تۇركىستان وبلىسى, ماقتاارال اۋدانى جاڭاجول اۋىلدىق وكرۋگىنە قاراستى فيردوۋسي ەلدى مەكەنىندە حالىقتىڭ الەۋمەتتىك وسال توپتارىن قولداۋ ماقساتىندا اۋقىمدى الەۋمەتتىك جوبا ىسكە اسىرىلىپ جاتىر. جوبا اياسىندا 1 قاباتتى, ارقايسىسى ەكى پاتەرلى 48 تۇرعىن ءۇيدىڭ قۇرىلىس-مونتاج جۇمىستارى جوسپارلانعان, دەپ جازادى Egemen.kz.
قۇرىلىس جۇمىستارىن مەردىگەر مەكەمە – «Building Group – 1» جشس-ى جۇرگىزۋدە. جەكە كاسىپكەردىڭ ەسەبىنەن سالىنىپ جاتقان تۇرعىن ۇيلەردىڭ قۇرىلىسى اياقتالعان سوڭ, مەملەكەت تاراپىنان قاراستىرىلعان 1,5 ميلليارد تەڭگە كولەمىندەگى قارجىعا بارلىق ۇيلەر ساتىپ الىنادى. قۇرىلىس الاڭىندا بولعان اۋدان اكىمى باقىت اسانوۆ نىساننىڭ ساپاسىنا, قۇرىلىس قارقىنىنا جانە جۇمىسشىلاردىڭ ەڭبەك جاعدايىنا نازار اۋداردى. سونىمەن قاتار, مەردىگەر كومپانيا وكىلدەرىمەن پىكىرلەسىپ, تۋىنداعان ماسەلەلەردى دەر كەزىندە شەشۋ, جۇمىس كەستەسىنەن كەشىكپەۋ قاجەتتىگىن ايتتى.
ايتا كەتەيىك, بۇل ۇيلەر ءبىرىنشى كەزەكتە كوپبالالى وتباسىلارعا, مۇگەدەكتىگى بار ازاماتتارعا, تولىق ەمەس وتباسىلارعا جانە تۇرعىن ۇيگە مۇقتاج وزگە دە ساناتتاعى ازاماتتارعا جالعا بەرىلەتىن بولادى. وسىلايشا, فيردوۋسي ەلدى مەكەنىندە جاڭا شاعىن اۋدان بوي كوتەرىپ, اۋىلدىڭ الەۋەتى ارتا تۇسپەك.
تۇركىستان وبلىسى