ەرەيمەنتاۋ اۋدانىندا جاپپاي ۋلانۋ دەرەگى تىركەلدى, دەپ حابارلايدى Egemen.kz.
وقيعا اۋداندىق اۋرۋحانانىڭ جۇقپالى اۋرۋلار بولىمشەسىنە بىردەي بەلگىلەرمەن جەتى ادام تۇسكەننەن كەيىن بەلگىلى بولعان. الدىن الا تەكسەرۋ ناتيجەسىنە سايكەس, ولاردىڭ جاعدايىنىڭ ناشارلاۋىنا تاعامنان ۋلانۋ سەبەپ بولۋى مۇمكىن.
«ەرەيمەنتاۋ اۋدانىنىڭ ۋچاسكەلىك پوليتسيا ينسپەكتورى وقيعا تۋرالى ءتيىستى قىزمەتتەرگە دەرەۋ حابارلاعان. تەرگەۋ بارىسىندا زارداپ شەككەندەردىڭ بارلىعى ءبىر ءىس-شاراعا قاتىسقانى انىقتالدى. اتالعان فاكتى بويىنشا «سانيتارلىق ەرەجەلەردى نەمەسە گيگيەنالىق نورماتيۆتەردى بۇزۋ» بابى بويىنشا سوتقا دەيىنگى تەرگەۋ باستالدى. قۇقىق قورعاۋ ورگاندارى ۋلانۋدىڭ كوزىن جانە كىنالى تۇلعالاردى انىقتاپ جاتىر», دەلىنگەن اقمولا وبلىسى پوليتسيا دەپارتامەنتىنىڭ ءباسپاسوز قىزمەتى تاراتقان حابارلامادا.
ايتا كەتۋ كەرەك, بيىلعى جىلدىڭ باسىنان بەرى اۋداندا سانيتارلىق نورمالاردىڭ بۇزىلۋىنا بايلانىستى وسىعان ۇقساس ەكى جاعداي تىركەلگەن.