بۇگىن كەشكە الماتىدا جەرگىلىكتى «قايرات» كومانداسى چەمپيوندار ليگاسىنىڭ جالپى كەزەڭى اياسىندا اتى اڭىزعا اينالعان «رەال مادريدكە» قارسى الاڭعا شىعادى. بۇل ماتچقا الىس-جاقىن شەتەلدەردەن دە كوپ تۋريست كەلگەنى بەلگىلى. وسىعان وراي ءتارتىپتى ساقتاۋعا كوپ ءتىل بىلەتىن ۇلاندىقتار تارتىلعان.
اتاپ ايتقاندا, ستاديوننىڭ ءىشى مەن سىرتىنداعى تىنىشتىق پەن قاۋىپسىزدىكتى ءىىم ۇلتتىق ۇلانى 5571 اسكەري ءبولىمىنىڭ مىڭنان استام اسكەري قىزمەتشىسى قامتاماسىز ەتپەك.
سونىڭ ءبىرى – قاتارداعى جاۋىنگەرلەر ەرجان جاركوۆ پەن رۋسلان تىلەۋقابىل. ۇلتتىق ۇلان قاتارىنا اقتاۋدان شاقىرىلعان ەرجان جاركوۆ قازاق, ورىس, اعىلشىن, يسپان جانە فرانتسۋز تىلدەرىن ەركىن مەڭگەرگەن. ول كۇن سايىن الماتى كوشەلەرىندە پاترۋلدە ءجۇرىپ, تۇرعىندارعا دا, تۋريستەرگە دە كومەك كورسەتەدى.
ال قوناەۆ قالاسىنىڭ تۋماسى رۋسلان تىلەۋقابىل قازاق, ورىس, اعىلشىن, نەمىس جانە جاپون تىلدەرىندە ەركىن سويلەي الاتىن پوليگلوت. ونىڭ شەتەلدىكتەرمەن تەز ءتىل تابىسۋ قابىلەتى اسىرەسە ءىرى حالىقارالىق ءىس-شارالار كەزىندە باعالى.
قىزمەت بارىسىندا ەكەۋى دە ءتارتىپتى ءارى جاۋاپتى ۇلاندىق سارباز رەتىندە ءوزىن كورسەتە ءبىلدى. ولاردىڭ كوپ تىلدە سويلەي الاتىندىعى شەتەل ازاماتتارىنىڭ سەنىمىن ارتتىرىپ, قىزمەتتىڭ تيىمدىلىگىن كۇشەيتەدى.
– فۋتبول – الەم حالقىن بىرىكتىرەتىن سپورت. ءبىزدىڭ مىندەتىمىز — جانكۇيەرلەردىڭ تەك ويىنعا عانا الاڭداپ, وزدەرىن قاۋىپسىز ءارى ەركىن سەزىنۋىنە جاعداي جاساۋ, – دەيدى ر.تىلەۋقابىل.