تۇركىستان قالاسىندا قازاقستاننىڭ ەڭبەك سىڭىرگەن قايراتكەرى ديماش قۇدايبەرگەن اتقارۋشى پروديۋسەرلىك ەتەتىن «Voice Beyond Horizon» حالىقارالىق مۋزىكالىق جوباسىنىڭ ءتۇسىرىلىمى باستالدى. جوبا قىتايدىڭ Hunan Broadcasting System تەلەارناسىمەن بىرلەسىپ جۇزەگە اسىرىلادى, دەپ حابارلايدى Egemen.kz.
ەلىمىزدىڭ تۋريستىك الەۋەتىن كەڭىنەن تانىتۋعا باعىتتالعان حالىقارالىق بايقاۋعا قازاقستان, قىرعىزستان, قىتاي, يتاليا, مالايزيا جانە سەربيا مەملەكەتتەرىنىڭ ونەرپازدارى قاتىسىپ جاتىر. ءتۇسىرىلىم جۇمىستارى قوجا احمەت ياساۋي كەسەنەسى ورنالاسقان «ازىرەت سۇلتان» مەملەكەتتىك تاريحي-مادەني قورىق-مۋزەيىندە, كونە وتىرار قالاشىعىندا, Karavansaray تۋريستىك كەشەنىندە جانە ەتنواۋىلدا وتەدى. بايقاۋعا قاتىسۋشىلاردىڭ ونەرىن ارنايى شاقىرىلعان حالىقارالىق ساراپشىلار قازىلىق ەتەدى. تۇركىستانداعى ءتۇسىرىلىم اياقتالعاننان كەيىن جوبانىڭ شىعارماشىلىق ساپارى ەلىمىزدىڭ باسقا وڭىرلەرىندە جالعاسادى, ياعني ماڭعىستاۋ, الماتى جانە اقمولا وبلىستارىندا, سونداي-اق الماتى مەن استانا قالالارىندا وتەدى.
اقتىق كەزەڭى ەلوردادا ۇيىمداستىرىلاتىن جوباعا تۋريزم جانە سپورت مينيسترلىگى, مادەنيەت جانە اقپارات مينيسترلىگى, Kazakh Tourism ۇلتتىق كومپانياسى جانە جەرگىلىكتى اتقارۋشى ورگاندار قولداۋ كورسەتىپ وتىر.