*بىلتىر شارۋالاردىڭ تۇقىم ساتىپ الۋىنا 832,7 ملن. تەڭگە ءبولىندى. ازىق-ت ۇلىك كەلىسىمشارت كورپوراتسياسى حابارلاعانداي, 2015 جىلدىڭ 17 اقپانىنداعى جاعداي بويىنشا قۇرىلىمعا قوستاناي جانە سولتۇستىك قازاقستان وبلىستارىنىڭ اگراريلەرىنەن جالپى سوماسى 1,5 ملرد. تەڭگەدەن استام 136 ءوتىنىم كەلىپ تۇسكەن.
*ەلىمىزدە بولشەك ساۋدا كولەمى 4,7 پايىزعا جوعارىلادى. ستاتيستيكا كوميتەتى ءباسپاسوز قىزمەتىنىڭ دەرەگىنشە, ازىق-ت ۇلىك ەمەس تاۋارلاردىڭ وتكىزىلۋى وتكەن جىلدىڭ ءتيىستى كەزەڭىمەن سالىستىرعاندا, 6,4 پايىزعا وسكەن. ال 2015 جىلدىڭ 1 اقپانىندا بولشەك ساۋدامەن اينالىساتىن كاسىپورىنداردىڭ تاۋار قورلارىنىڭ كولەمى 296,2 ملرد. تەڭگەنى قۇراعان.
*وتكەن جىلى تەحنيكالىق جانە كاسىبي ءبىلىم بەرۋ ۇيىمدارى تۇلەكتەرىنىڭ 70 پايىزى ەڭبەكپەن قامتىلدى. «كاسىپقور» حولدينگىنىڭ باسقارما ءتورايىمى ەلدانا سادۋاقاسوۆا جىل سايىن كاسىپورىندار وزدەرىنە ءىس-تاجىريبەگە تۇلەكتەر تارتۋ ءۇشىن كوللەدجدەرمەن كەلىسىم-شارت جاسايتىنىن مالىمدەدى. ايتا كەتەيىك, ەلىمىزدەگى 820 كوللەدجدىڭ 280-ىندە دۋالدى ءبىلىم بەرۋ جۇيەسى ەنگىزىلگەن, 280 مىڭنان استام جۇمىس ورنى كوللەدج ستۋدەنتتەرى ءۇشىن پراكتيكالىق ساباقتار اياسىندا ۇسىنىلادى.
*الماتى وبلىسىنداعى توقجايلاۋ پوليتەحنيكالىق كوللەدجىنە ءتيىستى قولداۋ كورسەتىلدى. الاكول اۋدانىنا قاراستى توقجايلاۋ اۋىلىنداعى اتالمىش ءبىلىم وشاعىندا 50 ورىندىق جاتاقحانا مەن 48 ورىندىق شەبەرحانالار كەشەنى پايدالانۋعا بەرىلدى. مۇندا بارلىق قاجەتتى جاعدايلار جاسالعان. جوبانىڭ جالپى قۇنى – 530 ملن. تەڭگە.
*قاراعاندى وبلىسىنداعى «جەڭىس» جشس جىلىنا 130 توننا قوي ەتىن وندىرە الادى. جاڭاارقا اۋدانىنا قاراستى سەرىكتەستىكتە 17 مىڭ اسىلتۇقىمدى قوي بار. وتكەن جىلى كاسىپورىن 3 جاڭا بازا سالدى, سونداي-اق, 1000 قوي مەن 150 جىلقىعا ارنالعان بورداقىلاۋ الاڭى ىسكە قوسىلدى. اۋىل شارۋاشىلىعى عىلىمدارىنىڭ دوكتورى, پروفەسسور تولەۋحان سادىقۇلوۆتىڭ سوزىنە قاراعاندا, ەلىمىزدە قويدىڭ جەتى ءتۇرى بار ەكەن. سونىڭ بەسەۋى قاراعاندىدا وسىرىلەدى.
*شىمكەنتتە اياقكيىمدەر شىعارىلا باستادى. قالاداعى اياقكيىم فابريكاسىنىڭ ديرەكتورى سانجار تىلەگەنوۆ ءمالىم ەتكەندەي, كاسىپورىن شەبەرلەرى ۇيدە كيەتىن سۇيرەتپەنىڭ 40 مىڭ جۇبىن تىگىپ ۇلگەرىپتى. ولار ەكى ماۋسىم بويىنشا اياقكيىم شىعارۋدى جوسپارلاپ وتىر. العاشقى كەزەڭىن جۇزەگە اسىرعان كاسىپكەر دايىن ءونىمىن ەلىمىزدىڭ وزگە دە قالالارىنا ساتۋدا. كاسىپكەر مەملەكەتتەن العان نەسيەسىن قايتارىپ ۇلگەرگەن.
*قىزىلوردا وبلىسىندا جىل ىشىندە 13 مىڭنان استام ادام كاسىپكەرلىككە بەت بۇردى. ايماق باسشىسى قىرىمبەك كوشەرباەۆ وتكەن جىلى «بيزنەستىڭ جول كارتاسى» شەڭبەرىندە كاسىپكەرلەردى قولداۋعا 1 ملرد. 400 ملن. تەڭگە بولىنگەنىن جەتكىزدى. قازىرگى تاڭدا وبلىس كاسىپكەرلىكتى دامىتۋ ءۇردىسى بويىنشا ايماقتار اراسىندا 1-ورىندا. ەكونوميكاداعى قيىندىقتارعا قاراماستان, بانكتەر كاسىپورىندارعا 2013 جىلمەن سالىستىرعاندا, 20 پايىزعا ارتىق نەسيە بەرگەن.
*سولتۇستىك قازاقستاندا «روستان» فيرماسىنىڭ ماي زاۋىتى جىل باسىنان بەرى 14 ملن. تەڭگەنىڭ ءونىمىن شىعاردى. اققايىڭ اۋدانىنداعى كاسىپورىن ايماقتاعى ەڭ وزات كاسىپورىندارىنىڭ ءبىرى. ول ەلىمىزدەگى تاۋار وندىرۋشىلەر نارىعىندا 17 جىل بويى جۇمىس ىستەپ كەلەدى. «التىن ساپا», «قازاقستاننىڭ ۇزدىك تاۋارى» رەسپۋبليكالىق بايقاۋلارىنىڭ جۇلدەسىن 4 جىل بويى قاتارىنان يەلەنگەن. وندا 50 ادام ەڭبەك ەتەدى.
حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە «24kz» تەلەارناسى دەرەكتەرى بويىنشا دايىندالدى.