وقۋ-اعارتۋ مينيسترلىگى كەيىنگى التى جىلدا ەلىمىزدەگى ءۇش اۋىسىمدى مەكتەپتەر سانى ءتورت ەسە ازايعانىن مالىمدەدى, دەپ جازادى Egemen.kz.
2019 جىلدان بەرى 1 ميلليوننان استام وقۋشىعا ارنالعان 1200 جاڭا مەكتەپ سالىندى. 2023-2024 جىلدار ارالىعىندا 510 مىڭ ورىنعا ارنالعان 422 ءبىلىم وشاعى پايدالانۋعا بەرىلگەن.
ناتيجەسىندە ءۇش اۋىسىمدى مەكتەپتەر سانى ءتورت ەسە ازايدى. اپاتتى جاعدايداعى مەكتەپتەر ەكى ەسە قىسقاردى. وقۋشى ورىندارىنىڭ تاپشىلىعى دا ءتورت ەسە تومەندەدى.
ءۇش اۋىسىمدى وقىتۋدان تولىق باس تارتقان وڭىرلەر قاتارىندا شىمكەنت, الماتى, اقمولا, قاراعاندى جانە قىزىلوردا وبلىستارى بار.
«جاڭا وقۋ جىلىنىڭ قارساڭىندا وڭىرلەردە 115 مىڭ وقۋشىعا ارنالعان تاعى 83 جاڭا مەكتەپ اشىلدى, ونىڭ 57-ءسى «كەلەشەك مەكتەپتەرى» ۇلتتىق جوباسى اياسىندا سالىنعان. جاڭا مەكتەپتەردىڭ پايدالانۋعا بەرىلۋى بىرقاتار وڭىرلەردە ءۇش اۋىسىمدى وقىتۋ ماسەلەسىن تولىعىمەن جويۋعا مۇمكىندىك بەردى», دەپ جازعان مينيسترلىك حابارلاماسىندا.
قازىر ەلدەگى 3 مىڭ مەكتەپ ءبىر اۋىسىمدا, 5 مىڭ مەكتەپ ەكى اۋىسىمدا وقىتادى. جىل سوڭىنا دەيىن 140 مىڭ ورىنعا ارنالعان 111 مەكتەپ اشىلعان سوڭ, بۇل كورسەتكىش ايتارلىقتاي جاقسارادى.
سونداي-اق, مينيسترلىك 2025-2026 وقۋ جىلىنا دەيىن 232 جاڭا مەكتەپ سالۋدى, 245 مەكتەپتى جاڭعىرتۋدى جانە 1 مىڭ اۋىل مەكتەبىن مودەرنيزاتسيالاۋدى جوسپارلاپ وتىر.