قازاقستاندىقتاردىڭ شامامەن 90%-ى ءوز ەلىن جانە ازاماتتىعىن ماقتان تۇتادى

11 شىلدە - 12 تامىز ارالىعىندا وتكەن ساۋالناماعا ەلىمىزدىڭ 17 وبلىسىنان جانە رەسپۋبليكالىق ماڭىزى بار – استانا, الماتى, شىمكەنت قالالارىنان 18 جاستان اسقان 8000 ازامات قاتىسقان.

ەڭ جوعارى الەۋمەتتىك وپتيميزم دەڭگەيى 18–29 جاس ارالىعىنداعى جاستارعا ءتان (84,6%). جاس شاماسى وسكەن سايىن ەلدىڭ بولاشاعىنا قاتىستى وپتيميزم ءبىرشاما تومەندەگەنىمەن, جەتكىلىكتى جوعارى دەڭگەي ساقتالعان (61 جاستان جوعارى رەسپوندەنتتەر اراسىندا – 70,6%). ەل دامۋىنىڭ قازىرگى باعىتىن قالا تۇرعىندارىنا (73,8%) قاراعاندا اۋىل تۇرعىندارى (79,3%) اناعۇرلىم دۇرىس دەپ سانايتىنى بەلگىلى بولدى.

ەلدىڭ دۇرىس باعىتتا دامىپ كەلە جاتقانىن قولداعان رەسپوندەنتتەردىڭ باسىم بولىگى قازىردىڭ وزىندە ناقتى جۇزەگە اسىرىلىپ جاتقان بىرقاتار ماڭىزدى رەفورمالاردى اتاپ وتكەن:

الەۋمەتتىك باستامالار:

— اۋىلدىق جانە قالالىق مەكتەپتەردى سالۋ مەن جاڭارتۋ – 38,2%;

— «ۇلتتىق قور – بالالارعا» باعدارلاماسىن ىسكە اسىرۋ – 29,5%;

— بجزق-دان قاراجاتتىڭ ءبىر بولىگىن شەشىپ الۋ مۇمكىندىگى – 20,1%.

ەكونوميكالىق رەفورمالار:

اۆتوماگيسترالدەردى, ۆوكزالدار مەن اۋەجايلاردى سالۋ جانە جوندەۋ – 18,4%; اۋىل شارۋاشىلىعىن دامىتۋ – 13,6%; شاعىن جانە ورتا بيزنەستى قولداۋ – 10,3%; وتاندىق تاۋار ءوندىرىسىنىڭ ارتۋى – 9,7%.

«زاڭ جانە ءتارتىپ» قاعيداتىن جانە «تازا قازاقستان» جالپىۇلتتىق اكتسياسىن جۇزەگە اسىرۋ:

تۇرمىستىق زورلىق-زومبىلىقپەن كۇرەس – 32,6%; ەلدى مەكەندەردى تازالاۋ جانە اباتتاندىرۋ, ۆانداليزم مەن مادەنيەتسىزدىككە قارسى شارالار – 14,7%; ەلدەن زاڭسىز شىعارىلعان اكتيۆتەر مەن كاپيتالدى قايتارۋ – 5,8%.

ەلدى تسيفرلاندىرۋ:

مەملەكەتتىك قىزمەتتەردىڭ تسيفرلىق فورماتتا دامۋى – 30,7%; وتباسىنىڭ تسيفرلىق كارتاسىن, الەۋمەتتىك ءامياندى ەنگىزۋ – 16,1%.

قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى ساۋالناما ناتيجەلەرى ازاماتتاردىڭ ءومىرىنىڭ ءتۇرلى سالالارىندا ناقتى وزگەرىستەردى بايقاپ وتىرعانىن كورسەتەتىنە نازار اۋدارعان. بۇل ءوز كەزەگىندە جۇرگىزىلىپ جاتقان رەفورمالاردىڭ العاشقى ناتيجەسىن بەرىپ, مەملەكەتتىك ساياساتقا دەگەن قوعامدىق سەنىمدى نىعايتىپ, بولاشاققا قاتىستى ءوپتيميزمدى ارتتىرعانىن اڭعارتادى.

ەكونوميكالىق رەفورمالار مەن الەۋمەتتىك باستامالاردىڭ ءتيىمدى جۇزەگە اسىرىلۋى ەل باسشىلىعىنا دەگەن قوعامدىق سەنىم دەڭگەيىنەن بايقالعان. الەۋمەتتانۋلىق زەرتتەۋ دەرەكتەرىنە سايكەس, پرەزيدەنت رەيتينگتىڭ الدىڭعى قاتارىندا تۇر – ساۋالناماعا قاتىسقانداردىڭ 82,4%-ى وعان سەنىم بىلدىرگەن.

سونىمەن قاتار, ەلدەگى وڭ وزگەرىستەر پاتريوتتىق كوڭىل-كۇيدىڭ ارتۋىنا تىكەلەي ىقپال ەتىپ كەلەدى. ساۋالناماعا قاتىسقان رەسپوندەنتتەردىڭ 89,9% قازاقستان جانە ءوز ازاماتتىعىمەن ماقتاناتىنىن اتاپ وتكەن. («وتە ماقتانامىن» – 49,1% جانە «ماقتانامىن» – 40,8%).

ەلدىڭ بولاشاق دامۋى تۇرعىسىنان رەسپوندەنتتەر قازاقستاننىڭ ايماقتىق قانا ەمەس, جاھاندىق دەڭگەيدە دە كوشباسشى بولا الاتىن بىرقاتار سالالارىن ايقىندادى. رەسپوندەنتتەردىڭ پىكىرىنشە, ەلدىڭ ەڭ پەرسپەكتيۆالى توپ-5 دامۋ باعىتى مىناداي:

اگروونەركاسىپتىك سەكتور – 38,9%. تسيفرلاندىرۋ جانە جاساندى ينتەللەكت – 30,6%. ەنەرگەتيكا – 25,3%. كولىك جانە ترانزيت – 17,5%. ادامي كاپيتالدى دامىتۋ – 13,1%.