پرەمەر-مينيستر ەلىمىزدەگى ەگىن جيناۋ ناۋقانىنىڭ بارىسىن قاراۋ قورىتىندىسى بويىنشا ءتيىستى مينيسترلىكتەر مەن اكىمدىكتەرگە ناقتى تاپسىرمالار جۇكتەدى, دەپ جازادى Egemen.kz.
اۋىل شارۋاشىلىعى مينيسترلىگى وبلىس اكىمدىكتەرىمەن بىرلەسىپ, ەلەۆاتورلاردا استىقتىڭ جاڭا ءتۇسىمىن دەر كەزىندە قابىلداپ, كەپتىرۋدى ۇيىمداستىرۋعا مىندەتتەلدى. ءونىمدى ساقتاۋ ينفراقۇرىلىمىن تولىق پايدالانۋ قاجەتتىگى دە اتاپ ءوتىلدى. سونىمەن بىرگە استىقتى, جەمىس-جيدەك پەن كوكونىس ونىمدەرىن ساقتاۋ قىزمەتىنىڭ باعاسىن نەگىزسىز كوتەرۋگە جول بەرمەۋ تاپسىرىلدى. قاجەت بولعان جاعدايدا بۇل جۇمىسقا باسەكەلەستىكتى قورعاۋ جانە دامىتۋ اگەنتتىگى دە تارتىلماق.
كولىك مينيسترلىگى «قازاقستان تەمىر جولى» كومپانياسىمەن بىرلەسىپ, استىق تاسىمالدايتىن ۆاگوندار مەن جۇك كولىكتەرىنىڭ جەتكىلىكتى كولەمىن قامتاماسىز ەتۋگە مىندەتتەلدى. اۋىل شارۋاشىلىعى مينيسترلىگىمەن بىرگە تاسىمالداۋ كەستەسىن ۇيلەستىرۋ قاجەتتىگى دە ايتىلدى.
ەگىن جيناۋ ناۋقانى كەزىندە ازىق-ت ۇلىك تاۋارلارىنىڭ قورىن جاساقتاۋ تاپسىرىلدى. ءوڭىر اكىمدىكتەرى كوكونىس ونىمدەرىنىڭ نەگىزگى تۇرلەرىن قاجەتتى كولەمدە جەتكىزۋ ءۇشىن قىركۇيەك ايىنىڭ سوڭىنا دەيىن كەلىسىمشارت جاساسۋى ءتيىس.
ساۋدا مينيسترلىگى اۋىل شارۋاشىلىعى ونىمدەرىنە باعا بەلگىلەۋ تىزبەگىندە دەلدالدىق سحەمالارعا قارسى شارالار قابىلداپ, فەرمەرلەر ءۇشىن ءادىل شارتتارمەن ساتىلىمدى قامتاماسىز ەتۋگە مىندەتتەلدى. سونىمەن قاتار نەگىزگى ازىق-ت ۇلىك تاۋارلارى باعاسىنىڭ ورىنسىز وسۋىنە جول بەرمەۋ ءۇشىن مينيسترلىك اكىمدىكتەرمەن بىرلەسىپ, باعا ساياساتىن رەتتەۋدىڭ بارلىق تەتىگىن قولدانۋى قاجەت.
اۋىل شارۋاشىلىعى مينيسترلىگى وبلىس اكىمدىكتەرىمەن بىرلەسىپ, ۇكىمەت جانىنداعى جەدەل شتاب اياسىندا ەگىن وراعىنىڭ ساپالى وتۋىنە تۇراقتى باقىلاۋ جۇرگىزەدى.