«جاساندى ينتەللەكت تەحنولوگيالارى سالاسىنداعى وتاندىق جانە حالىقارالىق ءبىلىم بەرۋ باعدارلامالارى ەلىمىزدىڭ كادرلىق الەۋەتىن نىعايتۋعا ۇلەس قوسا الادى. ۇكىمەتكە جاساندى ينتەللەكت سالاسىنداعى مامانداردى دايارلاۋ ءۇشىن «AI-Sana» باعدارلاماسىن كەزەڭ-كەزەڭىمەن جۇزەگە اسىرۋ ماسەلەسىن پىسىقتاۋدى تاپسىرامىن. باعدارلاما ءبىلىم بەرۋدى, زەرتتەۋلەردى جانە ستارتاپتاردى دامىتۋدى بىرىكتىرەتىن سەرپىندى ەكوجۇيە قالىپتاستىرۋعا ىقپال ەتۋگە ءتيىس. الەمنىڭ جەتەكشى ۋنيۆەرسيتەتتەرىنىڭ اكسەلەراتسيا تاجىريبەسىن پايدالانۋ قاجەت. قازاقستاننىڭ ءاربىر ازاماتىنا جاساندى ينتەللەكتىنىڭ پايداسىن ءتۇسىندىرۋ, ونىڭ نە ءۇشىن قاجەت ەكەنىن جانە ونى دۇرىس قولدانۋ جولدارىن جەتكىزۋ الداعى مىندەت», دەگەن ەدى پرەزيدەنت. مەملەكەت باسشىسى بيىلعى جولداۋىندا دا وسى باعدارلامانىڭ ماڭىزىن اتاپ ءوتتى.
مەملەكەت باسشىسىنىڭ تاپسىرماسىمەن قولعا الىنعان «AI-Sana» باعدارلاماسى – ەلىمىزدىڭ ءبىلىم, عىلىم جانە يننوۆاتسيا سالاسىنداعى ەڭ ءىرى قادامدارىنىڭ ءبىرى. «AI-Sana» – ستۋدەنتتەر اراسىندا جاساندى ينتەللەكت سالاسىنداعى داعدىلاردى جان-جاقتى دامىتۋعا باعىتتالعان بىرەگەي باعدارلاما. ول 100 مىڭ قاتىسۋشىنى قامتيدى جانە ەل ەكونوميكاسىنىڭ الەۋەتىن كوتەرۋگە, تەحنولوگيالىق كاسىپكەرلىكتى قولداۋعا باسىمدىق بەرەدى. اسىرەسە «DeepTech»-ستارتاپتاردى دامىتۋعا ەرەكشە نازار اۋدارىلعان, سەبەبى ولار ەلىمىزدىڭ تەحنولوگيالىق جانە ەكونوميكالىق ءوسىمىنىڭ نەگىزگى قوزعاۋشى كۇشى بولا الادى.
