پرەمەر-ءمينيستردىڭ ورىنباسارى قانات بوزىمباەۆ الماتى وبلىسىنا جۇمىس ساپارى اياسىندا «Alatau City» مەگاجوباسىنىڭ ءتورت نەگىزگى ايماعىندا – «Gate», «Golden», «Growing» جانە «Green» اۋداندارىنىڭ قۇرىلىسىنا دايىندىق بارىسىن تەكسەرىپ, بىرقاتار تاپسىرما بەردى.
ونەركاسىپتىك-لوگيستيكالىق جانە ىسكەرلىك ورتالىقتان باستاپ, عىلىمي-ءبىلىم مەن تۋريستىك كلاستەرلەرگە دەيىن ءار اۋداننىڭ وزىندىك باعىتى بار.
Gate District وتەگەن باتىر, پوكروۆكا, قويانقۇس, ىنتىماق جانە جاڭالىق ەلدى مەكەندەرىنىڭ اراسىندا ورنالاسقان. مۇندا «PepsiCo», «Caspian Group», الماتى جەلدەتكىش زاۋىتى سياقتى ءىرى جوبالار جۇزەگە اسىرىلىپ جاتىر. اۋداننىڭ باستى ورتالىعى – «Iconic Building-1» حالىقارالىق بيزنەستى دامىتۋ ورتالىعى بولماق. قانات بوزىمباەۆ وقم, وبلىس اكىمدىگى جانە ينۆەستورلارعا بۇل عيماراتتىڭ قۇرىلىسىن جەدەلدەتۋدى تاپسىردى. ونىڭ ايتۋىنشا, بۇل نىسان «Alatau City» جوباسىنىڭ رەسمي باستاماسىنىڭ رامىزىنە اينالماق.
«Golden District» كىشى الماتى جانە قاسكەلەڭ وزەندەرىنىڭ اراسىنداعى تاسجول بويىندا ورنالاسقان. بۇل ايماق عىلىم, ءبىلىم جانە مەديتسينا ورتالىعى رەتىندە دامىتىلماق. مۇندا «K-Park» مادەني-بيزنەس كەشەنى, حالىقارالىق ءبىلىم ورتالىعى, زاماناۋي اكادەمقالاشىق, كوپسالالى مەديتسينالىق كلاستەر بوي كوتەرەدى. سونىمەن قاتار «Hyundai Green Food Almaty» جانە «Mars» سياقتى الەمدىك كومپانيالاردىڭ جوبالارىن جۇزەگە اسىرۋ جوسپارلانعان.
«Growing District» «الماتى – قاپشاعاي» اۆتوجولى بويىندا جانە «جەتىگەن – قازىبەك» تەمىرجول جەلىسىنىڭ ماڭىندا ورنالاسادى. بۇل ايماق ەكسپورتقا باعىتتالعان وندىرىستىك جانە لوگيستيكالىق ورتالىق رەتىندە دامىتىلادى. كولىك دالىزدەرىنىڭ توعىسىندا ورنالاسۋى جانە اۋەجايعا جاقىندىعى ەكولوگيالىق تازا وندىرىستەردى دامىتۋعا ەرەكشە مۇمكىندىك بەرەدى.
قانات بوزىمباەۆ بۇل جەردە حالىقارالىق «Rhenus Logistics» كومپانياسىنىڭ باسشىلىعىمەن كەزدەسىپ, الاتاۋدا كولىك-وندىرىستىك حاب قۇرۋداعى ىنتىماقتاستىق ماسەلەلەرىن تالقىلادى. اۋماعى 31 730 گەكتاردى قۇرايتىن «Green District» قاپشاعاي سۋقويماسىمەن, قاسكەلەڭ وزەنىمەن جانە قوناەۆ قالاسىمەن شەكتەسەدى. مۇندا كۋرورتتىق ايماقتار مەن ساياباقتار سالىنىپ, بولاشاقتا «فورمۋلا-1» جارىس تاسجولى, «Iconic Building-2» تۋريستىك ورتالىعى بوي كوتەرەدى. بۇل ايماق الماتى اگلومەراتسياسىنىڭ باستى تۋريستىك جانە دەمالىس ورتالىعىنا اينالماق.
جۇمىس ساپارى بارىسىندا قانات بوزىمباەۆ مينيسترلىكتەر وكىلدەرى, ينۆەستورلار, بيزنەس قاۋىمداستىعى, حالىقارالىق ساراپشىلار جانە پرەزيدەنتتىڭ شتاتتان تىس كەڭەسشىسى ۆونگ حەن فايننىڭ قاتىسۋىمەن جوبالىق وفيس وتىرىسىن وتكىزدى. جيىندا وتاندىق جانە شەتەلدىك ينۆەستيتسيالاردى قورعاۋ, كەلىسىمشارتتاردىڭ تۇراقتىلىعىن قامتاماسىز ەتۋ, قىتايدىڭ «CRDI» كومپانياسىمەن بىرلەسكەن كەڭەس بەرۋ تەتىكتەرى, الاتاۋ قالاسىنىڭ دامۋ كەڭەسىن قۇرۋ جانە «Alatau City Authority» مەملەكەتتىك قورىنىڭ جارعىسىن بەكىتۋ سياقتى ماسەلەلەر قارالدى. سونىمەن بىرگە مەملەكەت باسشىسىنىڭ الاتاۋ قالاسىن دامىتۋ جونىندەگى جارلىعىنىڭ ورىندالۋ بارىسى جانە «الاتاۋ قالاسىنىڭ ارنايى مارتەبەسى تۋرالى» كونستيتۋتسيالىق زاڭ جوباسىنىڭ ورىندالۋ بارىسىن دا تالقىلادى.
كەزدەسۋ قورىتىندىسىندا ۆيتسە-پرەمەر جاۋاپتى مەملەكەتتىك ورگاندارعا الاتاۋ قالاسىن دامىتۋدا كەشەندى ءتاسىل قولدانۋدى جانە ءتيىمدى ۇيلەستىرۋدى قامتاماسىز ەتۋدى تاپسىردى.
الماتى وبلىسى