ءماجىلىس دەپۋتاتى باقىتجان بازاربەك قازاقستان رەسپۋبليكاسىنىڭ باس پروكۋرورى بەرىك اسىلوۆتىڭ اتىنا الماتىداعى زاڭسىز قۇرىلىس, تاۋ جوتالارىنىڭ قىرقىلۋى جانە تابيعي لوگتاردىڭ كومىلۋىنە قاتىستى دەپۋتاتتىق ساۋال جولدادى, دەپ حابارلايدى Egemen.kz.
دەپۋتاتتىڭ ايتۋىنشا, جازعى ۋاقىتتا مەدەۋ, بوستاندىق جانە ناۋرىزباي اۋداندارىندا مەملەكەتتىك ورگاندارمەن بىرلەسكەن رەيدتەر بارىسىندا بىرقاتار زاڭسىزدىقتار انىقتالعان. اتاپ ايتقاندا, تابيعي لوگتار مەن وزەن ارنالارىنىڭ كومىلۋى, تاۋ جوتالارىنىڭ قىرقىلۋى جانە زايلي الاتاۋىنىڭ باۋرايىنداعى جاپپاي زاڭسىز قۇرىلىس جۇمىستارى جۇرگىزىلىپ جاتىر.
«تابيعي جىرالاردىڭ بىتەلۋى ۇلكەن قاۋىپ توندىرەدى. ەگەر مۇزدىقتار ەرىپ, مورەنالىق كولدەر تاسيتىن بولسا, مىڭداعان ادام ۇيلەرىمەن بىرگە سۋ استىندا قالۋى مۇمكىن. ءوزىمنىڭ رەيدتەرىم كەزىندە 12 جىرانىڭ كومىلىپ جاتقانىن انىقتادىم. ولارعا قۇرىلىس جۇرگىزۋگە, ۋچاسكە بەرۋگە جانە ونداي ۇيلەردى تىركەۋگە تۇبەگەيلى تىيىم سالۋ قاجەت» دەدى دەپۋتات.
سونىمەن بىرگە, ول الاتاۋ باۋرايىنداعى تاۋلاردىڭ قىرقىلۋى بەلەڭ الىپ وتىرعانىن, زاڭ جۇزىندە تىيىم سالىنعانىنا قاراماستان, ەليتالىق كوتتەدجدەر ءۇشىن جەر بەدەرىنىڭ جويىلىپ جاتقانىن اتاپ ءوتتى. بۇل جەرلەردىڭ كوپشىلىگى ىقپالدى كاسىپكەرلەر مەن شەنەۋنىكتەردىڭ تۋىستارىنا تيەسىلى ەكەنى بەلگىلى بولدى.
باقىتجان بازاربەك الماتىداعى قۇرىلىس سالاسىنداعى زاڭسىزدىقتاردى دا سىنعا الدى. ونىڭ ايتۋىنشا, بىرقاتار ءىرى نىساندار جوبالىق-سمەتالىق قۇجاتتاماسىز, ساراپتاماسىز جانە رۇقساتسىز سالىنىپ جاتىر. مىسال رەتىندە ول «رامس» كومپانياسىنىڭ 40 قاباتتى مۇناراسىن جانە «پرايم پارك» تۇرعىن ءۇي كەشەنىن اتادى. وسىنداي زاڭسىز نىسانداردىڭ سانى جيىرمادان اساتىنىن جەتكىزدى.
دەپۋتات سوت شەشىمى بويىنشا بۇزىلۋعا ءتيىس «مونبلان» جانە «شۆەيتساريا» تۇرعىن ءۇي كەشەندەرىنىڭ ءۇش جىل وتسە دە ءالى كۇنگە دەيىن تۇر ەكەنىنە نازار اۋداردى. ول ادىلەت مينيسترلىگى مەن سوت ورىنداۋشىلارىنىڭ شەشىمدى ورىنداۋعا اسىقپاي وتىرعانىنا كۇمان كەلتىرىپ, مەملەكەتتىك ورگاندار تاراپىنان ىقتيمال سىبايلاس جەمقورلىققا تەكسەرۋ جۇرگىزۋدى تالاپ ەتتى.
ساۋال سوڭىندا دەپۋتات باس پروكۋراتۋرادان:
زاڭسىز نىسانداردى بۇزۋ تۋرالى سوت شەشىمدەرىنىڭ ورىندالۋىن ەرەكشە باقىلاۋعا الۋدى; جىرالاردى كومۋگە تولىق تىيىم ەنگىزىپ, زاڭسىز بەرىلگەن جەرلەردى مەملەكەتكە قايتارۋدى; تاۋلاردىڭ قىرقىلۋىن تۇبەگەيلى توقتاتىپ, ب ۇلىنگەن اۋماقتاردى قالپىنا كەلتىرۋدى سۇرادى.سونىمەن قاتار, ول الماتىنىڭ جاڭا اكىمى دارحان ساتىبالدىمەن بىرلەسكەن جۇمىستىڭ ناتيجەلى باستالعانىن, زاڭسىز قۇرىلىستاردى انىقتاۋ جانە ءسۇرۋ ىسىندە وڭ وزگەرىستەر بايقالعانىن اتاپ ءوتتى.
«جاڭا اكىممەن بىرگە زاڭسىزدىقتارعا قارسى ناقتى شارالار قابىلدانىپ جاتىر. بۇل باعىتتاعى ىنتىماقتاستىعىمىز ءارى قاراي دا جەمىستى جالعاسادى دەپ سەنەمىن», دەدى ءماجىلىس دەپۋتاتى باقىتجان بازاربەك.