مەكتەپ وقۋشىلارى ادامعا داۋسىن قايتاراتىن قۇرىلعى ويلاپ تاپتى

«مەن بۇرىن داۋىسىمدى جوعالتۋ دەگەننىڭ قانداي ەكەنىن مۇلدە ويلاماپپىن. ءبىز سويلەي الاتىنىمىزعا ۇيرەنىپ كەتكەنىمىز سونشالىق, ونى ادەتتەگى نارسە دەپ قابىلدايمىز. الايدا ءبىر ساتتە بىرەۋ ءۇشىن داۋىس – جاي عانا ارمان ەكەنىن تۇسىنەسىڭ», – دەپ ەسكە الدى جوبانىڭ نەگىزىن قالاۋشىلاردىڭ ءبىرى ايزەرە.

ءدال وسى ويدان جوبا تاريحى باستالعان. كوماندا وزدەرىنە ۇلكەن ماقسات قويدى: داۋىسىنان ايىرىلعان ادامدارعا كومەكتەسۋ جانە سويلەۋ مۇمكىندىگىن قايتاراتىن تەحنولوگيا جاساۋ.

VoiceX قالاي جۇمىس ىستەيدى

كوماندا جاساعان قۇرىلعى مويىن ايماعىنداعى ميكروۆيبراتسيالاردى سەنسورلار ارقىلى تىركەپ, الگوريتمدەر كومەگىمەن ولاردى ماتىنگە جانە سويلەۋگە تۇرلەندىرەدى. ەرەكشەلىگى – سينتەزدەلگەن سويلەۋ تابيعي ەستىلىپ, ادامنىڭ ءوز داۋسىنا بارىنشا ۇقسايدى. ول ءۇشىن جاساندى ينتەللەكتكە مىڭداعان اۋديوجازبا نەگىزىندە ۇيرەتۋ جۇرگىزىلگەن, ال ارنايى الگوريتم داۋىس تەمبرى, ينتوناتسياسى مەن ىرعاقتارىن تاڭداۋعا مۇمكىندىك بەرەدى. كوماندانىڭ ايتۋىنشا, قازىرگى بار كەيبىر تەحنولوگيالارداعى «روبوت ءتارىزدى» دىبىستان VoiceX ءدال وسى تابيعيلىعىمەن ەرەكشەلەنەدى.

پايدالانۋ جولى قاراپايىم: قولدانۋشى داۋسىنان ايىرىلماي تۇرعان كەزدە جازىلعان اۋديوفايلدى قوسىمشاعا جۇكتەيدى, كەيىن قۇرىلعىنى موينىنا تاعادى — جۇيە سول ساتتە-اق ونىڭ ءوز داۋسىن سينتەزدەپ بەرە باستايدى.

«قاراپايىم قادامداردىڭ ارتىندا ۇلكەن جۇيە جاتىر: سەنسورلار ۆيبراتسيالاردى انىقتايدى, الگوريتمدەر ونى سوزگە اينالدىرادى, باعدارلاما ءبىر مەزەتتە ادامنىڭ ءوز داۋىسىن شىعارىپ بەرەدى», – دەپ ءتۇسىندىردى جوبا اۆتورلارى.

نەگە بۇل ماڭىزدى؟

كوماندا ءۇشىن داۋىس – ادامنىڭ تۇلعاسىنىڭ ءبىر بولىگى. زەرتتەۋلەرگە سايكەس, الەمدەگى ادامداردىڭ شامامەن 20 پايىزى ومىرىندە كەم دەگەندە ءبىر رەت داۋىسقا بايلانىستى ماسەلەلەرگە تاپ بولادى, ولاردىڭ ءبىر بولىگى دەپرەسسياعا ۇشىراپ, قوعامنان وقشاۋلانادى.

