ءادىلحان سەرىك ۇلتتىق ۇلان قاتارىندا مەرزىمدى اسكەري قىزمەتىن وتەي ءجۇرىپ, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وقۋعا مۇمكىندىك بەرەتىن مەملەكەتتىك ءبىلىم بەرۋ گرانتىنا قول جەتكىزدى, دەپ جازادى Egemen.kz
ءادىلحان اسكەرگە شاقىرىلماس بۇرىن ارناۋلى ورتا ءبىلىم العان. كوللەدجدى تامامداعان سوڭ ونى قاراعاندىدان اسكەر قاتارىنا شاقىرىپ, مەرزىمدى قىزمەتىن ەلورداداعى ۇلتتىق ۇلاننىڭ 5573 اسكەري بولىمىندە وتەدى. مۇندا ۇلاندىق قوعامدىق ءتارتىپتى قامتاماسىز ەتىپ, شاھار كوشەلەرىندە پاترۋلدىك قىزمەت اتقاردى.
قىزمەت بارىسىندا ول «سارباز 2.0» مەملەكەتتىك باعدارلاماسى جايىندا ءبىلدى. بۇل باستاما مەرزىمدى اسكەري قىزمەتشىلەرگە سۇرانىسقا يە ماماندىقتار بويىنشا تەگىن وقۋعا مۇمكىندىك بەرەدى. بۇل جاڭالىق ونىڭ تاعى ءبىر ارمانىنا جول اشتى.
«گرانت الۋ ءۇشىن بارىمدى سالدىم. قوعامدىق پاندەر بويىنشا تەست تاپسىرىپ, اسكەري قىزمەتتە دە ۇزدىك بولۋعا تىرىستىم. باعدارلاما تۋرالى ەستىگەن ساتتە بۇل مۇمكىندىكتى جىبەرمەۋ كەرەك ەكەنىن ءتۇسىندىم. گرانتقا ءتۇسۋ – مەن ءۇشىن دە, اتا-انام ءۇشىن دە ۇلكەن قۋانىش», دەدى ول.
كوپبالالى وتباسىندا تاربيەلەنگەن ۇلاندىق قازىر «بيوتەحنولوگ» ماماندىعىن مەڭگەرىپ جاتىر.
ۇلتتىق ۇلان ءباسپاسوز قىزمەتىنىڭ مالىمەتىنشە, بيىل جازدا ەل بويىنشا 900-دەن استام ۇلاندىق مەرزىمدى قىزمەتىن اياقتاپ, قازاقستاننىڭ جەتەكشى جوعارى وقۋ ورىندارىندا تەگىن ءبىلىم الۋعا مۇمكىندىك بەرەتىن سەرتيفيكاتقا يە بولعان.
ايتا كەتەيىك, قۇقىقتىق ءتارتىپ اسكەرىنىڭ جەكە قۇرامى ساقشىلارمەن بىرلەسىپ ەلىمىزدىڭ 21 قالاسىندا قوعامدىق ءتارتىپتى قاداعالايدى. بۇل مىندەتتى اتقارۋعا كۇن سايىن اسكەر بويىنشا 8 000-نان اسا ۇلاندىق جۇمىلدىرىلادى.