كونستيتۋتسيالىق سوت توراعاسى ەلۆيرا ازيموۆا «كونستيتۋتسيا جانە مەملەكەتتىلىك: قۇقىق جانە بولاشاق ديالوگى» حالىقارالىق عىلىمي-پراكتيكالىق كونفەرەنتسياسى اياسىندا پرەزيدەنت اتىنان ەلىمىزدىڭ قۇقىقتىق جۇيەسىنىڭ دامۋىنا ەلەۋلى ۇلەس قوسقان ادامدارعا «قازاقستان رەسپۋبليكاسىنىڭ كونستيتۋتسياسىنا 30 جىل» مەرەيتويلىق مەدالدارىن تابىس ەتتى.
مەرەيتويلىق مەدال ەلىمىزدىڭ اتا زاڭىنىڭ 30 جىلدىعىنا وراي تاعايىندالعان جانە قازاقستان رەسپۋبليكاسى كونستيتۋتسياسىنىڭ ۇستەمدىگىن قامتاماسىز ەتۋگە, ەل تاۋەلسىزدىگىن, قازاقستاندىق قوعامداعى كەلىسىم مەن تۇراقتىلىقتى نىعايتۋعا, ادامنىڭ جانە ازاماتتىڭ كونستيتۋتسيالىق قۇقىقتارى مەن بوستاندىقتارىن قورعاۋعا, كونستيتۋتسيوناليزم يدەيالارى مەن قاعيداتتارىن قالىپتاستىرۋعا جانە دامىتۋعا ەلەۋلى ۇلەس قوسقان قازاقستان رەسپۋبليكاسىنىڭ ازاماتتارى مەن شەتەل ازاماتتارىنا بەرىلەدى.
«كونستيتۋتسيا – ازاماتتاردىڭ قۇقىقتارى مەن بوستاندىقتارىنىڭ نەگىزگى كەپىلى, تاۋەلسىزدىك پەن مەملەكەتتىك بيلىكتىڭ سيمۆولى. اتا زاڭىمىزدىڭ 30 جىلدىعىن اتاپ ءوتۋ بارىسىندا ءبىز ءوز ەڭبەگى ارقىلى قازاقستاندا جانە ەلىمىزدەن تىس جەردە زاڭ ۇستەمدىگىن نىعايتۋعا جانە دەموكراتيالىق قۇندىلىقتاردى ىلگەرىلەتۋگە ۇلەس قوسقان ادامداردى قۇرمەتتەيمىز», دەدى ە.ازيموۆا.
ماراپاتتالعانداردىڭ قاتارىندا جەتەكشى قۇقىقتانۋشى عالىمدار, كونستيتۋتسيوناليستەر, جوعارى وقۋ ورىندارىنىڭ وقىتۋشىلارى, ادام قۇقىقتارى جانە كاسىپكەرلەردىڭ قۇقىقتارىن قورعاۋ جونىندەگى ومبۋدسمەندەر, مەملەكەتتىك ورگاندار مەن كاسىبي زاڭ قوعامداستىعىنىڭ, سونداي-اق حالىقارالىق ۇيىمداردىڭ وكىلدەرى بار.
سونداي-اق كونستيتۋتسيالىق سوت توراعاسىنىڭ ورىنباسارى باقىت نۇرمۇحانوۆ Maqsut Narikbayev University الاڭىندا وتكەن كونفەرەنتسيانىڭ سەسسياسى بارىسىندا, بۇعان قوسا كونستيتۋتسيالىق سوتتىڭ سۋدياسى ەركىن وڭعارباەۆ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا وتكەن كونفەرەنتسيانىڭ سەسسياسى شەڭبەرىندە ەڭبەك سىڭىرگەن ادامدارعا مەملەكەت باسشىسىنىڭ اتىنان مەرەيتويلىق مەدالداردى تابىس ەتتى.