قارجى مينيسترلىگى بۇگىندە تسيفرلاندىرۋ بويىنشا ەڭ وزىق مەملەكەتتىك ورگاننىڭ ءبىرى. سالىق قاۋىپسىزدىگى ساراپشىسى دميتري كازانتسەۆتىڭ ايتۋىنشا وسى مينيسترلىك ەسەپتىلىكتى العاشقىلاردىڭ ءبىرى بولىپ ەلەكتروندى فورماتقا كوشىرگەن ەدى. سونىڭ ارقاسىندا سالىقتىق ۇدەرىستىڭ جىلدامدىعى دا, ساپاسى دا ەداۋىر ارتتى.
بۇرىن, مىسالى, قوسىمشا قۇن سالىعى بويىنشا ەسەپتى 15 تامىزدا تاپسىرساق, كامەرالدىق باقىلاۋ ونداعى قاتەلەردى تەك ەكى جىلدان كەيىن عانا انىقتايتىن. قازىر جاعداي تۇبەگەيلى وزگەردى. جۇيە بارلىق دەرەكتەردى اۆتوماتتى تۇردە وڭدەيدى جانە ەكى-ءۇش كۇن ىشىندە ناتيجەسىن كورسەتەدى. بۇل – جاساندى ينتەللەكتىنىڭ ناقتى ىسكە قوسىلعانىنىڭ دالەلى.
قازىر مەملەكەتتىك كىرىستەر كوميتەتىندە جاساندى ينتەللەكت بەلگىلى ءبىر ۇدەرىستەردە قولدانىلىپ جاتىر. مىسالى, كامەرالدىق باقىلاۋدا ىقتيمال زاڭبۇزۋشىلىقتاردى انىقتاۋ كەزىندە جۇيە اۆتوماتتى تالداۋ جاسايدى. بۇرىن بۇل ۇزاق ۋاقىت الاتىن, ال قازىر جاساندى ينتەللەكت مالىمەتتەردى بىرنەشە كۇن ىشىندە ساراپتاپ شىعادى.
«شىن مانىندە, بۇل جۇمىس ءبىرازدان بەرى ءجۇرىپ جاتىر, تەك بۇعان دەيىن ونى جاساندى ينتەللەكت دەپ اتاي قويعان جوق. پرەزيدەنت جولداۋىنان كەيىن وسى باعىتتاعى جۇمىستار رەسمي دەڭگەيدە جاڭا كەزەڭگە وتەدى. مەنىڭشە, كەلەسى قادام – تسيفرلاندىرۋدى ودان دا تەرەڭدەتۋ. سالىق ورگاندارى ادامنىڭ ءبىر جىلدا قانشا تابىس تاپقانىن, قانشا قاراجات اۋدارعانىن جانە ونىڭ قانشاسىن رەسمي تۇردە جاريالاعانىن ناقتى كورە الادى. بۇل ءۇشىن مەملەكەتتىك دەرەكتەر بازالارى بىرىكتىرىلەدى, قاجەت بولعان جاعدايدا شەتەلدىك دەرەكتەر قورلارىمەن دە ينتەگراتسيا جاسالادى. جاساندى ينتەللەكت بارلىق اقپاراتتى تالداپ, كەز كەلگەن سايكەسسىزدىكتى اۆتوماتتى تۇردە انىقتاپ وتىرادى», دەيدى ساراپشى.
قارجى مينيسترلىگىنىڭ تسيفرلىق ترانسفورماتسياداعى كوشباسشىلىعى ايقىن. بۇگىندە سالىقتىق ەسەپتىلىكتىڭ بارلىعى دەرلىك ەلەكتروندى فورماتتا قابىلدانادى. مينيسترلىكتىڭ باستى باعىتىنىڭ ءبىرى – دەرەكتەردى وڭدەۋدىڭ تولىق اۆتوماتتاندىرىلۋى. بۇل باعىتتاعى جۇمىستاردىڭ ناتيجەسىندە بيزنەس تە, جەكە تۇلعالار دا سالىق ورگاندارىنىڭ شەشىمدەرىن الدەقايدا جىلدام كورە الادى.
«پرەزيدەنت قاسىم-جومارت توقاەۆ جولداۋىندا مەملەكەتتىك كىرىستەر كوميتەتىن تسيفرلاندىرۋدىڭ فلاگمانىنا اينالدىرۋدى تاپسىردى. ونىڭ ايتۋىنشا, جاساندى ينتەللەكتىنىڭ الەۋەتىن ءتيىمدى پايدالانۋ سالىق تولەۋشىلەردىڭ دە, مەملەكەتتىڭ دە مۇددەسىنە ساي بولۋى ءتيىس. پرەزيدەنت كاسىپكەرلەرگە تۇسەتىن قىسىمدى ازايتۋعا ەرەكشە توقتالدى. بۇعان دەيىن بيزنەسكە ەسكەرتۋ شارالارىنىڭ ورنىنا جازالاۋ تاسىلدەرى ءجيى قولدانىلىپ كەلگەنى ايتىلدى. سونداي-اق پرەزيدەنت كاسىپكەرلەردى ارتىق تەكسەرىستەردەن قورعاۋ ءۇشىن مىندەتتى تالاپتار ءتىزىلىمىن ەنگىزۋدى جانە قولدانىستاعى نورمالاردى كاسىپكەرلىك كودەكسكە سايكەستەندىرۋدى جۇكتەدى. مەملەكەتتىك قىزمەتتەردى تسيفرلاندىرۋدا بەلگىلى ءبىر جەتىستىكتەر بولعانىمەن, بيزنەس ءۇشىن بيۋروكراتيالىق كەدەرگىلەر ءالى دە ساقتالىپ وتىر. پرەزيدەنتتىڭ پىكىرىنشە, بۇل جاعدايدى وزگەرتۋ قاجەت جانە تسيفرلىق شەشىمدەر وسى ماسەلەنى تۇبەگەيلى وڭتايلاندىرادى», دەپ ءتۇسىندىردى د. كازانتسەۆ.
راسىندا, قازىردىڭ وزىندە العاشقى قادامدار جاسالىپ جاتىر. كامەرالدىق باقىلاۋدا جاساندى ينتەللەكت قاتەلەردى اۆتوماتتى تۇردە انىقتاپ, سالىق تولەۋشىلەرگە تەز حابارلايدى. كەلەسى كەزەڭدە بۇل تەحنولوگيا ءموبيلدى اۋدارىمدار مەن جەكە تۇلعالاردىڭ كىرىستەرىن تالداۋ باعىتىندا كەڭىنەن قولدانىلاتىن بولادى.