بيىل ەلىمىزدە 3025 ءبىلىم بەرۋ ۇيىمى مەملەكەتتىك اتتەستاتسيادان وتەدى. بۇل تۋرالى وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتى مالىمدەدى, دەپ حابارلايدى Egemen.kz.
2025 جىلدىڭ العاشقى التى ايىندا اۋماقتىق دەپارتامەنتتەر 1170 مەكەمەدە اتتەستاتسيا جۇرگىزىپ ۇلگەرگەن. تەكسەرۋ بارىسىندا وقۋ ۇدەرىسىنىڭ مەملەكەتتىك ستاندارتتارعا جانە بىلىكتىلىك تالاپتارىنا سايكەستىگى باعالانىپ, پروبلەمالىق تۇستار انىقتالعان.
«وتكەن جىلى كوميتەت پەن ونىڭ اۋماقتىق دەپارتامەنتتەرى 2487 ءبىلىم بەرۋ ۇيىمىندا ءتۇرلى تەكسەرۋلەر جۇرگىزدى, ونىڭ ىشىندە مەملەكەتتىك اتتەستاتتاۋ, پروفيلاكتيكالىق باقىلاۋ, شاعىمدار بويىنشا جوسپاردان تىس تەكسەرۋلەر جۇرگىزىلدى. تەكسەرۋ ناتيجەسىندە مۇعالىمدەردىڭ بىلىكتىلىگىن ارتتىرۋ كۋرستارىنىڭ ۋاقتىلى اياقتالماۋى, مەكتەپتەردىڭ ماتەريالدىق-تەحنيكالىق بازاسىنىڭ تالاپقا ساي قامتاماسىز ەتىلمەۋى فاكتىلەرى انىقتالدى», دەپ اتاپ ءوتتى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى سەرىك ءاشىروۆ.
ۆەدومستۆو وكىلدەرى باقىلاۋ جۇمىستارىنىڭ باستى ماقساتى – ءبىلىم ساپاسىن كوتەرۋ ءارى پەداگوگتەردىڭ قۇقىقتارىن قورعاۋ ەكەنىن اتاپ ءوتتى.