ءۇندى بيلىگى الەۋمەتتىك جەلىلەرگە تىيىم سالۋىنا بايلانىستى نەپالدا ورشىگەن جاپپاي انتيۇكىمەتتىك نارازىلىقتارعا بايلانىستى ەلدىڭ سولتۇستىگىندەگى ۋتتار-پرادەش شتاتىندا قاۋىپسىزدىك شارالارىن كۇشەيتىپ, نەپالمەن شەكاراداعى كۇزەتتى نىعايتتى, دەپ حابارلايدى Egemen.kz Press Trust of India (PTI) اگەنتتىگىنە سىلتەمە جاساپ.
اقپاراتقا سايكەس, نەپالمەن شەكاراداعى بارلىق ۋچاسكەلەردە قوسىمشا كۇزەت قويىلىپ, تاۋلىك بويى باقىلاۋ جۇرگىزىلگەن. جاعدايدى قاداعالاۋ ءۇشىن دروندار پايدالانىلىپ, شەكارا ماڭىنداعى جولداردا پاترۋل كۇشەيتىلدى. اسىرەسە باقىلاۋ-وتكىزۋ پۋنكتتەرىندەگى بەت-الپەتتى تانۋ جۇيەسىنىڭ جۇمىسىنا باسا نازار اۋدارىلعان.
PTI دەرەگىنشە, قازىرگى ۋاقىتتا ءۇندى-نەپال شەكاراسىندا جاعداي قالىپتى. تۋريستىك ساپارلارعا رەسمي شەكتەۋلەر قويىلماعانىمەن, ءۇندىستاننان نەپالعا باراتىن تۋريستەر سانى ايتارلىقتاي ازايعان.
ەستەرىڭىزگە سالا كەتەيىك, 4 قىركۇيەكتە نەپال ۇكىمەتى ەلدىڭ بايلانىس جانە اقپاراتتىق تەحنولوگيالار مينيسترلىگىندە بەلگىلەنگەن مەرزىمدە تىركەلمەگەن بىرقاتار مەسسەندجەر مەن الەۋمەتتىك جەلىلەردىڭ جۇمىسىن شەكتەۋ تۋرالى شەشىم قابىلداعان. وسىدان كەيىن 8 قىركۇيەكتە كاتماندۋدا جانە باسقا دا ءىرى قالالاردا مىڭداعان ادام قاتىسقان جاپپاي نارازىلىق اكتسيالارى باستالعان. قوعامدىق ءتارتىپتى قامتاماسىز ەتۋ ءۇشىن اسكەر ەنگىزىلىپ, شەكتەۋسىز كومەندانتتىق ساعات جاريالانعان. شەرۋشىلەر مەن پوليتسيا اراسىنداعى قاقتىعىس كەزىندە 19 ادام قازا تاۋىپ, 100-دەن استامى جارالانعان.