قازاقستان اراعا 26 جىل سالىپ, گرەك-ريم كۇرەسىنەن الەم چەمپيوناتىنىڭ باس جۇلدەسىنە قول جەتكىزدى, دەپ حابارلايدى Egemen.kz.
حورۆاتيا استاناسى زاگرەبتە ءوتىپ جاتقان گرەك-ريم كۇرەسىنەن الەم چەمپيوناتىندا قازاقستان قورجىنىنا التىن مەدال ءتۇستى.
وتانداسىمىز ايدوس سۇلتانعالي 60 كگ دەيىنگى سالماقتىڭ فينالىندا الىشەر گانيەۆتەن (وزبەكستان) باسىم ءتۇستى.
تۋريزم جانە سپورت مينيسترلىگى مالىمەتىنشە, ايدوس قازاقستانعا 26 جىلدان كەيىن ەرەسەكتەر اراسىنداعى الەم چەمپيوناتىنىڭ التىنىن سايلادى.
وسىعان دەيىن گرەك-ريم كۇرەسىنەن افينىدا 1999 جىلى وتانداسىمىز محيتار مانۋكيان (63 كگ) توپ جارعان. وسى ارالىقتا المات كەبىسپاەۆ, مەيرامبەك ايناعۇلوۆ, دەمەۋ جادىراەۆ, قورلان جاقانشا, ەرجەت جارلىقاسىن سىندى بوزكىلەم شەبەرلەرى باس جۇلدەگە ءبىر تابان جاقىن بولدى.
جالپى العاندا سۇلتانعالي – ەگەمەندىك العاننان بەرى كۇرەستىڭ وسى تۇرىنەن ەرەسەكتەر اراسىنداعى الەم چەمپيوناتىنىڭ فينالىندا كۇرەسكەن ونىنشى قازاق پالۋانى.
گرەك-ريم كۇرەسى ەلىمىزدە بۇقارالىق سيپات العان تانىمال سپورت ءتۇرىنىڭ قاتارىنا كىرەدى. بۇگىندە بۇل جەتىستىكتىڭ ءبارى مەملەكەت تاراپىنان كۇرەسكە باسىمدىق بەرىلىپ, بارلىق جاعداي جاسالىپ جاتقاننىڭ ارقاسىندا.
29 جاستاعى قىزىلوردالىق سپورتشى وسىعان دەيىن 60 كگ دەيىنگى سالماقتا الەم چەمپيوناتىندا 2 رەت قولا مەدال يەلەنگەن. سۇلتانعالي كەشە حورۆاتياداعى باسەكەنىڭ ىرىكتەۋىندە ماكسۆەلل حوپپەر بلەكتى (اقش), مەلكامۋ فەتەنەنى (يزرايل), شيرەك فينالدا پاريج وليمپياداسىنىڭ قولا جۇلدەگەرى, ازيا ويىندارىنىڭ قولا جۇلدەگەرى سەۋن ءليدى (سولتۇستىك كورەيا) جىقتى. جارتىلاي فينالدا اميران چاۆادزەدەن (گرۋزيا) مىقتى ەكەنىن دالەلدەدى.