قازاقستاننىڭ وڭتۇستىگىندە كۇن سۋىتا باستايدى

كۇزدىڭ جىلى كۇندەرىنەن كەيىن سولتۇستىك وڭىرلەردىڭ تۇرعىندارى قىستىڭ لەبىن سەزىندى – تۇنگى ۋاقىتتا اۋا تەمپەراتۋراسى مينۋس كورسەتكىشتەرگە دەيىن تومەندەپ, كەيبىر اۋدانداردا جاڭبىر قارعا ۇلاستى. الداعى كۇندەرى سۋىق انتيتسيكلون قازاقستان اۋماعى ارقىلى جىلجۋىن جالعاستىرىپ, ەندى اۋا رايىنىڭ ناشارلاۋى وڭتۇستىك وڭىرلەردە دە كۇتىلەدى.

وسىلايشا, 1 قازاندا جامبىل, الماتى وبلىستارىندا جانە جەتىسۋ وبلىسىندا, ال 2 قازانعا قاراعان ءتۇنى تۇركىستان وبلىسىندا جاۋىن-شاشىن (جاڭبىردىڭ قارعا اۋىسۋى) بولجانادى. سونداي-اق, 1 قازان كۇنى كۇندىز اۋا تەمپەراتۋراسىنىڭ 5-10 گرادۋس جىلىلىققا دەيىن تومەندەۋى, 2 قازانعا قاراعان ءتۇنى 1-3 گرادۋس ۇسىك ءجۇرۋى مۇمكىن.