باعدارلاما حالىقارالىق ساراپشىلاردىڭ قاتىسۋىمەن ازىرلەنگەن. ونىڭ قالىپتاسۋىنا نەگىزگى ۇلەس قوسقان – ستەنفورد ۋنيۆەرسيتەتىنىڭ جوعارى ءبىلىم مەكتەبىنىڭ باس تەحنولوگيالىق ديرەكتورى ءارى قاۋىمداستىرىلعان دەكانى پول كيم. سونداي-اق باعدارلامانى ازىرلەۋدە «Stanford University», «Imperial College London», «King’s College London», «Royal Academy of Engineering», سونداي-اق «SETsquared», «UKSPA» سياقتى يننوۆاتسيالىق پلاتفورمالاردىڭ تاجىريبەسى پايدالانىلعان. بۇل سەرىكتەستەر الدىڭعى قاتارلى ءبىلىم مەن ۇزدىك تاجىريبەلەرگە جول اشىپ, باعدارلامانىڭ جاھاندىق تاجىريبەنى جەرگىلىكتى قاجەتتىلىكتەرمەن ۇشتاستىرۋىنا مۇمكىندىك بەرەدى. «AI-Sana» ءوز بەتىنشە ءبىلىم الۋ, زەرتتەۋ جانە قولدانبالى باعىتتاردى بىرىكتىرەتىن ءتاسىلدى قامتيدى. ونىڭ نەگىزگى ماقساتتارى:
جاساندى ينتەللەكت بويىنشا ىرگەلى ءبىلىم مەن داعدىلاردى قالىپتاستىرۋ. ەكونوميكانىڭ باستى سالالارىنا قاجەت كاسىبي ماماندار دايارلاۋ. جوو مەن عىلىمي زەرتتەۋ ينستيتۋتتارى نەگىزىندە «DeepTech»-ستارتاپتار گەنەراتسياسىن قولدايتىن تۇراقتى ەكوجۇيە قۇرۋ.«AI-Sana» ەلىمىزدى «ستارتاپ-ۇلت» يدەولوگياسىنا جەتەلەيتىن نەگىزگى قوزعاۋشى كۇشتەردىڭ ءبىرى بولماق. ول ادام كاپيتالىن دامىتۋعا, جوعارى تەحنولوگيالىق شەشىمدەردى ەنگىزۋگە جانە تەحنولوگيالىق كاسىپكەرلىكتى قولداۋعا ىقپال ەتىپ, بولاشاقتىڭ عىلىمعا نەگىزدەلگەن ەكونوميكاسىن قالىپتاستىرۋعا ارنالعان پلاتفورمالىق ەكوجۇيە جاسايدى.
مامانداردىڭ ايتۋىنشا, بۇل باستاما ەلىمىزدەگى ءداستۇرلى ءبىلىم جۇيەسىن وزگەرتىپ, عىلىمي زەرتتەۋ باعىتىنداعى ۋنيۆەرسيتەتتەردى قالىپتاستىرۋعا مۇمكىندىك بەرەدى. ۋنيۆەرسيتەتتەردىڭ حالىقارالىق تاجىريبەگە سۇيەنە وتىرىپ جاڭا فورماتقا كوشۋى ەلدىڭ زياتكەرلىك الەۋەتىن كوتەرىپ قانا قويماي, الەمدىك تەحنولوگيالىق جارىستا العا شىعۋىنا جاعداي جاسايدى.
عىلىم جانە جوعارى ءبىلىم ءمينيسترى ساياسات نۇربەكتىڭ سوزىنشە, جاڭا تەحنولوگيالاردى يگەرۋ بولاشاق ماماندار ءۇشىن عانا ەمەس, ەلدىڭ ەكونوميكالىق قۋاتى مەن باسەكەگە قابىلەتتىلىگى ءۇشىن عانا دە ستراتەگيالىق ماڭىزعا يە. ۋنيۆەرسيتەتتەردەگى وزگەرىستەر مەن ستۋدەنتتەردىڭ باستامالارى قازىردىڭ وزىندە ايتارلىقتاي ناتيجە بەرە باستادى.
«باعدارلاما جۇزەگە اسىپ جاتقان 5 ايدا ءبىزدىڭ ستۋدەنتتەر 119 جاساندى ينتەللەكت اگەنتىن قۇردى, تاعى 395-ءى ازىرلەنىپ جاتىر. ناتيجەسىندە, 20 ۋنيۆەرسيتەتتە جي, ماشينالىق وقىتۋ جانە كيبەرقاۋىپسىزدىك سالاسىندا 25 جاڭا ءبىلىم باعدارلاماسى اشىلدى», دەيدى مينيستر.
