بۇل ەلىمىزدەگى اگروونەركاسىپتىك كەشەننىڭ بولاشاعىن وزگەرتەتىن, جەر مەن ەگىستىكتەردىڭ جاعدايىن تالداۋ ءۇشىن درونداردان الىنعان دەرەكتەردى جاساندى ينتەللەكت الگوريتمدەرىمەن بىرىكتىرەتىن تسيفرلىق جۇيەنىڭ جوباسى رەتىندە قولعا الىنعان, دەپ حابارلايدى Egemen.kz.
سارسەن امانجولوۆ اتىنداعى شىعىس قازاقستان ۋنيۆەرسيتەتىنىڭ زەرتتەۋشىلەرىنىڭ ازىرلەمەسى توپىراق پەن داقىلداردىڭ كورسەتكىشتەرىن جوعارى دالدىكپەن انىقتاپ, اۋىل شارۋاشىلىعىن تەك تەحنولوگيالىق قانا ەمەس, سونىمەن قاتار ەكونوميكالىق تۇرعىدان ءتيىمدى باسقارۋعا جول اشادى.
س.امانجولوۆ اتىنداعى شقۋ عىلىمي قىزمەتكەرى الماسبەك ماۋليت جوبا جونىندە: ء«بىزدىڭ جوبانىڭ نەگىزىندە مۋلتيسپەكترالدى كامەرامەن جابدىقتالعان درون جاتىر. ول بىردەن بەس سپەكتردە ءتۇسىرىلىم جۇرگىزەدى: قىزىل, كوك, جاسىل, جاقىن جانە ورتاشا ينفراقىزىل. مۇنداي ءادىس ادام كوزىنە كورىنبەيتىندى «كورۋگە» مۇمكىندىك بەرەدى: توپىراقتاعى ىلعال دەڭگەيى, حلوروفيلل مولشەرى, وسىمدىكتەردىڭ اۋرۋ بەلگىلەرى نەمەسە جەردىڭ توزۋى. الىنعان بەينەلەردى جاساندى ينتەللەكت تالدايدى. الگوريتم داقىلدار مەن ارامشوپتەردى اجىراتىپ, ولاردىڭ تارالۋىن انىقتايدى, ءتىپتى اۆتوماتتى تۇردە زاقىمدانعان اۋماقتاردىڭ كارتاسىن جاسايدى. بۇل فەرمەرلەرگە جەدەل ارەكەت ەتۋگە جاعداي جاسايدى – ماسەلەنى جەرگىلىكتى دەڭگەيدە شەشۋ, ەگىس اينالىمىن جوسپارلاۋ نەمەسە ءوسىرۋ تەحنولوگياسىن تۇزەتۋ مۇمكىندىگى پايدا بولادى», دەپ پىكىر ءبىلدىردى.
جوبانىڭ قولدانىستاعى پايداسى ايقىن. جۇيە تىڭايتقىشتار مەن وسىمدىكتى قورعاۋ قۇرالدارىن ۇنەمدى پايدالانۋعا, شىعىندى ازايتۋعا, پروبلەمالى اۋماقتاردى ەرتە انىقتاپ ءونىم جوعالتۋدى قىسقارتۋعا, تابىستىلىقتى ارتتىرۋعا, سونداي-اق ينۆەستورلار مەن مەملەكەتتىك ورگاندار ءۇشىن جەردىڭ ءادىل باعاسىن بەرۋگە كومەكتەسەدى. وسىلايشا, ۋنيۆەرسيتەتتىك ازىرلەمەنىڭ نەگىزىندە ءاربىر شارۋاشىلىق ءوز القابىنىڭ «دەنساۋلىق كارتاسىن» جاساي الادى.