جىلۋعا جاۋاپتىلاردىڭ مالىمدەۋىنشە, تۇركىستان وبلىسى 2025-2026 جىلدارداعى جىلىتۋ ماۋسىمىنا تولىق دايىن, دەپ حابارلايدى Egemen.kz.
قۇرىلىس نورمالارى مەن ەرەجەلەرىنە سايكەس وڭىردە جىلىتۋ ماۋسىمى 148 تاۋلىكتى قۇرايدى. وبلىس اۋماعىندا جىلىتۋ ماۋسىمى اۋا رايىنا بايلانىستى 15 قازاننان باستاپ 1 قاراشاعا دەيىن كەزەڭ-كەزەڭىمەن ىسكە قوسىلادى دەپ جوسپارلانۋدا. ناقتىراق ايتقاندا, تۇلكىباس, قازىعۇرت, تولەبي, بايدىبەك, سوزاق, سايرام اۋداندارىندا جىلۋ جۇيەلەرىن قازان ايىنىڭ 15-نەن باستاپ قوسۋ جوسپارلانعان بولسا, كەنتاۋ قالاسىندا جىلۋ 25 قازاندا بەرىلمەك. سونىمەن قاتار تۇركىستان جانە ارىس قالالارى مەن ماقتاارال, جەتىساي, وتىرار, ورداباسى, سارىاعاش, ساۋران, كەلەس, شاردارا اۋداندارىن 1 قاراشاعا دەيىن جىلۋ جۇيەلەرىنە قوسۋ كوزدەلىپ وتىر.
وبلىس ورتالىعى تۇركىستان قالاسىندا 18 قازاندىق پەن ۇزىندىعى 56,3 شاقىرىم بولاتىن ورتالىقتاندىرىلعان جىلۋ جەلىسى جۇمىس ىستەيدى. بۇگىندە جىلۋ قازاندىقتارى 2025-2026 جىلدارداعى جىلۋ بەرۋ ماۋسىمىنا تولىق دايىن. ونىڭ ىشىندە 12 قازاندىق اكىمشىلىك-ىسكەرلىك ورتالىق پەن وتىرار شاعىن اۋدانىنداعى كوپ قاباتتى تۇرعىن ۇيلەر مەن الەۋمەتتىك نىسانداردى ۇزدىكسىز ىستىق سۋمەن قامتاماسىز ەتىپ وتىر. سونىمەن قاتار, سپورت, دەنساۋلىق ساقتاۋ, ءبىلىم بەرۋ, مادەنيەت جانە جۇمىسپەن قامتۋدى ۇيلەستىرۋ سالالارىنداعى بارلىق بيۋدجەتتىك مەكەمەلەردىڭ قازاندىقتارى تابيعي گازعا قوسىلعان. سونىمەن قاتار قاجەتتى وتىن قورلارى جاساقتالىپ, جەتكىزىلدى. جىلۋ بەرۋ ماۋسىمى كەزىندە اقاۋلاردىڭ الدىن الۋ ءۇشىن جەدەل ارەكەت ەتۋ توپتارى قۇرىلعان.