پرەزيدەنت عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا عالىمداردىڭ اعارتۋشىلىق ميسسياسىنا ەرەكشە نازار اۋداردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«سىزدەر ءار سالانى تەرەڭ بىلەسىزدەر. اتقارىلىپ جاتقان جۇمىستىڭ ءمان-جايىن جاقسى تۇسىنەسىزدەر. سونى جاستارعا ايتىپ جەتكىزۋ كەرەك. ولاردىڭ بويىندا الەۋمەتتىك وپتيميزم قالىپتاستىرۋ وتە ماڭىزدى. زامان كۇردەلى بولسا دا, ءبىزدىڭ باعىتىمىز – دۇرىس. ەلىمىز قيىندىقتىڭ ءبارىن ەڭسەرىپ, ۇزدىكسىز دامىپ كەلەدى. بەس جىلدا قازاقستاننىڭ ىشكى جالپى ءونىمى 181 ميللياردتان 291 ميلليارد دوللارعا كوبەيدى. بيىلعى 8 ايدىڭ وزىندە ەكونوميكامىز 6,5 پايىزعا ءوستى. ەلىمىزدىڭ حالىقارالىق رەزەرۆى مەن ۇلتتىق قوردىڭ اكتيۆى 116 ميلليارد دوللاردان استى. سونىڭ ىشىندە حالىقارالىق رەزەرۆىمىز رەكوردتىق دەڭگەيگە جەتىپ, 54,6 ميلليارد دوللار بولدى. مۇنىڭ ءبارىن باسقا مەملەكەتتەر, بەدەلدى ۇيىمدار كورىپ وتىر, مويىنداپ جاتىر», دەدى قاسىم-جومارت توقاەۆ.
مەملەكەت باسشىسى مىسالى, Standard and Poor’s اگەنتتىگى بۇعان دەيىن ەلىمىزدىڭ دامۋىن «تۇراقتى» دەپ, ەندى «جاعىمدى» دەگەن بولجام جاساپ وتىرعانىن اتاپ ءوتتى.
«سىرت كوز – سىنشى». الەم قاۋىمداستىعىنىڭ قازاقستانعا دەگەن سەنىمى ءبىزدىڭ دۇرىس جولمەن كەلە جاتقانىمىزدى كورسەتەدى. الايدا حالىقارالىق رەيتينگتەردە جوعارى ورىن يەلەنۋ – ءبىز ءۇشىن ماقسات ەمەس, ونىڭ ۇستىنە بۇل توقمەيىلسۋگە سەبەپ بولا المايدى. ءبىز مۇنى ءتۇسىنۋىمىز كەرەك. ءبىزدىڭ باستى مىندەتىمىز – حالىقتىڭ ءال-اۋقاتىن ۇدايى ارتتىرۋ جانە ەلىمىزدىڭ باسەكەگە قابىلەتتىلىگىن كۇشەيتۋ. ءدال سول سەبەپتى ءبىز قيىن دا كۇردەلى وزگەرىستەر ارقىلى رەفورمالار جۇرگىزەمىز. بۇل وڭاي جول ەمەس. ەلىمىزدى باسقاشا وركەندەتە المايمىز. ءبارىمىزدىڭ ماقسات-مۇددەمىز – ءبىر. بۇل – ادىلەتتى, قۋاتتى, تازا ءارى قاۋىپسىز قازاقستاندى قۇرۋ. بۇل ىسكە عالىمدار قاۋىمى مول ۇلەس قوسادى دەپ سەنەمىن», دەدى مەملەكەت باسشىسى.