بولگاريانىڭ شۋمەن قالاسىندا IX ەۋروپالىق جاسوسپىرىمدەر ينفورماتيكا وليمپياداسى (EJOI-2025) ءوتتى. بايقاۋعا 24 ەلدەن 100-دەن استام جاس باعدارلاماشى قاتىسىپ, بارلىعى 52 مەدال ساراپقا سالىندى. ۇلتتىق قۇراما جوعارى ناتيجە كورسەتىپ, وزات وقۋشىلارىمىز ءبىر كۇمىس, ءۇش قولا مەدالدى ولجالاپ قايتتى. ال گرەكيادا وتكەن حالىقارالىق ەكونوميكا وليمپياداسىندا (EO-2025) استانالىق وقۋشى التىننان القا تاعىپ, ءابسوليۋتتى چەمپيون اتاندى.
جاساندى ينتەللەكتىنىڭ قارقىنى كۇشەيىپ, تسيفرلىق تەحنولوگيالار كۇندەلىكتى ومىرىمىزگە دەندەپ ەنىپ جاتقان ۋاقىتتا باعدارلامالاۋ ءتىلىن ەرتە جاستان مەڭگەرۋ – زامان تالابى. وسى ورايدا مەكتەپتەگى ينفورماتيكا ءپانىنىڭ ءرولى ايرىقشا. ويتكەنى ءدال وسى ءپان وقۋشىنىڭ الگوريتمدىك ويلاۋ قابىلەتىن قالىپتاستىرىپ, تسيفرلىق ساۋاتتىلىعىن ارتتىرادى. بۇعان جۋىردا وتكەن حالىقارالىق ءبىلىم سايىستارىنداعى جەتىستىكتەرىمىز ناقتى دالەل بولماق.
بولگاريانىڭ شۋمەن قالاسىندا وتكەن ەۋروپالىق ينفورماتيكا وليمپياداسىندا ەل نامىسىن قورعاعان ءتورت وقۋشىنىڭ بارلىعى جەڭىس تۇعىرىنان كورىندى. اتاپ ايتقاندا, اتىراۋ وبلىستىق ء«بىلىم-يننوۆاتسيا» ليتسەيىنىڭ 9-سىنىپ وقۋشىسى قۇرمەت ءابىلمانسۇر كۇمىس مەدالعا يە بولسا, كوكشەتاۋ قالاسىنداعى ء«بىلىم-يننوۆاتسيا» ليتسەيىنىڭ 9-سىنىپ وقۋشىسى شايمەردەن ءنۇرالى, وسكەمەن قالاسىنداعى ء«بىلىم-يننوۆاتسيا» ليتسەيىنىڭ 9-سىنىپ وقۋشىسى سايات يۋسۋپوۆ, سونداي-اق كوكشەتاۋ قالاسىنداعى ء«بىلىم-يننوۆاتسيا» ليتسەيىنىڭ 9-سىنىپ وقۋشىسى ماعجان دىنمۇحاممەد قولا مەدالعا قول جەتكىزدى.
EJOI-2025 قورىتىندىلارى وزات وقۋشىلارىمىزدىڭ جوعارى دايىندىق دەڭگەيىن جانە وتاندىق باعدارلامالاۋ مەكتەبىنىڭ حالىقارالىق ارەناداعى باسەكەگە قابىلەتتىلىگىن تاعى ءبىر مارتە دالەلدەدى.
كوماندانىڭ عىلىمي جەتەكشىلەرى – قازاق-بريتان تەحنيكالىق ۋنيۆەرسيتەتىنىڭ اسسيستەنت-پروفەسسورى ءالىمجان امانوۆ پەن رەسپۋبليكالىق جانە حالىقارالىق وليمپيادالاردىڭ جەڭىمپازى, سپورتتىق باعدارلامالاۋ چەمپيونى باتىر سارداربەكوۆ.ال استاناداعى نازارباەۆ زياتكەرلىك مەكتەبىنىڭ 11-سىنىپ وقۋشىسى باتىرحان مۇحتارحان گرەكيادا وتكەن حالىقارالىق ەكونوميكا وليمپياداسىندا (EO-2025) ءابسوليۋتتى چەمپيون اتاندى.
ءباسى بيىك بۇل سايىسقا الەمنىڭ تۇكپىر-تۇكپىرىنەن ىرىكتەلىپ وتكەن, «سەن تۇر, مەن اتايىن دەگەن» 100 مىڭنان استام كىل مىقتىلار قاتىستى. فينالدا 28 ەلدەن كەلگەن 128 ۇزدىك قاتىسۋشى باق سىنادى. ولار ەكونوميكا مەن قارجى سالاسىنداعى ەڭ كۇردەلى تەوريالىق جانە پراكتيكالىق تاپسىرمالاردى تالداۋدان باستاپ شەشىمدەردى مودەلدەۋگە دەيىن ورىندادى.جالپى ەسەپتە ءبىزدىڭ باتىرحان ءبىرىنشى ورىندى يەلەنىپ, اقش, كانادا, قىتاي, نيدەرلاندى, پولشا, چەحيا, گرەكيا جانە باسقا دا ەلدەردەن كەلگەن قارسىلاستارىن شاڭ قاپتىردى.
ايتا كەتەيىك, باتىرحاننىڭ قورجىنىندا بىرقاتار جەتىستىكتەر بار. ول – ەكونوميكا جانە قارجى بويىنشا رەسپۋبليكالىق وليمپيادانىڭ قولا جۇلدەگەرى, IEO-2024 (گونكونگ) قولا, IEO-2025 (ازەربايجان) التىن مەدال يەگەرى. سونداي-اق EFI وليمپياداسىندا جەڭىسكە جەتىپ, EO-2025 جارىسىندا ءابسوليۋتتى چەمپيون اتاندى.
«مەن ءۇشىن ەڭ باستىسى – جاڭا نارسەنى ۇيرەنۋ, كۇردەلى تاپسىرمالاردى شەشۋ جانە ءوزىمدى دامىتۋ. ءوزىن-ءوزى تەمىردەي تارتىپكە باعىندىرا الماعان تالاپكەر جەڭىس تۇعىرىنا تالپىنباي-اق قويۋىنا بولادى. مەن بۇل وليمپياداعا بىرنەشە جىل تىنباي دايىندالدىم. مىنە, بۇگىن سول ەڭبەكتىڭ جەمىسىن كورىپ وتىرمىز. ارينە, بۇل جەڭىسپەن توقتاپ قالماي, الداعى ۋاقىتتا عىلىمعا ءوز ۇلەسىمدى قوسسام دەيمىن», دەيدى ول.
باتىرحان مۇحتارحان – جاڭا بۋىن زياتكەرلەرىنىڭ وكىلى. ونىڭ جەتىستىكتەرى تەك جەكە جەڭىس قانا ەمەس, سونىمەن قاتار ەلىمىزدىڭ الەمدىك ءبىلىم ارەناسىنداعى بەدەلىن ارتتىردى.