بۇگىن استانادا گرەك-ريم كۇرەسىنەن قازاقستان رەسپۋبليكاسى پرەزيدەنتىنىڭ كۋبوگى جولىنداعى حالىقارالىق تۋرنير باستالادى. دەڭگەيى جاعىنان باسقا دا ءىرى حالىقارالىق باسەكەلەردەن كەم تۇسپەيتىن بۇل جارىسقا بيىل 8 ەلدىڭ قۇرامالارى قاتىساتىن بولادى.
تۋرنيرگە قۇرمەتتى قوناق رەتىندە ءFىLA پرەزيدەنتى رافاەل مارتينەتتي (شۆەيتساريا), وليمپيادانىڭ ءۇش دۇركىن چەمپيونى الەكساندر كارەلين (رەسەي), وليمپيادا چەمپيوندارى ميحايل مامياشۆيلي (رەسەي) مەن چابا حەگەدۋش (ۆەنگريا) شاقىرىلىپ وتىر. ءFىLA بيۋروسىنىڭ مۇشەسى, “سامۇرىق-قازىنا-استانا” كورپوراتيۆتى قورىنىڭ باس ديرەكتورى داۋلەت تۇرلىحانوۆتىڭ ايتۋىنشا, ەلوردا تورىندە توسەلگەن كىلەمدە قازاقستاننىڭ ۇزدىك بالۋاندارى نامىستى قولدان بەرمەۋگە بار كۇشتەرىن سالادى. بۇل باسەكە ۇلتتىق قۇراما ءۇشىن الداعى كەزدە ماسكەۋدە وتەتىن الەم چەمپيوناتى مەن قىتايدا جالاۋىن كوتەرەتىن جازعى ازيا ويىندارىنا دايىندىق رەتىندە وتكىزىلەدى.
استانادا وسى كۇندەرى تاعى ءبىر ەلباسى كۋبوگى جولىنداعى تۋرنير وتۋدە. كاراتەنىڭ شينكيوكۋشينكاي تۇرىنەن ءوتىپ جاتقان دوداعا قازاقستان, گرۋزيا, جاپونيا, قىرعىزستان, وزبەكستان مەن رەسەيدىڭ 150-دەن استام سپورتشىلارى قاتىسۋدا.
ال 6-11 شىلدە كۇندەرى الماتىدا ۆولەيبولدان قازاقستان پرەزيدەنتىنىڭ كۋبوگى جولىنداعى ءداستۇرلى حالىقارالىق تۋرنير وتەدى. اتالمىش دوداعا ەرلەر اراسىندا 6 كوماندا, ايەلدەر اراسىندا 4 كوماندا قاتىسادى.
حالىقارالىق ۆولەيبول فەدەراتسياسىنىڭ رەسمي دوداسى بولىپ بەكىتىلگەن تۋرنيردە ەرلەر اراسىندا قازاقستان ۇلتتىق قۇراماسى, ونىڭ ەكىنشى كومانداسى, تۋنيس, الجير قۇرامالارى مەن رەسەيدىڭ “لوكوموتيۆ – يزۋمرۋد” كلۋبى كۇش سىناسادى. ال ايەلدەر باسەكەسىنە قازاقستان, الجير, ۋكراينا قۇرامالارى مەن “دجيانگسۋ” كومانداسى قاتىسىپ, جارىس كورىگىن قىزدىرادى.
* * *
كىمنىڭ باعى جانار ەكەن؟
بەيسەنبى كۇنى استانادا بوكس فەدەراتسياسىنىڭ ۇيىمداستىرۋىمەن سپورتتىڭ وسى تۇرىنەن ءوتىپ جاتقان ەلباسى ن.نازارباەۆتىڭ كۋبوگى جولىنداعى حالىقارالىق تۋرنيردە اقتىق سىنعا جولداما بەرەتىن شيەلەنىستى جەكپە-جەكتەر ءوتتى.
وندا جارتىلاي فينالعا شىققان قازاقستاننىڭ 24 بوكسشىسى اراسىنان 11 بىلعارى قولعاپ يەسى فينالعا جولداما الدى. وسىلاردىڭ ىشىندە ءوز سالماق دارەجەلەرىندە ءبىرجان جاقىپ (48 كگ.), رەسەيلىك عايىربەك گەرماحانوۆتى جەڭگەن ميراس جاقىپوۆ (51 كگ.), ايدار امىرزاقوۆ (60 كگ.), سەرىك ساپيەۆ (69 كگ.), دانابەك سۋجانوۆ (75 كگ.), ازامات بەلگىباەۆ (81 كگ.) سياقتى بوكسشىلاردىڭ جاقسى ونەر كورسەتكەنىن اتاپ وتكەنىمىز ءجون. سونىمەن بىرگە جارتىلاي فينالعا دەيىن سۇرىنبەي جەتىپ ۋكراينانىڭ وليمپيادا چەمپيونى ۆاسيلي لوماچەنكودان ۇتىلعان سامات باشەنوۆ (60 كگ.) پەن داۋرەن ەلەۋسىنوۆ (75 كگ.) جاس بولسا دا قارسىلاستارىنا لايىقتى قارسىلىق كورسەتە العانىن ايتۋعا بولادى. ال سەرىك ساپيەۆ پەن ازامات بەلگىباەۆتىڭ جەڭىسى جارتى جىلداي ىشتە جۇرگەن كۇيىنىشتى تارقاتقان جەڭىسى بولدى. بۇل ەكى بوكسشى قاڭتار ايىندا استانادا وتكەن قازاقستان چەمپيوناتىندا رۇستەم سىباەۆ پەن المات سەرىموۆتەن جەڭىلىس تاپقان بولاتىن. وسى جولعى جەكپە-جەكتەردە ولار جانكۇيەرلەر الدىندا سول كەزدە كەتكەن ەسەنى قايتاردى دەسەك بولادى. مۇندا سەرىكتىڭ جەڭىسىن ەرەكشە اتاپ وتكەنىمىز ءجون. رۇستەممەن بولعان جەكپە-جەكتە ول كەزدەسۋ باستالماي جاتىپ قارسىلاسىنا لاپ قويدى. ءسويتىپ, ەكى راۋند بويى سىباەۆتىڭ باسىن كوتەرتكىزبەي, ساباپ تاستادى. وسى كەزدە سىباەۆتىڭ باپكەرى ورامالدى شارشى الاڭعا لاقتىرىپ, تورەشىدەن كەزدەسۋدى توقتاتۋدى ءوتىندى. ەسەپ – 14:1. ساپيەۆتىڭ پايداسىندا.
ەندى اتالمىش ءتۋرنيردىڭ اقتىق سىنىندا سەرىك ساپيەۆ رەسەيلىك الەكساندر كلينكوۆپەن, ازامات بەلگىباەۆ كۋبالىق يروسبانيس ديۋۆەرگەل اۆيليسپەن كەزدەسسە, باسقا سالماقتاردا جەڭگەن يۆان دىچكو (91 كگ.-دەن جوعارى) سيريالىق سوۋمار حۋسسۋنمەن, مەرەي اقشالوۆ (64 كگ.) رەسەيلىك الەكساندر بەسپۋتينمەن, ايدار ءامىرزاقوۆ (60 كگ.) ۆاسيلي لوماچەنكومەن ايقاسادى. سول سياقتى ءوز سالماق دارەجەلەرىندە فينالعا شىققان تاعى 6 بوكسشىمىز وزگە ەلدىڭ وكىلدەرىمەن كۇش سىناسادى.
داستان كەنجالين.