استانا اكىمى جەڭىس قاسىمبەك ليۆەرپۋلدە وتكەن الەم چەمپيوناتىندا جەڭىمپاز اتانعان بوكسشىلاردى قابىلداپ, ولارعا 30 ميلليون تەڭگە قارجىلاي سەرتيفيكات تابىس ەتتى, دەپ حابارلايدى Egemen.kz.
سانجار تاشكەنباي ەكى دۇركىن الەم چەمپيونى اتاندى. سانجار العاش رەت 2023 جىلى 19 جاسىندا 48 كگ سالماق دارەجەسىندە الەم چەمپيوناتىن جەڭىپ العان ەدى, ەكى جىلدان كەيىن بۇل جەتىستىگىن ليۆەرپۋلدە 50 كگ سالماقتا قايتالاپ وتىر. ايبەك ورالباي ءوز ەسىمىن قازاقستان سپورتى تاريحىندا التىن ارىپتەرمەن جازدى. ول الەم چەمپيوناتىندا سۋپەراۋىر سالماقتا ەل تاريحىنداعى تۇڭعىش التىن مەدالدى جەڭىپ الدى. ناتيجەسىندە ەلىمىز جالپى ەسەپتە ءبىرىنشى ورىنعا شىعىپ, 7 التىن, 1 كۇمىس جانە 2 قولا مەدال جەڭىپ الدى.
«سپورتشىلارىمىز نامىستى قولدان بەرمەي, كەرەمەت ناتيجە كورسەتتى. ولار ءوز ۇلگىسىمەن ەڭبەكتىڭ, ءتارتىپتىڭ جانە وزىنە دەگەن سەنىمنىڭ ۇلكەن جەتىستىكتەرگە اپاراتىنىن كورسەتتى. بۇل جەتىستىكتەرگە باپكەرلەرىنىڭ دە قوسقان ۇلەسى زور. استانا ىلعي دا سپورتتى قولداپ, تالانتتى سپورتشىلارىمىزدىڭ دامۋىنا جاعداي جاساپ كەلەدى. ماسەلەن, قالامىزدا بوكستى دامىتۋ ورتالىعى بار, ال بيىل بەكزات ساتتارحانوۆ اتىنداعى سپورت كەشەنى پايدالانۋعا بەرىلدى», دەپ جازدى قالا اكىمى.
سونىمەن قاتار, جەڭىس قاسىمبەك جەڭىسكە جەتكەن سپورتشىلاردى قۇتتىقتاپ, جاڭا جەتىستىكتەر مەن بيىك بەلەستەردى باعىندىرۋدى تىلەدى.