«Satbayev University» – «AI-Sana» باعدارلاماسىن جوعارى ءبىلىم جۇيەسىنە ەنگىزەتىن 27 تىرەك ۋنيۆەرسيتەتتىڭ ءبىرى. ۋنيۆەرسيتەت «Huawei ICT Academy» كۋرستارىن جانە ءوزىنىڭ اۆتورلىق باعدارلامالارىن قازاق جانە اعىلشىن تىلدەرىندە ۇسىنىپ وتىر. «Satbayev University» تاراپىنان ازىرلەنگەن «بارشاعا ارنالعان جاساندى ينتەللەكت» كۋرسىن قازىرگە دەيىن 12 مىڭنان استام ادام, سونىڭ ىشىندە 654 وقىتۋشى اياقتاپ ۇلگەرگەن. وقۋ مازمۇنى ينجەنەرلىك جانە قولدانبالى مىندەتتەردە جي-ءدى قولدانۋعا باعىتتالعان.
ساتباەۆ ۋنيۆەرسيتەتىنىڭ اكادەميالىق ماسەلەلەر جونىندەگى پرورەكتورى رايسا وسكەنباەۆانىڭ ايتۋىنشا, وقۋ ورنىندا جاساندى ينتەللەكت سالاسىنداعى باستامالار وتە كوپ. ول ۋنيۆەرسيتەتتىڭ وقۋ باعدارلامالارىن جاڭارتىپ, زاماناۋي جي-تەحنولوگيالارىن ءبىلىم ۇدەرىسىنە ەنگىزىپ جاتقانىن اتاپ ءوتتى. سونىمەن قاتار يندۋستريالىق سەرىكتەستەرمەن ىنتىماقتاستىق دامىپ, تۇلەكتەردىڭ كاسىبي دايىندىعى جاڭا دەڭگەيگە كوتەرىلىپ جاتقانىن جەتكىزدى.
«بۇگىندە جاساندى ينتەللەكت – تەحنولوگيا عانا ەمەس, ءبىلىم مەن عىلىمدى جاڭا دەڭگەيگە كوتەرەتىن قۋاتتى قۇرال. «Satbayev University» وسى باعىتتى باسىمدىققا الىپ وتىر. ۋنيۆەرسيتەتىمىزدىڭ وقۋ باعدارلامالارى جاڭارتىلىپ جاتىر. ءبىز تەوريالىق ءبىلىم بەرىپ قانا قويماي, ستۋدەنتتەرگە ناقتى جوبالاردا جۇمىس ىستەۋ مۇمكىندىگىن ۇسىنامىز. جي-تەحنولوگيالارىن ءبىلىم ۇدەرىسىنە ەنگىزۋ – بولاشاق ينجەنەرلەر مەن عالىمداردىڭ كاسىبي دايىندىعىن جاڭا ساپاعا شىعارادى. مىسالى, ستۋدەنتتەرىمىز «Big Data» تالداۋ, ماشينالىق وقىتۋ, نەيروندىق جەلىلەر قۇرۋ, روبوتتەحنيكا سياقتى سالالاردا تاجىريبە جيناپ جاتىر. بۇل – ەرتەڭگى كۇنى ەڭبەك نارىعىندا سۇرانىسقا يە بولاتىن ماماندىقتار», دەيدى ر.وسكەنباەۆا.
«عىلىم قورى» اق باسقارما توراعاسى كامىل اقاتوۆتىڭ ايتۋىنشا, ەلىمىز ءبىلىم, عىلىم سالاسىنا جاساندى ينتەللەكتىنى ەنگىزۋگە تولىق دايىن.
«AI-Sana» باعدارلاماسى – ەلىمىز ءۇشىن ستراتەگيالىق ماڭىزى بار قادام. بۇگىندە جاساندى ينتەللەكتىنى ەنگىزۋگە تولىق دايىنبىز. عىلىم قورى يننوۆاتسيالاردى قولداۋدىڭ جاڭا تاسىلدەرىن ەنگىزىپ, ەلدە جي-ەكوجۇيەنىڭ قالىپتاسۋىنا سەرپىن بەرۋدى كوزدەپ وتىر. ءبىزدىڭ ماقسات – جەكەلەگەن عىلىمي جوبالاردى قارجىلاندىرۋ عانا ەمەس, تەحنولوگيالىق دامۋدى جەدەلدەتەتىن جۇيەلى شەشىمدەر قابىلداۋ», دەيدى ول.