«مەن بالا كەزدەن ءان ايتۋدى جاقسى كورەمىن. سول سەبەپتى داۋىس مەن ءۇشىن ەڭ قىمبات دۇنيەلەردىڭ ءبىرى. ءان ايتۋدان نەمەسە جاي عانا سويلەسۋدەن ايىرىلىپ قالۋدىڭ قانداي ەكەنىن ەلەستەتە المايمىن. سوندىقتان بۇل يدەيانى جۇرەگىمە ەرەكشە جاقىن تۇتىپ, ادامدارعا قول ۇشىن بەرۋدى وزىمە پارىز سانادىم», – دەدى كوماندا مۇشەسى جانيا.

جوبا كومانداسىندا جەتى ادام بار: نەگىزىن قالاۋشىلار – ايزەرە, اجارا, جانيا جانە بەكجان, سونداي-اق توپ مۇشەلەرى – مەرەي, سۇنقار جانە اسقار. ءبىرى باعدارلامالاۋمەن اينالىسسا, ءبىرى جاساندى ينتەللەكتىنى ۇيرەتتى, تاعى ءبىرى ديزاين مەن ءپروتوتيپتى جاسادى, قالعاندارى زەرتتەۋ جۇرگىزىپ, ساراپشىلارمەن جۇمىس ىستەدى.

ء«بىزدىڭ جوبامىزدى ويلاسام, ءتىپتى مەكتەپ وقۋشىلارى دا ادام ءومىرىن وزگەرتەتىن جوبالاردى جۇزەگە اسىرا الاتىنى شابىتتاندىرادى. ءبىز جاي عانا يدەيادان باستادىق, ال قازىر داۋسىن قايتاراتىن ناقتى ءپروتوتيپىمىز بار», – دەدى اجارا.

ساراپشىلارمەن جۇمىس جانە ناتيجەلەر

جوبانى مەديتسينالىق دەڭگەيگە جاقىنداتۋ ءۇشىن وقۋشىلار USC جانە Stanford ۋنيۆەرسيتەتتەرىنىڭ پروفەسسورلارىمەن, سونداي-اق باس جانە مويىن حيرۋرگتارىمەن اقىلداستى. ساراپشىلاردىڭ كومەگىمەن الگوريتمدەر جەتىلدىرىلىپ, سينتەزدىڭ دالدىگى ارتتى. قازىرگى تاڭدا VoiceX-ءتىڭ بىرنەشە جۇمىس ىستەيتىن نۇسقاسى بار, كوماندا دىبىس ساپاسىن ودان ءارى جاقسارتىپ جاتىر.

«VoiceX قاراپايىم جوبا ەمەس, ول – جاڭا ومىرگە جول اشاتىن ءۇمىتتىڭ سيمۆولى. ءبىز ءۇشىن VoiceX – ءار ادام ءۇشىن سويلەۋ جانە ەستىلۋ قۇقىعى بار الەمگە جاقىنداتاتىن قادام. بۇل جوبا ادامدارعا قۋانىشىن, قارىم-قاتىناسىن جانە ەموتسياسىن قايتارۋعا مۇمكىندىك بەرەدى», – دەپ اتاپ ءوتتى كوماندا مۇشەلەرى.

جوبا بىرقاتار سايىستاردا جەڭىسكە جەتىپ, بەدەلدى Samsung Solve for Tomorrow بايقاۋىنىڭ جارتىلاي ءفيناليسى اتاندى. VoiceX My Extra Lab جانە Samsung تاراپىنان قولداۋ الىپ وتىر. قازىرگى ۋاقىتتا جوبا پاتەنتتەۋ كەزەڭىنەن وتۋدە. كوماندا تەحنولوگيانى دامىتۋدى, سەرىكتەستەر اۋقىمىن كەڭەيتۋدى جانە VoiceX-ءتى جۇزدەگەن, مىڭداعان ادامنىڭ ءوز داۋسىن – دەمەك ءوز بولمىسىن – قايتا تابۋىنا كومەكتەسەتىن ءونىم دەڭگەيىنە شىعارۋدى كوزدەيدى.