۋەلدى ادامداردى ەمدەۋ مەن وڭالتۋدى جەتىلدىرۋ باعىتىندا جۇمىس جۇرگىزىپ جاتىر, ال ناركولوگيا سالاسىنداعى كلينيكالىق حاتتامالار قايتا قارالعان. سونداي-اق ەمدەۋ ساپاسىنىڭ حالىقارالىق باعدارلاماسى ەنگىزىلىپ جاتىر.
ء«ىىم ۇسىنىسى شەڭبەرىندە مادەنيەت جانە اقپارات مينيسترلىگىمەن, وتاندىق وندىرۋشىلەرمەن بىرلەسىپ, حالىقتى ەسىرتكىگە ارنالعان قولجەتىمدى ەكسپرەسس-تەستەرمەن, ونىڭ ىشىندە الەۋمەتتىك وسال توپتاردى تەگىن قامتاماسىز ەتۋ ماسەلەسىن پىسىقتاۋ تاپسىرىلدى. بۇل باستاپقى تۇتىنۋ فاكتىلەرىن انىقتايتىن الدىن الۋ شاراسى بولادى. سونداي-اق ءبىر اي ىشىندە جەكەمەنشىك ناركولوگيالىق وڭالتۋ ورتالىقتارىنىڭ قىزمەتىن رەتتەيتىن قۇقىقتىق تاسىلدەردى ازىرلەپ شىعارۋ تالاپ ەتىلەدى.ءبىلىم بەرۋ سالاسى تاراپىنان پروفيلاكتيكالىق جۇمىستار جۇرگىزىلۋدە: تاربيەلىك فۋنكتسيالاردى پەداگوگ-پسيحولوگتار مەن الەۋمەتتىك پەداگوگتاردى قوسا العاندا, 360 مىڭ پەداگوگ جۇزەگە اسىرۋدا, وقۋشىلار قاۋىپسىزدىك ساباقتارىمەن 100% قامتىلعان, اتا-انالاردى پەداگوگيكالىق قولداۋدىڭ 6,8 مىڭ ورتالىعى جۇمىس ىستەيدى. سونداي-اق ءتيىستى ادىستەمەلىك ۇسىنىمدار ازىرلەندى», دەلىنگەن حابارلامادا.
مادەنيەت جانە اقپارات ءمينيسترى ايدا بالاەۆا ەسىرتكىگە قارسى ناسيحات بويىنشا جۇرگىزىلىپ جاتقان جۇمىستار تۋرالى باياندادى. ولجاس بەكتەنوۆ پروفيلاكتيكالىق جۇمىستا ناسيحاتتاۋدىڭ زاماناۋي نىساندارى مەن ادىستەرىن قولدانۋ قاجەتتىلىگىنە نازار اۋداردى. تانىمال ونلاين-پلاتفورمالاردا, كينوتەاترلاردا, قوعامدىق كولىكتەردە جانە ازاماتتاردىڭ جاپپاي جينالاتىن ورىندارىندا الەۋمەتتىك جارنامانى ورنالاستىرۋدىڭ ماڭىزدىلىعى اتاپ ءوتىلدى. وسىنى ەسكەرە وتىرىپ, «زاڭ مەن ءتارتىپ» تۇجىرىمداماسىن جۇزەگە اسىرۋ جونىندەگى اقپاراتتىق جۇمىستى تۇزەتۋ تاپسىرىلدى.
بۇدان بولەك, مادەنيەت جانە اقپارات, جاساندى ينتەللەكت مينيسترلىكتەرى ۇلتتىق قاۋىپسىزدىك كوميتەتىمەن بىرلەسىپ, ماقساتتى جارناما مەن ەسىرتكى سايتتارىن انىقتاۋعا جانە اۆتوماتتى تۇردە بۇعاتتاۋعا بەلسەندى تۇردە قوسىلۋى كەرەك.
سينتەتيكالىق ەسىرتكىنىڭ جاڭا تۇرلەرىن انىقتاۋ ءۇشىن ادىلەت مينيسترلىگى سوت ساراپتاماسى ورگاندارىن زاماناۋي جابدىقتارمەن جاراقتاندىرۋ, ساراپشىلاردى ىرىكتەۋ جانە دايارلاۋ, سونداي-اق ءراسىمدى جەتىلدىرۋ جانە ساراپتاما جۇرگىزۋ ۋاقىتىن وڭتايلاندىرۋ قاجەت.
شەكاراداعى وتكىزۋ پۋنكتتەرى قازىرگى زامانعى تەكسەرۋ قۇرالدارىمەن, شەكارالىق باقىلاۋ مەن راديومونيتورينگتىڭ تەحنيكالىق قۇرالدارىمەن قامتاماسىز ەتىلەتىن بولادى.
وڭىرلەردىڭ اكىمدەرىنە ناشاقورلىققا قارسى ءىس-قيمىل جونىندەگى وبلىستىق شتابتاردى باسقارۋ جانە وسى جىلدىڭ قازان ايىنىڭ سوڭىنا دەيىن جەرگىلىكتى جاعدايلار مەن بيۋدجەتتەردىڭ مۇمكىندىكتەرىن ەسكەرە وتىرىپ, ناشاقورلىققا قارسى ءىس-قيمىل جونىندەگى ناقتى شارالاردى ازىرلەۋ تاپسىرىلدى.
وتىرىس قورىتىندىسى بويىنشا رەسپۋبليكالىق شتابتىڭ 2026 جىلعا ارنالعان جۇمىس جوسپارى ماقۇلداندى. پرەمەر-مينيستر بارلىق ۇسىنىستار مەن باستامالار ازىرلەنىپ جاتقان كەشەندى جوسپاردىڭ نەگىزىنە ەنگىزىلەتىنىن اتاپ ءوتتى.